បក្សប្រជាធិបតេយ្យមូលដ្ឋាន ជ្រើសក្បាលម៉ាស៊ីនថ្មី ដោយលោក យ៉េង វីរៈ ដកខ្លួនចេញពីប្រធានបក្ស

គណបក្សប្រជាធិបតេយ្យមូលដ្ឋាន បានសម្រេចជ្រើសរើសក្បាលម៉ាស៊ីនដឹកនាំថ្មី ដោយលោក សេក សុខា ត្រូវបានជ្រើសរើសឱ្យកាន់តួនាទីជាប្រធានបក្ស ជំនួសប្រធានចាស់ គឺលោក យ៉េង វីរៈ។

ការរុះរើក្បាលម៉ាស៊ីនដឹកនាំថ្មីរបស់គណបក្សប្រជាធិបតេយ្យមូលដ្ឋានពេលនេះ គឺធ្វើឡើងតាមរយៈសមាជ នៅថ្ងៃទី៧ ខែមេសា ឆ្នាំ២០២៤នេះ បន្ទាប់ពីប្រធានគណៈកម្មាធិការទាំង៣ របស់គណបក្សនេះបានផុតអាណត្តិ។ សេចក្ដីប្រកាសនៅលើបណ្ដាញហ្វេសប៊ុកផ្លូវការរបស់គណបក្សប្រជាធិបតេយ្យមូលដ្ឋាន បានឱ្យដឹងដូច្នេះថា៖ «នៅថ្ងៃទី៧ ខែមេសា ឆ្នាំ២០២៤នេះ គណបក្សប្រជាធិបតេយ្យមូលដ្ឋាន បានរៀបចំសមាជបោះឆ្នោតជ្រើសរើសថ្នាក់ដឹកនាំថ្មីរបស់គណបក្ស បន្ទាប់ពីប្រធានគណៈកម្មាធិការទាំងបីរបស់គណបក្សបានផុតអាណត្តិ»។

តាមរយៈការបោះឆ្នោតដោយសំងាត់ គឺអង្គសមាជនេះ បានសម្រេចបោះឆ្នោតជ្រើសរើសលោក សេក សុខា ឱ្យធ្វើជាប្រធានប្រតិបត្តិគណបក្សប្រជាធិបតេយ្យមូលដ្ឋាន លោក មាន អ៊ាង ធ្វើជាប្រធានគណៈកម្មាធិការនាយក និងលោក ធួក បូណា ជាប្រធានគណៈកម្មាធិការដោះស្រាយវិវាទ និងវិន័យ ជំនួសលោកស្រី ប្រុក វ៉ាន្នី។

ការជ្រើសរើសក្បាលម៉ាស៊ីនដឹកនាំថ្មីនេះ ត្រូវបានគណបក្សប្រជាធិបតេយ្យមូលដ្ឋាន អះអាងថា ធ្វើឡើងតាមលក្ខន្តិកៈរបស់គណបក្សដែលគណៈកម្មាធិការនីមួយៗ ត្រូវបានកំណត់អាណត្តិដឹកនាំបានត្រឹម ២អាណត្តិ ពោល គឺរយៈពេលយ៉ាងយូរ១០ឆ្នាំប៉ុណ្ណោះ។

គួរជម្រាបដែរថា កន្លងទៅ អតីតក្បាលម៉ាស៊ីនសំខាន់ៗមួយចំនួនរបស់បក្សប្រជាធិបតេយ្យ ដូចជា លោក យ៉ង សាំងកុមារ លោក សាម អ៊ីន និងលោក ឡឹក សុធា ជាដើម បានសម្រេចចិត្តដើរចេញពីបក្សនេះជាបន្តបន្ទាប់ ដោយមកចុះចូលជាមួយគណបក្សកាន់អំណាច គឺគណបក្សប្រជាជនកម្ពុជា៕