ផឹកស៊ីច្រៀងខារ៉ាអូខេឮៗពេក​ បុរសវៀតណាមមួយក្រុមជិះម៉ូតូមកកាប់ដល់ផ្ទះ

មនុស្ស៣នាក់បានរងរបួសនៅក្នុងការវាយប្រហារដោយកាំបិតដែល រឿងនេះកើតឡើងដោយសារតែសំឡេងរំខានពីការច្រៀងខារ៉ាអូខេឮៗពេកក្នុងការផឹកស៊ីនៅផ្ទះមួយក្នុងទីក្រុង ហូជីមិញ។

ប៉ូលិសខណ្ឌ Binh Chanh ក្នុងទីក្រុងហូជីមិញ បានចាប់ផ្តើមការស៊ើបអង្កេតចូលទៅក្នុងការវាយប្រហារទៅលើលោក ធី អាយុ២៥ឆ្នាំក៏ដូចជាឪពុកនិងមិត្តភក្តិម្នាក់របស់គាត់ផងដែរ។

យោងតាមការស៊ើបអង្កេតបឋមបានឲ្យដឹងថា លោក ធី កំពុងច្រៀងខារ៉ាអូខេនិងផឹកស៊ីក្នុងផ្ទះរបស់គាត់ជាមួយមិត្តភក្តិបីនាក់ទៀត នៅពេលមនុស្សមួយក្រុមមានគ្នា៤នាក់បានចូលមកវាយប្រហារពួកគេដោយកាំបិតនិងដែកទីប។

ក្រុមជនដៃដល់បាននិយាយថា ពួកគេថ្លង់នឹងសំឡេងរំខានពីខារ៉ាអូខេដែលបើកឮហួសហេតុចេញពីផ្ទះរបស់ ធី មុនពេលកាប់គាត់និងមិត្តរបស់គាត់ម្នាក់។

ដោយឃើញមានបញ្ហា ឪពុករបស់ ធី បានព្យាយាមចូលធ្វើអន្តរាគមន៍ប៉ុន្តែក៏រងរបួសដោយសារការកាប់នឹងកាំបិតផងដែរ។

ជនល្មើសបានចាកចេញពីកន្លែងកើតហេតុភ្លាមៗ៕

ប្រែសម្រួលដោយ៖ Vann Vann

ប្រភព៖ Tuoi Tre

ចុចអាន៖ គប់គ្រាប់បែកសាំងដាក់អ្នកជិតខាងព្រោះខឹងច្រៀងខារ៉ាអូខេឮៗពេក (មានវីដេអូ)