ព័ត៌មានជាតិ
លោកស្រី ឱ វណ្ណឌីន ថាពលរដ្ឋខ្មែរ និងបរទេសគង់តែទទួលបានវ៉ាក់សាំងគ្រាន់តែមុននិងក្រោយ
លោកស្រី ឱ វណ្ណឌីន រដ្ឋលេខាធិការ អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ១៩ បានឱ្យដឹងថា ការងារចាក់វ៉ាក់សាំងកូវីដ១៩ គឺជាការងារចាំបាច់ និងសំខាន់ ហើយក៏ជាយុទ្ធសាស្ត្រមួយ របស់ប្រមុខដឹកនាំរាជរដ្ឋាភិបាលកម្ពុជា សម្តេចអគ្គមហាសេនាបតីតេជោ ហ៊ុន សែន។
លោកស្រីបន្តថា សម្តេចតេជោ នាយករដ្ឋមន្ត្រី បានខិតខំក្នុងការធ្វើកិច្ចសហប្រតិបត្តិការល្អ ជាមួយថ្នាក់ដឹកនាំផ្សេងទៀត ដើម្បីធ្វើយ៉ាងណាឱ្យព្រះរាជាណាចក្រកម្ពុជារបស់យើងទទួលបានការចាក់វ៉ាក់សាំងមិនគិតថ្លៃ មិនត្រឹមតែប្រជាពលរដ្ឋខ្មែរទេ គឺទាំងជនបរទេសក៏រាជរដ្ឋាភិបាលគិតគូដែរឱ្យទទួលវ៉ាក់សាំងដែរ គ្រាន់តែថាទទួលមុននិងក្រោយតែប៉ុណ្ណោះ ដោយសារវ៉ាក់សាំងមកតាមកម្រិតៗ ដូច្នេះយើងត្រូវធ្វើការបែងចែកទៅតាមក្រុមគោលដៅ ដែលត្រូវទទួលមុន ហើយនិងក្រុមណាដែលត្រូវទទួលជាបន្តបន្ទាប់។
លោកស្រី ឱ វណ្ណឌីន ថ្លែងក្នុងពិធីទទួលសម្ភារប្រើប្រាស់សម្រាប់បម្រើការងារចាក់វ៉ាក់សាំងពីក្រុមវិនិយោគទុនបរទេស និងសប្បុរសជនចំនួន១៤ នៅថ្ងៃទី១៣ ខែមេសា នៅក្រសួងសុខាភិបាល ដោយមានការសម្របសម្រួលដោយលោក លី ធុជ ទេសរដ្ឋមន្រ្តីទទួលបន្ទុកបេសកកម្មពិសេស តាមរយៈ លោក Anthony Galliano ប្រធានសភាពាណិជ្ជកម្មអាមេរិកកាំងប្រចាំកម្ពុជា។
សម្ភារដែលត្រូវប្រគល់ជូនដល់គណៈកម្មការចំពោះកិច្ចចាក់វ៉ាក់សាំងកូវីដ១៩នោះ រួមមាន រថយន្តដឹកវ៉ាក់សាំង ០២គ្រឿង ដែលនឹងមកដល់កម្ពុជាក្នុងខែឧសភា ឆ្នាំ២០២១, កុំព្យូទ័រយូរដៃ, ម៉ាស៊ីន Printer, សម្លៀកបំពាក់ពេទ្យ(PPE), ម៉ាស់ និងសម្ភារផ្សេងៗដទៃទៀតសរុបថវិកាប្រមាណ ៣០ ម៉ឺនដុល្លារអាមេរិក។
លោកស្រី ឱ វណ្ណឌីន ថ្លែងថាសម្ភារ និងរបស់របរប្រើប្រាស់ទាំងនេះ គឺសុទ្ធសឹងតែជាសម្ភារដែល មានតម្រូវការចាំបាច់ សម្រាប់ក្រុមការងារគ្រូពេទ្យដែលកំពុងតែបម្រើការចាក់វ៉ាក់សាំងទៅតាមទីតាំងផ្សេងៗនៅទូទាំងព្រះរាជាណចក្រកម្ពុជា។
អំណោយទាំងនេះ មានដូចជា រថយន្តដឹកវ៉ាក់សាំង ២គ្រឿង ហើយពិធីទទួលរថយន្តទី១នឹងធ្វើឡើងនៅថ្ងៃទី ១៦ ខែមេសា ឆ្នាំ ២០២១ ហើយរថយន្តទី២ និងមកដល់នៅពាក់កណ្តាល ខែឧសភាក្រោយ។
លោកស្រីថា រថយន្តដឹកវ៉ាក់សាំង២គ្រឿងនេះ នឹងចូលរួមចំណែកបន្ថែម ទៅដល់កិច្ចការនៃការចាក់វ៉ាក់សាំងជូនដល់ បងប្អូនប្រជាពលរដ្ឋដែលត្រូវដឹកជញ្ជូនទៅតាមខេត្តផងដែរ ហើយបន្ថែមពីនេះ មានក្រុមហ៊ុនមួយចំនួនទៀត ដែលផ្តល់ជូនដូចជាកុំព្យូទ័រយួរដៃ ម៉ាស៊ីនព្រីន និងសម្ភារមួយចំនួនទៀត មានម៉ាស ទឹកអាកុលជាដើម។ លោកស្រីថា សម្ភារទាំងនេះ បង្ហាញពីសណ្តានចិត្តរបស់ក្រុមអ្នកវិនិយោគទុនទាំងនេះ។
លោកស្រី ឱ វណ្ណឌីន ថ្លែងឱ្យដឹងទៀតថា ទឹកចិត្តរបស់ក្រុមហ៊ុនវិនិយោគទុន បានបង្ហាញយ៉ាងច្បាស់ពីការដឹកនាំយ៉ាងត្រឹមត្រូវរបស់សម្តេចតេជោ ហ៊ុន សែន គឺមិនថាតែប្រជាជនកម្ពុជាទេ គឺទាំងជនបរទេស និងអ្នកវិនិយោគកម្ពុជាបានរួមសាមគ្គីគ្នា ដើម្បីជួយជ្រោមជ្រែង ទៅដល់ការអនុវត្តវិធានការឆ្លើយតបជំងឺកូវីដ១៩ ដែលកំពុងស្ថិតក្នុងក្តីបារម្ភនាពេលបច្ចុប្បន្ននេះ។
ក្រៅពីនេះ លោកស្រី ឱ វណ្ណឌីន បានថ្លែងឱ្យដឹងទៀតថា ប្រទេសនៅលើសកលលោក មិនមានប្រទេសច្រើនទេ ដែលបានគិតគូក្នុងការផ្តល់វ៉ាក់សាំងទៅដល់ជនបរទេស ដូច្នេះព្រះរាជាណាចក្រកម្ពុជា ជាប្រទេសទី១ក្នុងចំណោមប្រទេសមួយចំនួនទៀត ដែលបានផ្តល់លទ្ធភាពទៅដល់ជនបរទេសបានចាក់វ៉ាក់សាំងកូវីដ១៩៕
អត្ថបទ៖ ឡេង ដេត
-
កីឡា១ សប្តាហ៍ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៦ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ២ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ៧ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៦ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៧ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ១ សប្តាហ៍ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង
-
ព័ត៌មានជាតិ៥ ថ្ងៃ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?