ត្រួសៗ​អំពីលោកស្រី កាម៉ាឡា ហារីស ដែលលោក បៃដិន គាំទ្រជា​បេក្ខភាព​ប្រធានាធិបតី​អាមេរិក

ក្នុង​ភាព​ចលាចល​ម្ដងជាពីរដងក្នុង​ឆាកនយោបាយ​អាមេរិក លោក​ប្រធានាធិបតី ចូ បៃដិន បាន​ប្រកាសថា លោក​នឹងមិន​ឈរ​ឈ្មោះ​សម្រាប់​ការ​បោះ​ឆ្នោត​ឡើង​វិញនៅ​ខែ​វិច្ឆិកាខាងមុខនោះទេ ដោយជំនួស​វិញ​នូវ​ការ​គាំទ្រ​អនុប្រធានាធិបតី កាម៉ាឡា ហារីស ជាអ្នកបន្តវេន។

លោកស្រី ហារីស បានបង្កើត​ទំព័រប្រវត្តិសាស្ត្រ​ថ្មីម្ដងរួចមកហើយនៅក្នុងនយោបាយអាមេរិក ​ដោយលោកស្រីបាន​ក្លាយ​ជា​អនុប្រធានាធិបតី​ស្បែក​ខ្មៅ​ដំបូង​គេ​។ យ៉ាង​ណា​មិញ បច្ចុប្បន្ន លោកស្រី​ ហារីស កំពុងប្រឈម​នឹង​ការ​ព្រួយ​បារម្ភ​ថា​តើ​លោកស្រី​នឹងអាច​កម្ចាត់​បេក្ខភាពមកពី​គណបក្ស​សាធារណរដ្ឋ និង​ជា​អតីត​ប្រធានាធិបតី លោក ដូណាល់ ត្រាំ បានដែរ​ឬ​ក៏​អត់ ខណៈគណបក្សប្រជាធិបតេយ្យនឹងត្រូវជ្រើសរើសបេក្ខភាពថ្មី ហើយការ​សម្រេច​ចិត្ត ​នឹង​ត្រូវបោះឆ្នោត​ដោយ​ប្រតិភូ​ប្រហែល ៤ ៧០០នាក់អំឡុងសមាជបក្សក្នុងទីក្រុងឈីកាហ្គោ ដែលចាប់ផ្តើមនៅថ្ងៃទី១៩ខែសីហាខាងមុខ។

កាលពីថ្ងៃអាទិត្យ​ទី​២១ ខែ​កក្កដា លោក បៃដិន បានប្រកាសគាំទ្រលោកស្រី ហារីស ហើយនិយាយថាវាជា “ការសម្រេចចិត្តដ៏ល្អបំផុតដែលលោកបានធ្វើ” ដោយអំពាវនាវឲ្យគណបក្សប្រជាធិបតេយ្យគាំទ្រលោកស្រី។

លោក បៃដិន បាន​ប្រកាស​នៅ​លើ​បណ្ដាញសង្គម X ថា​ “​ថ្ងៃ​នេះ​ខ្ញុំ​ចង់​ផ្តល់​ការ​គាំទ្រ និង​ការ​គាំទ្រ​ពេញ​លេញ​របស់​ខ្ញុំ​សម្រាប់ ហារីស ដើម្បី​ជា​បេក្ខភាព​គណបក្ស​របស់​យើង​នៅ​ឆ្នាំ​នេះ​”។

តើលោកស្រី ហារីស ជានរណា?

លោកស្រី ហារីស អាយុ ៥៩ឆ្នាំ​ កើត​នៅ​ទីក្រុង Oakland រដ្ឋ California មាន​ម្តាយ​ដែល​មាន​ដើម​កំណើត​ជា​ជនជាតិ​ឥណ្ឌា និង​ឪពុក​ជា​ជនជាតិហ្សាម៉ាអ៊ីក។

លោកស្រីបានចូលរៀននៅសកលវិទ្យាល័យ Howard ក្នុងរដ្ឋធានីវ៉ាស៊ីតោន ឌីស៊ី មុនពេលទទួលបានសញ្ញាប័ត្រច្បាប់ពីសកលវិទ្យាល័យច្បាប់ California នៅទីក្រុង San Francisco ។

