ព័ត៌មានជាតិ

សមាជិកគ្រួសារស្លាប់ដោយជំងឺកូវីដ-១៩ ចំនួន០៤គ្រួសារ ក្នុងស្រុកសំរោងទទួលថវិកាសម្តេចតេជោ

បានផុស

៣ ខែ មុន

នៅ

ថ្ងៃសុក្រ ២៥ មិថុនា ២០២១

ដោយ

ថវិការបស់ប្រមុខរាជរដ្ឋាភិបាលកម្ពុជាសម្តេចតេជោ ២០លានរៀល ត្រូវបានលោក អ៊ូច ភា អភិបាលនៃគណៈអភិបាលខេត្តតាកែវ យកមកប្រគល់ជូនក្រុមគ្រួសារ ដែលមានសមាជិកអ្នកស្លាប់ដោយសារជំងឺកូវីដ១៩ ចំនួន ០៤គ្រួសារ ក្នុងស្រុកសំរោង កាលរសៀលទី២៤ ខែមិថុនា ឆ្នាំ២០២១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មានប្រសាសន៍សំណេះសំណាលនាឱកាសនោះដែរលោកអភិបាលខេត្ត ក៏នាំយកនូវបណ្ដាំរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ចូលរួមរំលែកទុក្ខ ដ៏សែនក្រៀមក្រំជាមួយក្រុមគ្រួសារសាច់ញាតិនៃសព សម្ដែងការសោកស្តាយជាពន់ពេក ចំពោះការបាត់បង់សមាជិកគ្រួសារនីមួយៗ ដោយសារ មេរោគកូវីដ-១៩ចង្រៃនេះ ដែលកំពុងរាតត្បាត ពាសពេញសកលលោកយើងនេះ និងសូមបួងសួងសូមឲ្យវិញ្ញាណក្ខន្ធរបស់ពួកគាត់ បានទៅកាន់ឋានសុគតិភពផងដែរ។

ឆ្លៀតក្នុងឱកាសនោះផងដែរលោក អ៊ូច ភា ក៏បានធ្វើការណែនាំដាស់តឿន ដល់បងប្អូន ប្រជាពលរដ្ឋទាំងអស់ សូមបន្តអនុវត្តវិធានការការពារខ្លួន តាមការណែនាំរបស់ ក្រសួងសុខាភិបាល ព្រមទាំងអនុវត្តវិធាន ៣ការពារ និង៣កុំ ឲ្យបានខ្ជាប់ខ្ជួនត្រឹមត្រូវបន្តទៀត ដើម្បីចូលរួមទាំងអស់គ្នាក្នុងការទប់ស្តាត់ការរីករាលដាលនៃជំងឺកូវីដ-១៩ កុំឲ្យកើតមានឡើងបន្តទៀត។

សូមបញ្ជាក់ដែរថា ចំពោះថវិការបស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា យកមកផ្ដល់ជូនក្រុមគ្រួសារ ដែលមានសមាជិកអ្នកស្លាប់ដោយសារជំងឺកូវីដ-១៩ នៅក្នុងស្រុកសំរោង មានចំនួន ០៤គ្រួសារ ដោយក្នុងមួយគ្រួសារៗ ទទួលបានថវិកា ៥,០០០,០០០រៀល៕

អត្ថបទ៖ វីរៈ