ទីប្រឹក្សាលោក Zelensky ទទួលស្គាល់ថា បន្ទាយធំចុងក្រោយ របស់អ៊ុយក្រែន ជិតធ្លាក់ទៅដៃ រុស្ស៊ី ហើយ

ការប្រយុទ្ធ កាន់តែខ្លាំងឡើងសម្រាប់ទីក្រុង Lysychansk ដែលជាបន្ទាយដ៏ធំចុងក្រោយរបស់អ៊ុយក្រែននៅក្នុងខេត្ត Luhansk ភាគខាងកើត ខណៈទីប្រឹក្សាប្រធានាធិបតី Volodymyr Zelensky បានទទួលស្គាល់ថា ទីក្រុងនេះធ្លាក់ទៅដៃរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Oleksiy Arestovych បាននិយាយថា “នេះ​ពិត​ជា​ការ​គំរាម​កំហែង យើង​នឹង​ឃើញ។ ខ្ញុំមិនច្រានចោលលទ្ធផលណាមួយក្នុងចំណោមលទ្ធផលមួយចំនួននៅទីនេះទេ។ អ្វីៗនឹងកាន់តែច្បាស់ក្នុងរយៈពេលមួយថ្ងៃ ឬពីរថ្ងៃទៀត”។

ស្របពេលជាមួយគ្នានោះ អភិបាលតំបន់បាននិយាយនៅព្រឹកថ្ងៃអាទិត្យទី០៣ខែកក្កដានេះថា ការបំផ្ទុះក៏បានអង្រួនទីក្រុង Belgorod របស់រុស្ស៊ី នៅជិតព្រំដែនជាមួយអ៊ុយក្រែនផងដែរ។

លោក Vyacheslav Gladkov បានបង្ហោះនៅលើកម្មវិធីផ្ញើសារ Telegram ថា ការ​ផ្ទុះ​បាន​ ​បំផ្លាញ​អគារ​លំនៅដ្ឋាន ហើយ​អ្នក​របួស​បី​នាក់ ​ត្រូវ​បាន​បញ្ជូន​ទៅ​កាន់មន្ទីរពេទ្យ។

រុស្ស៊ី កំពុងព្យាយាមបណ្ដេញកងកម្លាំងអ៊ុយក្រែនចេញពីខេត្ត Luhansk និង Donetsk ក្នុងតំបន់ Donbas ជាកន្លែងដែលក្រុមបំបែកខ្លួនគាំទ្រដោយទីក្រុងមូស្គូ បាននិងកំពុងប្រយុទ្ធជាមួយទីក្រុង កៀវ ចាប់តាំងពីការធ្វើអន្តរាគមន៍យោធាលើកដំបូងរបស់រុស្ស៊ី នៅអ៊ុយក្រែនក្នុងឆ្នាំ២០១៤។

គួរបញ្ជាក់ថា ជនស៊ីវិលរាប់ពាន់នាក់ត្រូវបានសម្លាប់ ហើយទីក្រុងនានាត្រូវរងការវាយប្រហារ ចាប់តាំងពីរុស្ស៊ីលុកលុយអ៊ុយក្រែននៅថ្ងៃទី ២៤ ខែកុម្ភៈមក នៅក្នុងអ្វីដែលអ៊ុយក្រែននិងសម្ព័ន្ធមិត្តលោកខាងលិចនិយាយថាជាសង្រ្គាម៕

ប្រែសម្រួល៖ Vann Vann

ប្រភព៖ Al Jazeera, Tribune India

ចុចអាន៖ ទាហានស៊ីឈ្នួលអង់គ្លេស ២នាក់ទៀត ត្រូវរុស្ស៊ី ចោទប្រកាន់