លោកស្រីបានចាប់ផ្តើមធ្វើការនៅក្នុងការិយាល័យមេធាវីតំបន់ Alameda County មុនពេលផ្លាស់ទៅការិយាល័យមេធាវីទីក្រុង San Francisco ។

លោកស្រីបានក្លាយជាមេធាវីទីក្រុង San Francisco ក្នុងឆ្នាំ២០០៣ បន្ទាប់មកត្រូវបានជ្រើសរើសជាអគ្គមេធាវីរបស់រដ្ឋ California ដែលមានតួនាទីជាអ្នកអនុវត្តច្បាប់កំពូលរបស់រដ្ឋក្នុងឆ្នាំ២០១០ ហើយត្រូវបានជាប់ឈ្មោះម្ដងទៀតនៅ​រយៈពេល​៤ឆ្នាំ​បន្ទាប់។

លោកស្រី ហារីស បានជាប់ឆ្នោតជាសមាជិកព្រឹទ្ធសភាអាមេរិកក្នុងឆ្នាំ២០១៦ ហើយបានក្លាយជាអ្នករិះគន់ខ្លាំងជាងគេលើលោក ដូណាល់ ត្រាំ ជាពិសេសអំពីគោលនយោបាយអន្តោប្រវេសន៍របស់លោក ត្រាំ។

ការសួរដេញដោលយ៉ាងចាស់ដៃរបស់លោកស្រីលើបេក្ខភាពតុលាការកំពូល លោក Brett Kavanaugh ក្នុងឆ្នាំ២០១៨ បានជួយពង្រឹងកេរ្តិ៍ឈ្មោះរបស់លោកស្រីឲ្យកើនឡើងគួរ​ឲ្យកត់សម្គាល់ និងបានក្លាយជាបេក្ខជនឆ្នើមម្នាក់របស់គណបក្សប្រជាធិបតេយ្យ។

លោកស្រីបានរៀបការជាមួយមេធាវីម្នាក់ឈ្មោះ Doug Emhoff ដែលស្វាមីរបស់លោកស្រីបានទទួលងារជា “Second Gentleman” ដំបូងគេក្នុងប្រវត្តិសាស្ត្រអាមេរិក បន្ទាប់ពីការបោះឆ្នោតឆ្នាំ២០២០។ យ៉ាងណា លោកស្រី ហារីស និងលោក Emhoff មិនមានកូននោះទេ។

លោកស្រី ហារីស ក្លាយជា​អនុប្រធានាធិបតី​​ដោយ​របៀប​ណា?

ដំបូងឡើយ លោកស្រី ហារីស បានឈរឈ្មោះសម្រាប់សេតវិមានក្នុងការបោះឆ្នោតឆ្នាំ២០២០ ប៉ុន្តែត្រូវបានច្រានចោលភ្លាមៗវិញ បន្ទាប់ពីធ្វើមិនទាន់សូវបានល្អក្នុងការជជែកដេញដោលនាគ្រានោះ។

នៅក្នុងការជជែកដេញដោលឆ្នាំ២០១៩ លោកស្រី ហារីស បានប្រជែងជាមួយលោក បៃដិន លើការប្រកួតប្រជែងជាបេក្ខភាពប្រធានាធិបតី ហើយពេលនោះមនុស្សជាច្រើនបានគិតថា លោកស្រីនឹងមិនអាចក្លាយជាអនុប្រធានាធិបតីបាននោះឡើយ ក្រោយពេលលោក បៃដិន ឈ្នះការបោះឆ្នោត។ យ៉ាងណា កាលណោះលោក បៃដិន ដែលមានភាពលេចធ្លោជាងគេនៅក្នុងឆ្នាំ២០២០ បានប្រកាសពីការប្តេជ្ញាចិត្តរបស់លោកថា លោកនឹងជ្រើសរើសស្ត្រីជាមិត្តរួមការងារសម្រាប់តំណែងកំពូលនៅក្នុងអាណត្តិរបស់លោក។ ការ​ជ្រើសរើស​លោកស្រី ហារីស ត្រូវ​បាន​គេ​មើល​ឃើញ​ថា​ជា ​កិច្ច​ខិតខំ​ប្រឹងប្រែង​មួយ​ដើម្បី​អំពាវនាវ​រកសម្លេងគាំទ្រពីអ្នក​បោះឆ្នោត​ស្បែក​ខ្មៅ និង​ដើម្បី​ពង្រឹង​មូលដ្ឋាន​របស់​គណបក្សប្រជាធិបតេយ្យ។

