៥ចំណុច ដែលអ្នកមិនគួរបោះបង់ខ្លួនឯងពេលកំពុងមានស្នេហា

ស្នេហា អាចធ្វើឲ្យមនុស្សងប់ងល់ខ្លាំងរហូតធ្វើឲ្យគេភ្លេចពីរបៀបរស់នៅដោយខ្លួនឯង និងបាត់បង់ភាពជាខ្លួនឯងតទៅទៀត ដោយសារតែលះបង់ធំធេងពេកសម្រាប់ស្នេហាមួយ រហូតអាចបង្កឲ្យមានជាការស្តាយក្រោយកើតឡើង ព្រោះស្នេហាមិនអាចស្ថិតស្ថេរបានរហូតនោះទេ។

តើកំឡុងពេលមានស្នេហា គួរធ្វើបែបណា ដើម្បីកុំខ្លួនឯងឈឺចាប់ និងត្រូវបានគ្រប់គ្រងពីដៃគូម្ខាងទៀត?

១.សិទ្ធិក្នុងការសម្រេចចិត្តដោយខ្លួនឯង

ចូរអ្នកកំុបោះបង់ពីគំនិត និងសេរីភាពនៃការជ្រើសរើសរបស់អ្នក ដើម្បីផ្គាប់ចិត្តអ្នកដទៃឲ្យគេសប្បាយចិត្ត ទាំងដែលមិនមែនជាសេចក្តីសុខរបស់ខ្លួនឯង។ តើអ្នកមិនគិតថា នេះជាការលះបង់ធំធេងពេកទេឬ? អ្នកត្រូវប្រយ័ត្នចំពោះដៃគូណាដែលព្យាយាមគ្រប់គ្រងអ្នក ដូចជា ហាមមិនឲ្យស្លៀកសំលៀកបំពាក់បែបនេះ បែបនោះ រិះគន់ពីថ្វីដៃធ្វើម្ហូប ឬ ហាមមិនឲ្យអ្នករាប់អានអ្នកនេះ អ្នកនោះ តើអ្នកចង់បានស្នេហាបែបនេះទេ? អ្នកមានសិទ្ធិសម្រេចចិត្តធ្វើអ្វីមួយដោយខ្លួនឯង ជ្រើសរើសគូស្នេហ៍ណាដែលសមជាមួយអ្នក។

២.រស់ជាខ្លួនឯង

ទោះមានស្នេហាយ៉ាងណា អ្នកមិនត្រូវព្យាយាមផ្លាស់ប្តូរខ្លួនឯង ដើម្បីស្នេហាឡើយ។ ប្រសិនជាគេស្រឡាញ់អ្នពិតប្រាកដ គេនឹងទទួលយកចរិតពិតរបស់អ្នកដោយមិនបាច់កែប្រែអ្វីឡើយ។ ការព្យាយាមផ្លាស់ប្តូរខ្លួនឯង នឹងធ្វើឲ្យបាត់បង់ខ្លួនឯងក្នុងដំណាក់កាលមួយនេះ អញ្ចឹងហើយ អ្នកត្រូវរស់ជាខ្លួនអ្នកពិតប្រាកដ។

៣.កុំបោះបង់ក្តីស្រម៉ៃ និងគោលដៅរបស់អ្នក

កុំបោះបង់ក្តីស្រម៉ៃរបស់ខ្លួន ដើម្បីទំនាក់ទំនងស្នេហា។ បើបុគ្គលនោះដឹងពីគោលបំណង និងក្តីស្រម៉ៃអ្នក ប៉ុន្តែគេហាមឃាត់ ឬ មិនចង់ឲ្យអ្នកដើរតាមក្តីស្រម៉ៃរបស់អ្នក មានន័យថា គេមិនចង់ឲ្យអ្នកពូកែ មានភាពលូតលាស់ជាងគេទេ គេចង់គ្រប់គ្រង និងត្រួតត្រាអ្នកហើយ។ តើអ្នកចង់បានស្នេហាដែលមិនចង់ឲ្យគូស្នេហ៍មានភាពរីកចម្រើនទេ? អ្នកត្រូវដើរតាមក្តីស្រម៉ៃរបស់ខ្លួនជានិច្ច មិនត្រូវបោះបង់វាឡើយ។

៤.កុំបោះបង់មិត្ត ដើម្បីស្នេហា

មិត្តល្អពិបាករកណាស់ អ្នកមិនត្រូវបោះបង់មិត្តដែលស្គាល់គ្នា យល់ចិត្តយល់ថ្លើមគ្នារាប់ឆ្នាំ ដើម្បីតែស្នេហាឡើយ។ ទំនាក់ទំនងស្នេហា អាចមិនស្ថិតស្ថេរដូចមិត្តភាពទេ ដូច្នេះ អ្នកត្រូវថែរក្សាមិត្តភាពឲ្យបានល្អ មិនថា អ្នករវល់ជាមួយគូស្នេហ៍យ៉ាងណា កុំភ្លេចចំណាយពេលជាមួយមិត្តរបស់អ្នកផង។ មានតែមិត្តល្អប៉ុណ្ណោះ ដែលអាចជួយអ្នកពេលជួបបញ្ហា និងក្បែរអ្នកពេលមានទុក្ខលំបាក។ កុំស្រឡាញ់នរណាដែលព្យាយាមបំបែកអ្នកចេញពីមិត្តល្អរបស់អ្នក។

៥.ស្វែងរកសុមង្គលរបស់អ្នក

ហេតុអ្វីបានជាអ្នកទ្រាំស្រឡាញ់មនុស្សដែលមិនអាចផ្តល់សេចក្តីសុខឲ្យអ្នកបាន? នេះក៏ព្រោះតែអ្នកមិនហ៊ានប្រឈមនឹងការពិត ចិត្តអ្នកមិនមានភាពក្លាហាននឹងនៅម្នាក់ឯង ព្រោះអ្នកខ្លាចឯកាពេលគ្មានបុគ្គលនោះ។ អ្នកមិនគួរបន្តឲ្យទំនាក់ទំនងបែបមិនច្បាស់លាស់កើតមានទៀតទេ ធ្វើបែបនេះមានតែអ្នកខាតពេលវេលាទទេៗប៉ុណ្ណោះ។ អ្នកគួរបោះបង់ស្នេហាណាដែលមិនផ្តល់សុភបង្គលដល់អ្នក រួចស្វែងរកសុភមង្គលដោយខ្លួនឯងទើបជារឿងត្រឹមត្រូវ។

គួរបញ្ជាក់ថា ការស្រឡាញ់ខ្លួនឯងពេលមានទំនាក់ទំនងស្នេហា អាចធ្វើឲ្យអ្នករឹងមាំនៅពេលដែលគ្មានគេ ព្រមទាំងអាចស្វែងយល់ពីខ្លួនឯងកាន់តែច្បាស់ថា តើប្រភេទស្នេហាបែបណាដែលអ្នកចង់បាន និងមានសុភមង្គល ព្រោះស្នេហាដែលលះបង់ភាពជាខ្លួនឯង ស្រឡាញ់គេខ្លាំងជាងខ្លួនឯង មិនមែនជាស្នេហាដែលមានសេចក្តីសុខសម្រាប់អ្នកឡើយ៕

ដោយ៖ អុន ស្រីមាន