ព័ត៌មានជាតិ
លោក កុយ គួង ខំធ្វើការតាំងពីមន្ត្រីធម្មតារហូតក្លាយជាមន្ត្រីជាន់ខ្ពស់ក្រសួងការបរទេសកម្ពុជា
លោក កុយ គួង បច្ចុប្បន្នកំពុងកាន់តំណែងជារដ្ឋលេខាធិការក្រសួងការបរទេស និងសហប្រតិបត្តិការអន្តរជាតិកម្ពុជា។ លោក កើតថ្ងៃទី៣១ ខែធ្នូ ឆ្នាំ១៩៧៣ នៅខេត្តកណ្ដាល។ សម្រាប់កម្រិតវប្បធម៌ គឺលោក កុយ គួង បញ្ចប់សញ្ញាបត្រថ្នាក់បរិញ្ញាបត្រជាន់ខ្ពស់នៅសាកលវិទ្យាល័យជាតិអូស្ត្រាលីផ្នែករដ្ឋបាលអភិវឌ្ឍន៍ អំឡុងឆ្នាំ២០០២ បន្ទាប់ពីលោកបានទទួលវិញ្ញាបនបត្របញ្ជាក់ការសិក្សាផ្នែករដ្ឋបាលអភិវឌ្ឍន៍ ឆ្នាំ២០០១។ លោកក៏ជាអតីតនិស្សិតថ្នាក់បរិញ្ញាបត្រច្បាប់នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច រាជធានីភ្នំពេញ ឆ្នាំ១៩៩៨ ផងដែរ។ ក្រៅពីភាសាខ្មែរដែលជាភាសាកំណើត លោក កុយ គួង ចេះភាសាអង់គ្លេស និងបារាំង។
បើនិយាយអំពីការងារវិញ ដំបូងឡើយលោក កុយ គួង ផ្ដើមបម្រើការជាមន្ត្រីរាជការនៅក្រសួងកសិកម្ម រុក្ខាប្រមាញ់ និងនេសាទ ដែលបានធ្វើការងារប្រមាណជិត១ឆ្នាំប៉ុណ្ណោះ ពោល គឺនៅឆ្នាំ១៩៩៩ លោកបានផ្លាស់ទៅបម្រើការងារនៅអគ្គលេខាធិការដ្ឋានព្រឹទ្ធសភាវិញ។ រហូតដល់ឆ្នាំ២០០៨ លោកត្រូវបានតែងតាំងជាប្រធានការិយាល័យច្បាប់ព្រហ្មទណ្ឌ និងរដ្ឋប្បវេណីនៃអគ្គលេខាធិការដ្ឋានព្រឹទ្ធសភា។
នៅអំឡុងឆ្នាំ២០០៨ លោក កុយ គួង ត្រូវបានចាត់តាំងឲ្យមកបម្រើការងារក្នុងវិស័យការបរទេសក្នុងមុខតំណែងជាអនុរដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ និងមានភារកិច្ចជាអ្នកនាំពាក្យរបស់ក្រសួង។ រហូតដល់ឆ្នាំ២០១៥ លោកក៏ទទួលបានភារកិច្ចថ្មីមួយទៀត ជាឯកអគ្គរាជទូតកម្ពុជាប្រចាំនៅប្រទេសអូស្ត្រាលី ដែលជាប្រទេស លោកធ្លាប់បានទៅសិក្សានៅទីនោះ។
ក្នុងនាមជាឯកអគ្គរាជទូតកម្ពុជាប្រចាំនៅអូស្ត្រាលី លោក កុយ គួង បានខិតខំបំពេញការងារយ៉ាងសកម្ម ដើម្បីពង្រឹង និងពង្រីកទំនាក់ទំនងរវាងប្រទេសទាំងពីរ កម្ពុជា-អូស្ត្រាលី ដែលបានធ្វើឲ្យទំនាក់ទំនងការទូតនៃប្រទេសទាំងពីរកាន់តែមានភាពល្អប្រសើរ។ ជាមួយគ្នានោះ លោក ក៏តែងតែជួបប្រាស្រ័យទាក់ទងយ៉ាងជិតស្និទ្ធជាមួយប្រជាពលរដ្ឋខ្មែរដែលកំពុងរស់នៅ និងរៀនសូត្រនៅប្រទេសអូស្ត្រាលី។ នៅអំឡុងខែកក្កដា ឆ្នាំ២០១៩ លោកបានចប់អាណត្តិការងារនៅអូស្ត្រាលី ហើយបានវិលមកប្រទេសកម្ពុជាវិញ ដោយទទួលតំណែងចាស់របស់លោកវិញ ជាអនុរដ្ឋលេខាធិការ និងជាអ្នកនាំពាក្យក្រសួងការបរទេស។ លុះនៅចុងឆ្នាំ២០២០ លោកត្រូវបានដំឡើងមុខតំណែងជារដ្ឋលេខាធិការក្រសួងការបរទេស រហូតដល់បច្ចុប្បន្ននេះ៕
ដោយ៖ ធឿន វ៉ាន់សុង
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សន្តិសុខសង្គម៧ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ១ សប្តាហ៍ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៤ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ៦ ថ្ងៃ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង