ស្ថានទូតកំពុងស្រាវជ្រាវ លើព័ត៌មានថា មានការសាងសង់ប្រាសាទអង្គរវត្តទី២ នៅលើទឹកដីថៃ

លោក កុយ គួង រដ្ឋលេខាធិការ និងជាអ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជាបានថ្លែងប្រាប់ “កម្ពុជាថ្មី” នារសសៀលថ្ងៃទី០៦ ខែកក្កដា ឆ្នាំ២០២១នេះថា មកដល់ពេលនេះស្ថានទូតកម្ពុជាប្រចាំនៅប្រទេសថៃបាន និងកំពុងសិក្សាស្រាវជ្រាវលើករណីដែលថា មានការសាងសង់ប្រាសាទអង្គរវត្ត ដូចប្រាសាទអង្គរវត្តរបស់កម្ពុជានៅលើទឹកដីប្រទេសថៃ។

បើតាមលោក កុយ គួង ការសាងសង់ប្រាសាទ ដូចប្រាសាទអង្គរវត្តរបស់កម្ពុជា នៅលើទឹកដីប្រទេសថៃនោះ គឺស្ថិតនៅក្នុងខេត្តបូរីរ៉ាំ តែក្រសួងមិនទាន់មានកំណត់ទូត ដើម្បីធ្វើការតវ៉ានោះទេ រង់ចាំស្ថានទូតធ្វើការស្រាវជ្រាវច្បាស់លាស់​សិន។

សូមបញ្ជាក់ថា ថ្មីៗនេះមានការផ្សព្វផ្សាយនៅក្នុងបណ្ដាញសង្គមហ្វេសប៊ុកថា មានការសាងសង់ប្រាសាទ ដូចប្រាសាទអង្គរវត្តរបស់កម្ពុជា នៅឯវត្តភូម៉ានហ្វា ក្នុងខេត្តបុរីរ៉ាំ ប្រទេសថៃ ហើយក៏មានការបង្ហាញគំរូប្លង់ផងដែរ។ ព័ត៌មាននេះធ្វើឱ្យមានប្រតិកម្មយ៉ាងខ្លាំងពីមហាជន ជាពិសេសប្រជាពលរដ្ឋខ្មែរ ហើយក្រោយពីមានព័ត៌មាននេះ រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកស្រី ភឿង សកុណា បានអះអាងថា ក្រសួងនឹងទាក់ទងទៅស្ថានឯកអគ្គរាជទូតកម្ពុជាប្រចាំនៅប្រទេសថៃ ដើម្បីស្រាវជ្រាវឱ្យបានច្បាស់លាស់លើករណីនេះ។

បើតាមព័ត៌មានផ្សេងៗបានឱ្យដឹងថា គម្រោងសាងសង់ប្រាសាទ ដូចប្រាសាទអង្គរវត្តរបស់កម្ពុជានេះ បានធ្វើឡើងបន្ទាប់ពីបញ្ចប់ការសាងសង់ប្រាសាទនានានោះក្នុងវត្តនោះ ហើយគម្រោងសាងសង់ប្រាសាទអង្គរវត្តទី២ ឬប្រាសាទ ដែលគេប្រសិទ្ធនាមថា ប្រាសាទសីហនគរ (ปราสาทสีหนคร) គ្រោងនឹងសាងសង់បញ្ចប់រយៈពេល៧ឆ្នាំទៅ៨ឆ្នាំ៕

អត្ថបទ៖ កោះកែវ