គណបក្សមួយ​ប្រាប់ឲ្យប្រជាពលរដ្ឋ​​ជួយសម្តេច ហ៊ុន សែន ដោយអនុវត្ត​វិធានការ​សុខាភិបាល​​ឱ្យបានខ្ជាប់ខ្ជួន

គណបក្សប្រជាធិបតេយ្យមូលដ្ឋាន​ នៅថ្ងៃទី២១ ខែមេសា នេះ ​បាន​ប្រាប់ឲ្យប្រជាពលរដ្ឋចូលរួម​​​ជួយសម្តេចអគ្គមហាសេនាបតីតេជោ ហ៊ុន សែន តាមរយៈ​ការអនុវត្ត​វិធានការ​សុខាភិ​បាល​​ ដោយប្រតិបត្តិ ៣កុំ និង ៣​ការពារ និងគោរពតាមវិធានការបិទខ្ទប់ របស់រាជរដ្ឋាភិបាល​ ដែលបាន​ដាក់ចេញ ដើម្បី​ទប់ស្កាត់ការរីករាលដាលនៃជំងឺកូវីដ១៩។​

គណបក្សប្រជាធិបតេយ្យមូលដ្ឋានបញ្ជាក់យ៉ាងដូច្នេះថា “​​នៅ​ពេល​ប្រទេសជាតិស្ថិតក្នុងគ្រាអាសន្ន យើងគួរនាំគ្នាជួយគាត់ (សម្តេច ហ៊ុន សែន) ដោយប្រតិបត្តិ ៣កុំ + ៣ការពារ និងគោរពតាមវិធានការបិទខ្ទប់ ពីព្រោះពេលនេះ​ គាត់មានភារកិច្ចដឹកនាំប្រទេស ហើយកំពុងខំប្រឹងធ្វើការយ៉ាងខ្លាំង។ ជារឿងសំខាន់ និងចាំបាច់ណាស់ ដែលខ្មែរមាននិន្នាការនយោបាយផ្សេងគ្នា តែចេះពួតដៃគ្នាប្រយុទ្ធ នឹងសត្រូវរួម ពេលស្រុកទេសមានអាសន្ន”។

ជាមួយនឹងការលើកឡើង​ខាង​លើ​នេះ គណបក្សប្រជាធិបតេយ្យមូលដ្ឋាន​ បាន​អះអាងថា នឹង​បន្តតាមដានឃ្លាំមើល​របៀប​ចាត់​ចែង​គ្រប់​គ្រងគ្រោះអាសន្ន​របស់សម្តេចតេជោ ហ៊ុន សែន ​ និងធ្វើការទិតៀនក្នុងបំណងស្ថាបនា នូវចំណុចខ្វះចន្លោះទាំងឡាយ ដើម្បីជាប្រយោជន៍រួមដល់ខ្មែរទាំងអស់ ហើយក្រោយ​ចប់​គ្រោះ​អាសន្ននេះ នឹងបន្ត​ធ្វើការប្រកួតប្រជែង​នយោបាយ ​តាម​​គោល​ការណ៍ប្រជាធិបតេយ្យ សេរីពហុបក្ស ត​ទៅ​ទៀត។​

សូមបញ្ជាក់ថា នៅថ្ងៃទី២១ ខែមេសា នេះ ក្រសួងសុខាភិបាល បានប្រកាស​រកឃើញអ្នកឆ្លងថ្មីចំនួន៣០៣ នាក់​ (ជាករណីឆ្លងសហគមន៍ទាំង​៣០៣នាក់) និងជាសះស្បើយចំនួន​២៣៩នាក់។ ក្នុងនោះ ភ្នំពេញ ចំនួន២៤៨ នាក់, កណ្ដាលចំនួន២៦ នាក់, ព្រះសីហនុ ចំនួន១៩ នាក់,  តាកែវ ចំនួន​៨ នាក់ និងកំពត ចំនួន ២ នាក់។

គិតត្រឹមព្រឹក ថ្ងៃទី២១ ខែមេសា ឆ្នាំ២០២១ នេះ ប្រទេសកម្ពុជា​មានឆ្លងសរុប​ ៧៧៤៧ នាក់, ​ជាសះស្បើយ​ ២៧៩៤ នាក់, ​កំពុងព្យាបាល​ ៤៨៩៣ នាក់ និងមានអ្នកស្លាប់ចំនួន ៥៤ នាក់៕

អត្ថបទ៖ កោះកែវ