តំបន់មាត់សមុទ្រ​អាចប្រឈម​ជំនន់ទឹកភ្លៀងផ្នែកខ្លះ​នៅខេត្តព្រះសីហនុ ​និងកោះកុង

ក្រសួងធនធានទឹក និងឧតុនិយមបានប្រកាសថា នៅថ្ងៃទី១១ ដល់ថ្ងៃទី ១៤ ខែកក្កដានេះ តំបន់មាត់សមុទ្រនឹងអាចមានភ្លៀងធ្លាក់ច្រើនជាប់បន្ត ដែលអាចធ្វើឱ្យផ្នែកមួយចំនួន នៅក្នុងភូមិសាស្ត្រខេត្តកោះកុង និងខេត្តព្រះសីហនុអាចជួបប្រទះជំនន់ទឹកភ្លៀង ខណៈលើផ្ទៃសមុទ្រនឹងមានភ្លៀងខ្យល់ខ្លាំង បង្កជារលកសមុទ្រខ្ពស់ៗ។

ឥទ្ធិពលនេះ កើតមានឡើងដោយសារកម្ពុជាទទួលរងនូវឥទ្ធិពលពីប្រព័ន្ធសម្ពាធទាប ITCZ ដែលអូសបន្លាយពីប្រទេសថៃភ្ជាប់ទៅនឹងសម្ពាធទាបសកម្មមួយនៅលើសមុទ្រចិនខាងត្បូង រួមជាមួយនឹងមូសុងនិរតីបកខ្លាំងមកលើតំបន់មាត់សមុទ្រ និងភាគខាងក្រោមកម្ពុជា ធ្វើឱ្យបណ្ដាខេត្ត រាជធានី នឹងអាចមានភ្លៀងធ្លាក់រាយប៉ាយ លាយឡំដោយផ្គររន្ទះ និងខ្យល់កន្ត្រាក់។

ជាមួយគ្នានេះ ក្រសួងធនធានទឹក និងឧតុនិយមក៏បានអំពាវនាវដល់ប្រជាពលរដ្ឋឱ្យបង្កើនការប្រុងប្រយ័ត្នចៀសវាងគ្រោះថ្នាក់ផ្សេងៗដែលអាចកើតមានឡើងជាយថាហេតុ៕