ល្មើសបំរាមជួបជុំគ្នា​ យកទៅធ្វើសំណាក តេស្ត​មានវិជ្ជមាន​កូវីដ​-១៩

ខេត្តបន្ទាយមានជ័យ៖ សមត្ថកិច្ចឃាត់ខ្លួនមនុស្ស៣៨នាក់ល្មើសបំរាមយកទៅធ្វើសំណាក
លទ្ធផល​​​មានវិជ្ជមានកូវីដ-១៩ចំនួន ១ នាក់។

លោក ហ៊ឹល រ៉ាយ៉ា ប្រធានគណបញ្ជាការឯកភាពក្រុងសិរីសោភ័ណ រួមនឹងកងកម្លាំងនគរបាលអាវុធហត្ថ កម្លាំងតំបន់ប្រតិបត្តិការសឹករងបន្ទាយមានជ័យបានប្រាប់ឲ្យដឹងថា ការឃាត់ខ្លួនមនុស្ស៣៨នាក់ ដោយសារ​ល្មើសបំរាម មានការ​ប្រមូលផ្តុំ​ជួបជុំផ្សេងៗនៅក្នុងភូមិសាស្រ្តក្រុង ផ្ទុយ​គោលការណ៍​ណែនាំ​ពី​ការ​ចូលរួមទប់ស្កាត់ការឆ្លងរាលដាលជំងឺកូវីដ-១៩ ក្នុងសហគមន៍ ពិសេសវីរុសបំប្លែងថ្មី Delta។

លោក​បញ្ជាក់ថា ក្នុងការចុះអនុវត្តជាក់ស្ដែង គណៈបញ្ជាការឯកក្រុងសិរីសោភ័ណ បានធ្វើការប្រមូលអ្នកដែលល្មើស នឹងបម្រាមសុខាភិបាល មានចំនួន៧ទីតាំង នៅក្នុងសង្កាត់ព្រះពន្លា, សង្កាត់អូរអំបិល និងសង្កាត់កំពង់ស្វាយ ឃាត់ខ្លួន​មនុស្ស​បានចំនួន៣៨នាក់ដើម្បីយកទៅធ្វើសំណាក មុនធ្វើការផាកពិន័យតាមច្បាប់។ ជាលទ្ធផលវិជ្ជមានកូវីដ-១៩ម្នាក់។

លោកក៏បានអំពាវនាវដល់ពលរដ្ឋ សូមចូលរួមអនុវត្តនៅវិធានការសុខាភិបាល និងវិធានការរាជរដ្ឋាភិបាល ផ្តោតសំខាន់ មិនឲ្យមានសកម្មភាពនៃការជួបជុំផ្សេងៗ ដូចជាការជួបជុំផឹកស៊ី, លែងល្បែងស៊ីសង, សកម្មភាពលេងកីឡា, មានលក្ខណៈប្រមូលផ្តុំដែលល្មើសនឹងវិធានការសុខាភិបាល គឺអាជ្ញាធរអនុវត្តដោយគ្មានការលើកលែង។ ពិសេសចំពោះអ្នកដែលមិនពាក់ម៉ាស់ មិនគោរពតាមវិធានការសុខាភិបាល នឹងត្រូវមានការផាកពិន័យតាមច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត៕

អត្ថបទ៖ វ៉ាន់ ណាង