UN ព្រមានថា វដ្តទឹករបស់ពិភពលោកកាន់តែមិនទៀងទាត់

អង្គការសហប្រជាជាតិ បាននិយាយថា ទឹកជំនន់និងគ្រោះរាំងស្ងួតកាន់តែខ្លាំងឡើងគឺជា «សញ្ញាទុក្ខព្រួយ» ខណៈពេលដែលការប្រែប្រួលអាកាសធាតុធ្វើឱ្យវដ្តទឹករបស់ភពផែនដីកាន់តែមិនអាចទាយទុកជាមុនបាន។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី៨ខែកញ្ញានេះ។

អង្គការឧតុនិយមពិភពលោករបស់អង្គការសហប្រជាជាតិ បាននិយាយនៅក្នុងរបាយការណ៍មួយថា កាលពីឆ្នាំមុនទន្លេនានានៅលើពិភពលោកគឺស្ងួតជាងគេបំផុតក្នុងរយៈពេលជាង៣០ឆ្នាំ ខណៈផ្ទាំងទឹកកកបានទទួលរងការរលាយបាត់បង់ដ៏ធំបំផុតក្នុងរយៈពេលកន្លះសតវត្សមកនេះ ហើយក៏មានចំនួនដ៏ច្រើននៃទឹកជំនន់ផងដែរ។

អគ្គលេខាធិការ WMO លោកស្រី Celeste Saulo បាននិយាយនៅក្នុងសេចក្តីថ្លែងការណ៍មួយអមជាមួយរបាយការណ៍រដ្ឋនៃធនធានទឹកសកលថា៖«យើងទទួលបានសញ្ញាទុក្ខព្រួយពីភ្លៀងធ្លាក់ខ្លាំងកាន់តែខ្លាំងឡើង ទឹកជំនន់ និងគ្រោះរាំងស្ងួត ដែលបណ្តាលឱ្យមានប៉ះពាល់ធ្ងន់ធ្ងរដល់អាយុជីវិតមនុស្ស ប្រព័ន្ធអេកូឡូស៊ី និងសេដ្ឋកិច្ច»។

លោកស្រីបន្ថែមថា ការឡើងកំដៅនៃបរិយាកាសផែនដីបានធ្វើឱ្យវដ្តទឹក«កាន់តែខុសប្រក្រតី និងមិនអាចទាយទុកជាមុនបាន ហើយយើងកំពុងប្រឈមមុខនឹងបញ្ហាកើនឡើងនៃទឹកច្រើនពេក ឬតិចពេក»។

ការប្រែប្រួលជាច្រើនដែលធ្វើឲ្យមានការកត់សម្គាល់ដូចជាផ្ទាំងទឹកកកនៅស្វីសរលាយលើសពីមធ្យមក្នុងឆ្នាំ២០២៤ បន្ទាប់​ពីរដូវ​ក្តៅ។​ កាលពីឆ្នាំមុនមានអាកាសធាតុក្តៅបំផុតក្នុងកំណត់ត្រា ដោយសីតុណ្ហភាព​ឡើងខ្ពស់ និង​អាកាសធាតុស្ងួត​រាលដាល​បាន​បង្ក​ឱ្យ​មាន​គ្រោះរាំងស្ងួត​អូសបន្លាយ​រយៈ​ពេល​យូរ​​ជាង​ធម្មតា​​ ស្របពេលក៏មានទឹកជំនន់ជាច្រើននៅជុំវិញពិភពលោកផងដែរ។

ព្រឹត្តិការណ៍ធ្ងន់ធ្ងរទាំងនេះត្រូវបានជះឥទ្ធិពលមួយផ្នែកដោយលក្ខខណ្ឌអាកាសធាតុដែលកើតឡើងដោយធម្មជាតិ រួមទាំងបាតុភូតអាកាសធាតុ La Nina និង El Nino ប៉ុន្តែក៏មានកាន់តែខ្លាំងឡើងដោយការប្រែប្រួលអាកាសធាតុដែលបង្កឡើងដោយមនុស្សផងដែរ។

លោកស្រី Saulo បាននិយាយថា៖​«បរិយាកាសកាន់តែក្តៅ រក្សាសំណើមកាន់តែច្រើន ដែលអំណោយផលដល់ភ្លៀងធ្លាក់ខ្លាំង ខណៈការហួតកាន់តែលឿន និងការស្ងួតដីធ្វើឱ្យលក្ខខណ្ឌគ្រោះរាំងស្ងួតកាន់តែអាក្រក់ទៅៗ»។

បច្ចុប្បន្ននេះ ប្រជាជនចំនួន ៣.៦ ពាន់លាននាក់មានលទ្ធភាពប្រើប្រាស់ទឹកសាបមិនគ្រប់គ្រាន់យ៉ាងហោចណាស់ម្តងក្នុងមួយខែក្នុងមួយឆ្នាំ ហើយចំនួននេះ​ត្រូវ​បាន​គេ​ព្យាករ​ថា​នឹង​កើន​ឡើង​ដល់​ប្រាំ​ពាន់​លាន​នៅ​ឆ្នាំ២០៥០។ បើយោងតាមអង្គការសហប្រជាជាតិ។

ក្នុង​រយៈពេល​បី​ឆ្នាំ​មក​នេះ ទឹក​ទន្លេ​ជាង៥០ភាគរយ​បានរីង​ស្ងួត​ជាង​ធម្មតា។ យោងតាមទិន្នន័យបឋមសម្រាប់ខែកញ្ញា ឆ្នាំ២០២២ ដល់ខែសីហា ឆ្នាំ២០២៣ បានឱ្យដឹងថា ការកើនឡើងសីតុណ្ហភាពមានន័យថា ផ្ទាំងទឹកកកបានរលាយក្នុងអត្រាដែលមិនធ្លាប់មានពីមុនមក ដោយបាត់បង់ទឹកច្រើនជាង៦០០ជីហ្គាតោន ដែលជាការអង្កេតដ៏អាក្រក់បំផុតក្នុងរយៈពេល៥០ឆ្នាំនៃការសង្កេត ។

ក្រៅពីការទប់ស្កាត់ការបំភាយឧស្ម័នផ្ទះកញ្ចក់ដែលផលិតដោយមនុស្ស ដែលបង្កឱ្យមានការកើន​ឡើងកំដៅពិភពលោក អង្គការសហប្រជាជាតិចង់ឱ្យធនធានទឹកសាបរបស់ពិភពលោកត្រូវបានត្រួតពិនិត្យឱ្យកាន់តែប្រសើរឡើង ដូច្នេះប្រព័ន្ធព្រមានជាមុនអាចកាត់បន្ថយការខូចខាតដល់មនុស្ស និងសត្វព្រៃដែលពឹងផ្អែកលើទឹកដើម្បីរស់រានមានជីវិត៕

អត្ថបទ៖ ប៊ុន សុភាព