សមត្ថភាពអនុវត្តច្បាប់ និងគោលការណ៍កណ្ដាលនិយមរបស់លោកស្រី ហារីស ក៏ត្រូវបានគេមើលឃើញថាជា ផលចំណេញដែលអាចទាក់ទាញអ្នកបោះឆ្នោតដែលមិនទាន់ធ្វើការសម្រេចចិត្តផងដែរ។

លោកស្រី ហារីស បានសាងកេរ្តិ៍ឈ្មោះក្នុងប្រវត្តិសាស្ត្រ​អាមេរិក​ដូចម្ដេចខ្លះ?

លោកស្រី ហារីស បានបង្កើនសមត្ថភាពកំពូលៗជាច្រើននៅក្នុងអាជីពរបស់លោកស្រី ហើយបានក្លាយជាស្ត្រីស្បែកខ្មៅដំបូងគេដែលកាន់តួនាទីសំខាន់ៗស្ទើរតែទាំងអស់នៅអាមេរិក ដែលមានដូចជា មេធាវីទីក្រុង San Francisco, អគ្គមេធាវីរបស់រដ្ឋ California, សមាជិកព្រឹទ្ធសភាមកពីរដ្ឋ California, និងអនុ​ប្រធានាធិបតី។

លោកស្រី ក៏​ជាប់ឈ្មោះជា​កូន​ស្រី​ដំបូង​គេ​ផង​ដែរ​របស់​ជន​អន្តោប្រវេសន៍នៅអាមេរិក ​ដែល​អាច​ជាប់​ឆ្នោត​ជា​អនុប្រធានាធិបតី។

ពេលក្លាយជាអនុប្រធានាធិបតី លោកស្រី ហារីស ធ្វើអ្វីខ្លះ?

ថ្លែងទៅកាន់សារព័ត៌មាន Al Jazeera លោក Jennifer Victor សាស្ត្រាចារ្យនៅសកលវិទ្យាល័យ George Mason បានពណ៌នាលោកស្រី ហារីស ថាជា “អនុប្រធានាធិបតីធម្មតា” មួយរូប។

លោកស្រី បានគាំទ្រយ៉ាងខ្លាំងនូវគោលនយោបាយអនុម័តច្បាប់របស់រដ្ឋបាលលោក បៃដិន រួមមានច្បាប់ហេដ្ឋារចនាសម្ព័ន្ធ អន្តោប្រវេសន៍ ការគ្រប់គ្រងកាំភ្លើង និងការខិតខំប្រឹងប្រែងដើម្បីការពារសិទ្ធិរំលូតកូន។

ជាពិសេស លោកស្រី ហារីស ត្រូវ​បាន​ផ្តល់​ភារកិច្ច​ជា​អ្នក​នាំ​មុខ​ក្នុង​កិច្ច​ខិត​ខំ​ប្រឹង​ប្រែង​ដើម្បី​ទប់​ស្កាត់​ការ​ធ្វើ​ចំណាក​ស្រុក​ពី​អាមេរិក​កណ្តាល។

តើលោកស្រី ហារីស នឹងអាចយក​ឈ្នះលោក ត្រាំ ឬទេ?

នោះនៅតែជាសំណួរធំសម្រាប់គណបក្សប្រជាធិបតេយ្យ។

លោក Alan Fisher អ្នកសារព័ត៌មានរបស់ Al Jazeera រាយការណ៍ពីរដ្ឋធានីវ៉ាស៊ីតោន ឌីស៊ី បាននិយាយថា ខណៈពេលដែលលោក បៃដិន បានគាំទ្រលោកស្រី ហារីស វាមិនមានន័យថាលោកស្រីនឹងទទួលបានការគាំទ្រពីគណបក្សប្រជាធិបតេយ្យក្នុងសន្និបាតបក្ស ដែលនឹងត្រូវចាប់ផ្តើមក្នុងរយៈពេលមិនដល់១ខែទៀតនោះទេ។

