ស្រាវជ្រាវ​ឃើញមនុស្ស ៤៤ នាក់ ជាប់ពាក់ព័ន្ធ​ ស្រ្តី​ឈ្មោះ អៀម ធីតា តេស្ត​មាន​កូវីដ ១៩

ភ្នំពេញ៖ប្រធានមន្ទីរសុខាភិបាលខេត្តកណ្តាលមានប្រសាសន៍ថា គិតត្រឹមព្រឹកថ្ងៃទី៩ខែធ្នូឆ្នាំ២០២០នេះ រកឃើញ​អ្នកជាប់ពាក់ព័ន្ធទៅនឹងស្រ្តី​ឈ្មោះ អៀម ធីតា ដែ​ល​បាន​ឆ្លងកូវីដ១៩ មាន​ចំនួន ៤៤ នាក់។

លោកវេជ្ជបណ្ឌិត គួយ ប៊ុនធឿន ប្រធានមន្ទីរសុខាភិបាលខេត្តកណ្តាលបានឲ្យដឹងថា អ្នកពាក់ព័ន្ធទាំង៤៤នាក់នេះមន្ត្រី​បាន​យកវត្ថុសំណាកទៅធ្វើតេស្តនៅវិទ្យាស្ថានប៉ាស្ទ័រកម្ពុជា និងកំពុងធ្វើចត្តាឡីស័កនៅពេទ្យជ័យជំនះក្រុងតាខ្មៅនៅ​សាលាបឋមសិក្សាព្រែកតាពៅ និងធ្វើចត្តាឡីនៅមន្ទីរពេទ្យបង្អែកស្រុកកណ្តាលស្ទឹង។

លោកបន្តទៀតថា ចំណែកមនុស្ស ០២ នាក់ ដែល​មាន​លំនៅ​នៅ​ក្រុង​តាខ្មៅ ដែលក្រសួង​បានប្រកាស​រកឃើញ​នៅ​ព្រឹកនេះ​ មន្ទីរក៏​បាន​ស្រាវជ្រាវ​រក​អ្នក​ពាក់ព័ន្ធ​បាន​ចំនួន២៣នាក់មកធ្វើចត្តាឡីស័កនិងយកវត្ថុសំណាកទៅធ្វើតេស្ត​រក​កូវីដ​១៩​ ផងដែរ។

អាជ្ញាធរខេត្តកណ្តាល បាន​សម្រេច​ការផ្អាកដំណើរការផ្សារបឹងខ្យាង និងវត្តវិហារត្រាញ់ ក្នុងស្រុកកណ្តាលស្ទឹង ខេត្តកណ្តាល ជាបណ្តោះអាសន្ន ដើម្បីធ្វើការស្រាវជ្រាវរកអ្នកពាក់ព័ន្ធនឹងក្រុមគ្រួសាររបស់លោកស្រី អៀម ធីតា ដែលមានលទ្ធផលវិជ្ជមានវីរុសកូវីដ-១៩។ ស្រ្តី​រូប​នេះ​ដែលមានលំនៅ​នៅសង្កាត់បឹងទំពន់ ខណ្ឌមានជ័យ រាជធានីភ្នំពេញ បានទៅលេងម្ដាយនៅស្រុកកណ្ដាលស្ទឹង មុន​តេស្ត​ឃើញ​វីជ្ជមានកូវីដ ១៩៕

អត្ថបទ៖ សំអឿន