​ក្រុង​បាត់ដំបង​ បើកសម្ពោធ​ដំណើរការ​ផ្សារចុងសប្តាហ៍ មាន​លក់ផលិតផល​ចម្រុះ​​ជា​ស្នាដៃ​ក្នុងស្រុក

ផ្សារចុងសប្តាហ៍បានចាប់ផ្តើម​បើក​ដំណើរការ​នៅក្នុង​ក្រុង​បាត់ដំបង ដោយមានការ​តាំង​បង្ហាញនិង​លក់ផលិតផល​ចម្រុះ​​ពី​សហគ្រាសនិង​សិប្បម្ម​​ក្នុងស្រុក។

ក្រោយចាប់ផ្តើមដំណើរកាលពីថ្ងៃទី២២-២៣ ខែមីនា ឆ្នាំ២០២៥ គេ​សង្កេត​ឃើញ​មានប្រជាពលរដ្ឋក្នុងក្រុងបាត់ដំបង បានគាំទ្រចំពោះការបើកឲ្យមានផ្សារចុងសប្តាហ៍នេះ។

មន្ទីរពាណិជ្ជកម្ម​ខេត្ត​បាត់ដំបងបាន​បញ្ជាក់ថា ​ផ្សារចុងសប្តាហ៍នេះប្រមូលផ្តុំរាល់ផលិតផល​ក្នុងស្រុក រួមមាន​បន្លែគ្រប់ប្រភេទរបស់សហគមន៍។ ផ្សារនេះបើក​ឡើង​ក្នុង​គោលបំណងឲ្យប្រជាពលរដ្ឋទូងាកមកគាំទ្របន្លែក្នុងស្រុកវិញ ដែលបានដាក់តាំងលក់នៅលើទីផ្សារចុងសប្តាហ៍នេះយ៉ាងសម្បូរបែប ធានានូវគុណភាព និងមានស្តង់ដាអនាម័យ។

ការដាក់តាំងលក់ផលិតផល​ទីផ្សារចុងសប្តាហ៍​នេះ មាន ២ ថ្ងៃក្នុង១សប្តាហ៍ គឺ​នៅ​ថ្ងៃសៅរិ៍ និងថ្ងៃអាទិត្យ ចាប់ពីម៉ោង ០៦:០០ នាទីព្រឹក ដល់ ម៉ោង០៦:០០ នាទីល្ងាច នៅបរិវេណខាងមុខផ្សារទំនើប-បុរីថ្មី (តាមបណ្តោយផ្លូវលេខ ៣) ក្រុងបាត់ដំបង។

ក្រោយពីផ្សារមួយនេះបានដំណើរការ គេសង្កេតឃើញមានអតិថិជនចូលទិញបន្លែជាបន្តបន្ទាប់ ហើយពួកគាត់បានគាំទ្រ ចំពោះការបង្កើតផ្សារចុងសប្តាហ៍នេះឡើង។

លោក ចាន់ធី ជាពលរដ្ឋរស់នៅក្នុងក្រុងបាត់ដំបង​បានឲ្យដឹងថា “សម្រាប់ខ្ញុំយល់ឃើញថា ពិតជាល្អ ហើយរាល់បន្លែដាក់​លក់មាន​គុណភាពល្អ។ ខ្ញុំទិញច្រើនដែរសម្រាប់យកទៅដាក់ទូក្លាសេ ធ្វើជាអន្លក់”។ តែលោកថា “សូមកុំធ្វើជាផ្សារក្រមួន ត្រូវតែបន្តលក់ឲ្យបានយូរអង្វែង”។

មន្ត្រីកសិកម្មខេត្តបាត់ដំបង​ក៏​បានមើលឃើញថា ការបង្កើតផ្សារចុងសប្តាហ៍នេះ ជារឿងល្អសម្រាប់ដាក់តាំងលក់រាល់ផលិតផល និងកសិផលក្នុងស្រុក ជាពិសេសបានជួយលើកកម្ពស់ដល់កម្រិតសេដ្ឋកិច្ចរបស់សហគមន៍ ក៏ដូចជាបានលើកកម្ពស់សេដ្ឋកិច្ចជាតិឲ្យកាន់តែមានកំណើនផងដែរ៕

អត្ថបទ៖ សៅ សារិទ្ធ