អ៊ីស្រាអែល ថា ក្រុមហាម៉ាស រារាំងការផ្ដល់ប្រេង ៣០០ លីត្រដល់មន្ទីរពេទ្យ​ក្នុងតំបន់ហ្គាហ្សា

អ្នកនាំពាក្យកងទ័ពអ៊ីស្រាអែល លោក Avichay Adraee បាននិយាយលើបណ្ដាញសង្គម X កាលពីថ្ងៃអាទិត្យថា កងកម្លាំងអ៊ីស្រាអែលបានផ្តល់ប្រេងប្រមាណ ៣០០ លីត្រដល់មន្ទីរពេទ្យ Al-Shifa ក្នុងតំបន់ហ្គាហ្សា ប៉ុន្តែក្រុមហាម៉ាសបានរារាំងមិនឲ្យជំនួយនេះទៅដល់ដៃមន្ទីរពេទ្យឡើយ ។

លោក Adraee បញ្ជាក់ថា “ក្រុមហាម៉ាសគ្មានសិទ្ធិរារាំងជំនួយនេះឡើយ ព្រោះពួកគេមិនមែនជាភាគីនៃការគ្រប់គ្រងមន្ទីរពេទ្យ Al-Shifa នោះទេ ហើយក៏មិនមានវត្តមាននៅក្នុងរចនាសម្ព័ន្ធនៃការសម្រេចចិត្តរបស់ខ្លួនដែរ ជាពិសេសមន្ទីរពេទ្យនេះស្ថិតនៅក្រោមអំណាចគ្រប់គ្រងទាំងស្រុងរបស់ក្រសួងសុខាភិបាលប៉ាឡេស្ទីន ទាំងកិច្ចការរដ្ឋបាល និងបច្ចេកទេស” ។

ទោះយ៉ាងណា ក្រុមប្រដាប់អាវុធប៉ាឡេស្ទីនហាម៉ាសបានចេញការឆ្លើយតប និងធ្វើការបដិសេធចំពោះការអះអាងរបស់កងកម្លាំងអ៊ីស្រាអែល ហើយថែមទាំងចោទប្រកាន់ពួកគេវិញដែរថា កំពុងយកមុខយកមាត់ និងកុហកពិភពលោកអំពីពាក្យសម្ដីរបស់ខ្លួន ។

ស្របពេលជាមួយគ្នានេះ ក្រុមប្រដាប់អាវុធប៉ាឡេស្ទីនហាម៉ាសក៏បានជំរុញឲ្យអង្គការសហប្រជាជាតិ និងសហគមន៍អន្តរជាតិឲ្យជួយធ្វើអន្តរាគមន៍ភ្លាមៗដើម្បីនាំយកប្រេងឥន្ធនៈចូលទៅក្នុងតំបន់ហ្គាហ្សាស្ទ្រីប ដើម្បីដំណើរការមន្ទីរពេទ្យក្នុងតំបន់ឡើងវិញ សម្រាប់ជួយសង្គ្រោះដល់អ្នកជំងឺ កុមារ និងអ្នករងរបួស ។

ក្រុមហាម៉ាសបានលើកឡើងថា “ប្រេងឥន្ធនៈ ៣០០ លីត្រដែលកងកម្លាំងអ៊ីស្រាអែលផ្ដល់ឲ្យមន្ទីរពេទ្យ Al-Shifa គឺគ្រាន់តែជាយុទ្ធនាការបោកបញ្ឆោត និងដើម្បីតុបតែងមុខមាត់ដ៏អាក្រក់របស់ពួកគេប៉ុណ្ណោះ ជាពិសេសគឺដើម្បីព្យាយាមលាក់បាំងឧក្រិដ្ឋកម្មប្រឆាំងមនុស្សជាតិពីការទម្លាក់គ្រាប់បែកលើមន្ទីរពេទ្យសម្លាប់បុគ្គលិក និងបង្កគ្រោះថ្នាក់ដល់អាយុជីវិតអ្នកជំងឺ” ។

រហូតមកដល់ពេលនេះ អ៊ីស្រាអែលបាននិងកំពុងធ្វើការវាយប្រហារទាំងតាមផ្លូវអាកាស និងផ្លូវគោកដោយមិនប្រណីដៃលើតំបន់ហ្គាហ្សាស្ទ្រីប រួមទាំងមន្ទីរពេទ្យ កន្លែងស្នាក់នៅ និងកន្លែងគោរពបូជាផងដែរ ចាប់តាំងពីក្រុមហាម៉ាសប៉ាឡេស្ទីនបើកការរវាយប្រហារឆ្លងព្រំដែនកាលពីថ្ងៃទី៧ ខែតុលា ។

យោងតាមក្រសួងសុខាភិបាលនៅតំបន់ហ្គាហ្សាបានឲ្យដឹងថា ចាប់តាំងពីពេលនោះមក ជនស៊ីវិលលើស ១១,១០០ នាក់ត្រូវបានសម្លាប់ រួមទាំងកុមារ និងស្ត្រីជាង ៨,០០០ នាក់ ខណៈខាងអ៊ីស្រាអែលវិញមានមនុស្សជិត ១,២០០ នាក់បានបាត់បង់ជីវិត ។

ក្រៅ​ពី​ចំនួន​អ្នក​ស្លាប់ដ៏ច្រើនសន្ធឹកសន្ធាប់នេះ ក្រសួងសុខាភិបាលដែលគ្រប់គ្រងដោយក្រុមហាម៉ាសបាននិយាយថា ការឆ្លើយតបរបស់អ៊ីស្រាអែលលើតំបន់ហ្គាហ្សា ក៏បានបណ្ដាលឲ្យមនុស្សជាង ២៨,០០០ នាក់ រងរបួសផងដែរ ខណៈប្រជាជន ២.៣ លាននាក់កំពុងខ្វះជំនួយមនុស្សធម៌ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ អ៊ីស្រាអែល បាញ់រះកាំភ្លើងធំវាយប្រហារតំបន់ព្រំដែនភាគខាងត្បូងប្រទេស លីបង់