ពីជិតផុតពូជ បច្ចុប្បន្នប្រភេទសត្វស្មោញនៅបឹងទន្លេសាប មានចំនួនច្រើនជាងគេនៅអាសុីអគ្នេយ៍

ខេត្តបាត់ដំបង៖ ប្រធានសហគមន៍អេកូទេសចរណ៍ នៅតំបន់បឹងទន្លេសាប បានឱ្យដឹងថា តាមរយៈការទប់ស្កាត់យ៉ាងតឹងតែងរបស់ក្រុមការងារ សត្វស្មោញដែលជិតបាត់បង់ បានគង់វង្សបន្តពូជកើនឡើងយ៉ាងច្រើន។ បច្ចុប្បន្នសត្វស្មោញបានកើនឡើងហក់ខ្ពស់ជាងបណ្តាប្រទេសនៅប៉ែកអាសុីអគ្គេយ៍។

លោក តុន ណៃ ប្រធានសហគមន៍អេកូទេសចរណ៍ នៅតំបន់បឹងទន្លេសាប បានឱ្យ “កម្ពុជាថ្មី” ដឹងនៅថ្ងៃទី២៤ ខែកុម្ភៈនេះថា៖ “សត្វស្មោញដែលជាសត្វកម្រជាងគេនៅអាសុីអគ្នេយ៍ក្នុងអំឡុងឆ្នាំ២០០១ ក្រុមការងារបានរកឃើញជម្រកសត្វស្មោចមានតែ ២ដើមឈើប៉ុណ្ណោះ មានតែចំនួន៥០០ក្បាល នៅក្នុងភូមិសាស្ត្រខេត្តបាត់ដំបង ឋិតនៅចំណុចព្រែកទាល់ និងចំណុចស្ទឹងសែន ក្នុងស្រុកឯកភ្នំ។ ក្រោយការអភិរក្សរហូតដល់បច្ចុប្បន្ននេះ ប្រភេទសត្វស្មោញមានចំនួនច្រើនជាងគេនៅប៉ែកអាសុីអគ្គេយ៍ កើនឡើងដល់ជិត ៨ ០០០ ក្បាល”។

ប្រធានសហគមន៍អេកូទេសចរណ៍ រូបនេះបន្តថា បានបន្តថា កំណើនសត្វស្មោញកើនឡើងយ៉ាងសន្ធឹកសន្ធាប់នេះ ក្រោយពីរាជរដ្ឋាភិបាលដាក់ចេញនូវវិធានការទប់ស្កាត់ការប្រមាញ់ ដើម្បីអភិរក្សសត្វស្លាបនៅបឹងទន្លេសាប ខណៈចាប់តាំងពីឆ្នាំ២០០១ រហូតដល់ឆ្នាំ២០១០ លោកជាប្រធានក្រុមនៃមន្ត្រីអភិរក្សសត្វព្រៃនៅតំបន់នោះ។ លោកបញ្ជាក់ថា អ្នកភូមិបណ្តែតទឹកជាទម្លាប់កាលសម័យមុន គឺរកត្រី និងសត្វដើម្បីធ្វើជាម្ហូបជំនួសសាច់មាន់ និងទា ដោយគ្មានការហាមឃាត់ ទើបធ្វើឱ្យសត្វប្រភេទកម្រជិតដាច់ពូជបែបនេះ។

លោក តុន ណៃ បន្តឱ្យដឹងថា សត្វស្លាបកម្រដែលបានរងគ្រោះទាំង៩ប្រភេទទៀត ក៏ត្រូវបានកើនឡើងជាបន្តបន្ទាប់ផងដែរ នៅលើផ្ទៃដីសម្រាប់អភិរក្សសត្វព្រៃនៅតំបន់រាំសាបព្រែកទាល់ មានចំនួន ២១ ៣៤២ ហិកតា ដែលពពួកសត្វទាំងនោះបានបង្កជាហ្វូងហោះហើរទាក់ទាញភ្ញៀវទេសចរជាតិ អន្តរជាតិមកទស្សនាជាបន្តបន្ទាប់យ៉ាងច្រើន កាលពីមុនសម័យកូវីដ១៩ ខណៈសូម្បីតែចាប់ពីខែមករា ដល់ខែធ្នូ ឆ្នាំ២០២១ មានភ្ញៀវទេសចរជាតិចំនួន ២ ១៣២ នាក់ និងភ្ញៀវបរទេសចំនួន ៦៥ នាក់ ចូលទស្សនាហ្វូងសត្វស្លាប ផ្ទះបណ្តែតទឹក និងកន្លែងលក់វត្ថុអនុស្សាវរីយ៍របស់សហគមន៍។

បើតាមមន្ត្រីផ្នែកនៃអង្គការអភិរក្សបឹងទន្លេសាប រួមនឹងអង្គការចំនួន៥ទៀត ដែលមានអង្គការ UNDP ផង បានបង្ហាញថា ក្នុងអំឡុងឆ្នាំ២០០៨ សត្វស្លាបដ៏កម្រចំនួន ១០ប្រភេទដែលត្រូវបានរងគ្រោះបំផុត ដែលត្រូវបានមន្ត្រីជំនាញរួមជាមួយអង្គការជាដៃគូ បានទប់ស្កាត់ និងអភិរក្សឡើងវិញ។ ក្នុងនោះប្រភេទសត្វស្មោញជាប្រភេទសត្វស្លាបដ៏កម្រជាងគេនៅអាសុីអគ្គេយ៍ ដែលត្រូវបានយកចិត្តទុកដាក់ក្នុងការការពារបំផុត ក្នុងចំណោមសត្វកម្រទាំង ១០ប្រភេទ ដែលបានរងគ្រោះ។

សត្វកម្រទាំងនោះ មាន ទី១. សត្វស្មោញ ២. សត្វត្រដក់តូច ៣. សត្វត្រដក់ធំ ៤. សត្វទុងប្រផេះ ៥. ចង្កៀលខ្យង ៦. រនាលពណ៌ ៧. ពពួលទឹក ៨. ក្ងខ្លួនស ៩. អង្កត់ខ្មៅ ១០. អកត្រីប្រផេះ។ សត្វស្លាបនៅតំបន់បឹងទន្លេសាបទាំងអស់បានបែកចែកជា ៣ប្រភេទគឺ ទី១ ប្រភេទសត្វដោយសម្បូរ ទី២ ប្រភេទសត្វដោយបង្គួរ និងទី៣ ប្រភេទសត្វដ៏កម្រនៅប៉ែកអាសុីអគ្គេយ៍។

មន្ត្រីនៃអង្គការអភិរក្សដែនបឹងទន្លេសាបបានសង្កត់ធ្ងន់ថា ការបាត់បង់ពពួកសត្វស្លាបកម្រទាំងអស់ខាងលើនេះ ដោយសាតែការប្រមាញ់របស់អ្នកភូមិបណ្តែតទឹក ដែលជាទំនៀមទម្លាប់ប្រមាញ់សត្វទាំងនោះធ្វើជាម្ហូបប្រចាំថ្ងៃ ឬធ្វើជាម្ហូបក្នុងពិធីផ្សេងៗ ខណៈពេលនោះ មិនទាន់មានច្បាប់ការពារ និងអភិរក្សនៅឡើយ៕

អត្ថបទ៖ សៅ សារិទ្ធ