ព្រឹត្តិការណ៍ដ៏អស្ចារ្យ អាចទស្សនា និងគាំទ្រសិល្បៈបុរាណខ្មែរទាំងអស់គ្នា នៅ “ភូមិអាស៊ាន”

ជាឱកាសក្នុងការអបអរសាទរព្រះរាជាណាចក្រកម្ពុជា ជាម្ចាស់ផ្ទះក្នុងកិច្ចប្រជុំអាស៊ាន ក៏ដូចជាការផ្សព្វផ្សាយ និងរំលឹកនូវរប្បធម៌របស់កម្ពុជាទៅដល់ប្រជាជនខ្មែរ ភ្ញៀវជាតិ និងអន្តរជាតិ ព្រឹត្តការណ៍ “ភូមិអាស៊ាន” នឹងនាំទស្សនិកជនទាំងអស់មកស្គាល់ សិល្បៈបុរាណខ្មែរដែលមាន​ភាពល្បីល្បាញអស្ចារ្យ និងវិសេសវិសាល។

ព្រះរាជាណាចក្រកម្ពុជាជាប្រទេសមួយដែលមានប្រវតិ្តសាស្រ្តដ៏យូរលង់ និងមានភាពសម្បូរបែបច្រើនផ្នែក ជាពិសេសគឺ វិស័យរប្បធម៌ ទំនៀមទម្លាប់ប្រពៃណី សិល្បៈទាំងបុរាណ និងសម័យគ្រប់ទម្រង់។ នៅក្នុងចំណោមសិល្បៈបុរាណខ្មែរជាច្រើន ក្រុមការងារបានអញ្ជើញសិល្បករ និងសិល្បការនីដែល​មានទេពកោសល្យ និងសមត្ថភាពមកសម្ដែងជូនទស្សនិកជន និងភ្ញៀវកិត្តិយសទាំងអស់អាចចូលរួមទស្សនាដោយសេរី។​

នៅក្នុងនោះមាន ចាបុីដងវែង របាំឆៃយុំា ល្ខោនស្រមោលស្បែកធំ និងល្ខោនខោល ដែលនឹងប្រព្រឹត្តិទៅ នៅថ្ងៃសុក្រ​ ទី២៥ ខែវិច្ឆិកា ឆ្នាំ២០២២។ ទស្សនីយភាពដ៏កម្រនេះនឹងកើតមានឡើងនៅ​ “ភូមិអាស៊ាន” រយៈពេលបីថ្ងៃ ចាប់ពីថ្ងៃទី​២៥​ ២៦​ ២៧​ ខែវិច្ឆិកា​ ឆ្នាំ២០២២​ នៅសាកលវិទ្យាល័យ ជាតិគ្រប់គ្រង។

គួរបញ្ជាក់ថា “ភូមិអាស៊ាន” ជាបណ្ដុំវប្បធម៌ និងអាហារពីបណ្ដាប្រទេសអាស៊ាន នៅទីតាំងតែមួយ។ ព្រឹត្តិការណ៍ដ៏ពិសេសនេះ ស្ថិតក្រោមកិច្ចសហការពី ស.ស.យ.ក ខេត្តស្វាយរៀង ក្រសួងការបរទេស និងសហប្រតិបត្តិការអន្តរជាតិ ក្រសួងវប្បធម៌ និងវិចិត្រសិល្បៈ និងស្ថានទូតទាំងអស់របស់សមាជិកអាស៊ានក្នុងប្រទេសកម្ពុជា៕