ការស្ទង់មតិនាពេលថ្មីៗនេះ ដែលធ្វើឡើងបន្ទាប់ពីការជជែកដេញដោលដ៏ទន់ខ្សោយរបស់លោក បៃដិន មិនបានបង្ហាញថា លោកស្រី ហារីស ទំនងជាមានការគាំទ្រច្រើនជាងលោក បៃដិន ដើម្បីផ្តួលលោក ត្រាំ ក្នុងខែវិច្ឆិកានោះឡើយ។ ទោះជាបែបនេះក្ដី អ្នកគាំទ្រលោកស្រី ហារីស បានអះអាងថា ការស្ទង់មតិទាំងនោះអាចនឹងផ្លាស់ប្តូរនៅពេលនេះ ខណៈដែលលោក បៃដិន ចាកចេញពីការប្រកួតប្រជែង។

ការស្ទង់មតិរបស់សារព័ត៌មាន Economist/YouGov ដែលបានចេញផ្សាយកាលពីសប្តាហ៍មុន បានរកឃើញថា លោក បៃដិន ចាញ់លោក ត្រាំ ដោយសម្លេង ៤១% ទល់នឹង ៤៣%។ ការស្ទង់មតិដដែលនេះ បានបង្ហាញថា លោកស្រី ហារីស ចាញ់លោក ត្រាំ ក្នុងសម្លេង ៣៩% ទល់នឹង ៤៤%។

ហេតុអ្វីបានជាលោកស្រីស្ថិតនៅក្នុងភាពចម្រូងចម្រាស?

លោកស្រី ហារីស ធ្លាប់បានពណ៌នាខ្លួនលោកស្រីថាជា “រដ្ឋអាជ្ញាដែលគាំទ្រគោលនយោបាយកែទម្រង់” ប៉ុន្តែលោកស្រីជាក់ស្ដែងបានចូលរួមតិចតួចណាស់នៅក្នុងកំណែទម្រង់របស់គណបក្សប្រជាធិបតេយ្យ។

អ្នករិះគន់បានចោទប្រកាន់លោកស្រីថា ពូកែខាងធ្វើនយោបាយចម្រុះទាំងល្អ និងទាំងអាក្រក់ស្របគ្នា។ តួយ៉ាងដូចជា ការជំរុញការអនុវត្តច្បាប់ដ៏ចម្រូងចម្រាសស្តីពីការគេចសាលារបស់សិស្សនៅទីក្រុង San Francisco ខណៈឪពុកម្តាយត្រូវប្រឈមមុខនឹងរងការពិន័យចំពោះ​កូនរបស់ពួកគេដែលមិនបានចូលសាលារៀន។ មួយវិញទៀត ការិយាល័យរបស់លោកស្រីក៏បានទប់ស្កាត់មិនឲ្យមានការដោះលែងអ្នកទោសបន្ថែមទៀត បើទោះបីជាមានការកកកុញយ៉ាងច្រើននៅក្នុងពន្ធនាគាររដ្ឋ California ក៏ដោយ។

ក្នុងនាមជាអគ្គមេធាវីរបស់រដ្ឋ លោកស្រី ហារីស បានឡើងចេញមុខការពារការប្រើប្រាស់ទោសប្រហារជីវិតនៅរដ្ឋ California បើទោះបីជាខ្លួនលោកស្រីផ្ទាល់ធ្លាប់បានប្រឆាំងពីការដាក់ទោសរបៀប​នេះ​ក៏ដោយ។

ទន្ទឹម​នឹង​ការ​មើល​ឃើញ​ថា​ជា​តារា​រះ​ប្រចាំ​បក្ស​ប្រជាធិបតេយ្យ លោកស្រី ហារីស ក៏​បាន​រង​ការ​រិះគន់​មិន​ចេះ​តិច​នោះ​ទេ ដែលថា លោកស្រី​មិន​ទាន់​មាន​​លក្ខណៈ​សម្បត្តិ​គ្រប់គ្រាន់​ដូច​​អ្វី​ដែល​រំពឹង​ទុក។ ក្រុម​អ្នក​រិះគន់ ថា លោកស្រី​នៅ​ខ្វះ​អំណាច​ដើម្បី​ទប់​ស្កាត់​មតិ​ប្រឆាំង​នៅ​ក្នុង​គណបក្ស​របស់​លោកស្រី៕

ដោយ៖ ឈាង