បុរស ចិន វ័យ៤១ឆ្នាំ ស្លាប់ដោយសារជំងឺខ្សោយតម្រងនោម  ក្រោយហូបបន្លែ៤មុខ

បុរសម្នាក់មានឈ្មោះ Zhang អាយុ ៤១ ឆ្នាំ មកពី Guangzhou ប្រទេសចិន បានទទួលមរណភាពដោយសារជំងឺខ្សោយតម្រងនោមស្រួចស្រាវកាលពីពេលថ្មីៗនេះ។ អ្វី​ដែល​ធ្វើ​ឲ្យមនុស្ស​ជា​ច្រើន​ភ្ញាក់​ផ្អើល និង​ព្រួយ​បារម្ភ​នោះ គឺ​មូលហេតុ​នៃ​ការ​ស្លាប់​របស់​លោកទាក់​ទង​នឹង​ការ​បរិភោគ​បន្លែ ៤ ប្រភេទ​ច្រើន​ពេក ដែល​ល្អ​ចំពោះ​សុខភាពទៅវិញ។

កូនប្រុសរបស់លោក Zhang បានរៀបរាប់ថា កាលពីជិត ២ ឆ្នាំមុន គាត់បានទៅជួបគ្រូពេទ្យ ដោយសារអស់កម្លាំង និងឈឺសន្លាក់ ហើយត្រូវបានគេរកឃើញថា មានអាស៊ីតអ៊ុយរិកខ្ពស់។ វេជ្ជបណ្ឌិតបានណែនាំគាត់ឲ្យកែសម្រួលរបបអាហារកាត់បន្ថយសាច់និងខ្លាញ់ ហើយបង្កើនបន្លែនិងផ្លែឈើ។ ទោះបីជាយ៉ាងណាក៏ដោយ វាក៏ត្រូវបានគេកត់សម្គាល់ផងដែរថា អាហារមួយចំនួនមានផ្ទុកសមាសធាតុគីមី purines ច្រើន ហើយគួរតែមានកម្រិត។

ក្រោយ​ពី​ត្រឡប់​មក​ផ្ទះ​វិញ លោក Zhang នៅ​តែ​មានអាការដដែល ហើយគាត់ជឿថាសន្ទស្សន៍អាស៊ីតអ៊ុយរិកខ្ពស់មិនមែនជាជំងឺទេ ដូច្នេះគាត់មិនព្រមលេបថ្នាំ ឬទៅមន្ទីរពេទ្យវិញ។ សមាជិក​គ្រួសារ​របស់​គាត់​បាន​ណែនាំ​គាត់​យ៉ាងច្រើន​ឲ្យចាប់ផ្តើម​កែសម្រួល​របប​អាហារ​ និង​ធ្វើ​លំ​ហាត់ប្រាណ​បន្តិច​បន្តួច​។ គាត់ចូលចិត្តញ៉ាំបន្លែ តែគ្រូពេទ្យណែនាំកុំឲ្យញ៉ាំច្រើនពេក ដោយគាត់និយាយថា បន្លែទាំងអស់សុទ្ធតែល្អ ហើយបន្ទាប់ពីញ៉ាំរួច គាត់មានអារម្មណ៍ធូរស្រាល។ យូរៗ ទៅ គាត់ទទួលរងពីការកើនឡើងនៃអ៊ុយក្នុងឈាម និងខ្សោយតម្រងនោមដោយមិនដឹងខ្លួន។

ពីរខែមុនពេលគាត់ស្លាប់ លោក Zhang ស្រាប់តែចុះខ្សោយ ស្រកទម្ងន់យ៉ាងឆាប់រហ័ស ចង្អោរ ហើម និងឈឺសន្លាក់។ រហូត​មក​ដល់​ពេល​ក្រុម​គ្រួសារ​របស់​គាត់​បាន​ដឹង​ថា គាត់​នោម​ចេញ​ឈាម ក្អួត​ខ្លាំង និង​ពិបាក​ដក​ដង្ហើម ទើប​អាច​បង្ខំ​គាត់​ទៅ​មន្ទីរពេទ្យ។ នៅទីបំផុត ទោះជាគ្រូពេទ្យបានព្យាយាមអស់ពីសមត្ថភាពក៏ដោយ ក៏ពួកគេនៅតែមិនអាចជួយសង្គ្រោះបុរសវ័យនេះបានដដែល។ គាត់បានស្លាប់នៅអាយុ ៤១ ឆ្នាំដោយសារជំងឺ uremia ដែលនាំឲ្យមានជំងឺខ្សោយតម្រងនោមស្រួចស្រាវ។

