នាយករដ្ឋមន្ត្រី ឲ្យម្ចាស់រថយន្តជ្រកក្រោមផ្លាកលេខផ្សេងៗ ដែលគ្មានពន្ធរួសរាន់ទៅបង់ពន្ធជូនរដ្ឋ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអំពាវនាវជាថ្មីម្ដងទៀត ឲ្យម្ចាស់រថយន្តជ្រកក្រោ​មផ្លាកលេខផ្សេងៗ ដែលគ្មានពន្ធប្រមាណជា ៥ពាន់គ្រឿង ត្រូវរូសរាន់ទៅបង់ពន្ធជូនរដ្ឋ បើមិនដូច្នេះទេ នឹងត្រូវរឹបអូសមិនខាន។

សម្តេចតេជោនាយករដ្ឋមន្ត្រី បានថ្លែងក្នុងពិធីបិទសន្និបាត បូកសរុបការងារឆ្នាំ ២០២១ និងលើកទិសដៅការងារឆ្នាំ ២០២២ របស់ក្រសួងមហាផ្ទៃ នារសៀលថ្ងៃទី ២៣ ខែកុម្ភៈនេះថា អ្នកដែលមិនទាន់បង់ពន្ធរថយន្តប្រមាណជា ៥ពាន់គ្រឿង សូមប្រញ៉ាប់ទៅបង់ពន្ធជូនរដ្ឋ។

សម្ដេចតេជោ ហ៊ុន សែន បានថ្លែងបន្តថា «ឥឡូវសុំអំពាវនាវ អ្នកដែលមិនទាន់បានបង់ពន្ធ ចេញមកបង់ពន្ធ ហើយអត់មាន ១០ភាគរយទៀតទេ ពីមុនថ្ងៃ ៣១ ខែធ្នូ ​ឆ្នាំ ២០២១ គឺអនុគ្រោះពន្ធ ១០ភាគរយ ប៉ុន្តែដល់ពេលអ្នកឯង មិនមក បង់ផុតថ្ងៃគឺពន្ធពេញ វ៉ៃពន្ធពេញ ហើយបើថា រកឃើញហើយ ត្រូវតែយកហើយ អត់មានទេ នៅក្នុងផ្ទះអ្នកណាក៏ដោយ យកហើយ»៕​

អត្ថបទ៖ ឃួន សុភ័ក្រ