វេជ្ជបណ្ឌិត Wang Yinfeng ដែលព្យាបាលអ្នកជំងឺបានរៀបរាប់ថា ខ្លួនគាត់ស្រាប់តែមានអារម្មណ៍អស់សង្ឃឹមនៅពេលដែលបានឮឈ្មោះបន្លែដែលអ្នកជំងឺតែងតែញ៉ាំជារៀងរាល់ថ្ងៃ។ ទាំងនេះគឺជាបន្លែទាំងអស់ដែលមានផ្ទុកសារធាតុ purines និងប៉ូតាស្យូមច្រើន ខណៈពេលដែលលោក Zhang មានសន្ទស្សន៍អាស៊ីតអ៊ុយរិកខ្ពស់ដោយសារតែជំងឺតម្រងនោមដែលមិនអាចគ្រប់គ្រងបាន អាហារដែលមានផ្ទុកសារធាតុ purines និងប៉ូតាស្យូមច្រើនគឺ គ្មានសម្រាប់មនុស្សក្រុមនេះ។

យោងតាមលោកវេជ្ជបណ្ឌិត Wang អាហារដែលមានសារធាតុ purines នឹងត្រូវបានបំប្លែងទៅជាអាស៊ីតអ៊ុយរិច ដែលបណ្តាលឲ្យមានការប្រមូលផ្តុំនៅក្នុងរាងកាយ។ អ្នកដែលមានជំងឺរលាកសន្លាក់ហ្គោដ ជំងឺតម្រងនោម ឬអាស៊ីតអ៊ុយរិកខ្ពស់នឹងពិបាកក្នុងការលុបបំបាត់អាស៊ីតអ៊ុយរិក ដែលបង្កើនហានិភ័យនៃការឈឺសន្លាក់ និងខូចតម្រងនោម។ ដូចគ្នានេះដែរ នៅពេលដែលមុខងារតម្រងនោមធ្លាក់ចុះ វានឹងពិបាកក្នុងការលុបបំបាត់សារធាតុប៉ូតាស្យូមលើស ដែលនាំឲ្យកើតជំងឺលើសឈាម ចង្វាក់បេះដូងលោតញាប់ និងគាំងបេះដូងភ្លាមៗ។

លើសពីនេះ មនុស្សជាច្រើនតែងតែគិតថា សារធាតុ purines មាននៅក្នុងអាហារសមុទ្រ គ្រឿងស្រវឹង ជាដើម ប៉ុន្តែតាមពិតទៅ បន្លែជាច្រើនក៏សម្បូរទៅដោយសារធាតុនេះផងដែរ។ ដូច្នេះហើយ ទោះបីជារបបអាហារសម្បូរជាតិសរសៃ និងជាតិខ្លាញ់ទាប និងជាតិខាញ់មានសារៈសំខាន់នៅពេលគ្រប់គ្រងជំងឺក៏ដោយ មិនមែនបន្លែទាំងអស់គួរតែត្រូវបានបរិភោគឱ្យបានច្រើននោះទេ។

ក្នុងចំណោមបន្លែទាំងនោះ មានបន្លែ ៤ប្រភេទ ដែលល្អសម្រាប់សុខភាព ប៉ុន្តែលោកវេជ្ជបណ្ឌិត Wang ណែនាំអ្នកដែលមានអាស៊ីតអ៊ុយរិកខ្ពស់ ខ្សោយតម្រងនោម ឬជំងឺតម្រងនោម ឱ្យញ៉ាំតិចតាមតែអាចធ្វើទៅបាន ដូចជា៖ ស្ពៃខ្មៅ, ស្ពៃបៃតង, សណ្តែកបណ្តុះ និងទំពាំងបារាំង។

លើសពីនេះ ផ្សិតក៏ល្អសម្រាប់សុខភាពដែរ ប៉ុន្តែមិនល្អសម្រាប់អ្នកដែលមានជំងឺតម្រងនោម និងមានអាស៊ីតអ៊ុយរិកខ្ពស់។ វាជាការល្អបំផុតក្នុងការគ្រប់គ្រងបរិមាណដែលអ្នកញ៉ាំ និងផ្សំវាជាមួយអាហារដែលមានសុខភាពល្អដើម្បីការពារសុខភាពរបស់អ្នក៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្ថបទ៖ សាង ស្រីល័ក្ខ

ចុចអាន៖យូធូប ចិន ៣រូប បាត់មុខច្រើនឆ្នាំ វិលមកវិញនៅតែជាជើងខ្លាំង