​ក្រសួងធនធានទឹក​មានលទ្ធភាព​ស្រោចស្រព​ផ្ទៃដីស្រែ​បាន ជិត​ ២ លានហិកតា​

​គិតមកដល់បច្ចុប្បន្ន​ក្រសួងធនធានទឹក និងឧតុនិយម​ មានលទ្ធភាពស្រោចស្រពលើផ្ទៃដីសរុបជិត ២ លានហិកតា (១ ៨៨៩ ១១២) លើផ្ទៃដីសរុបជាង ៣ លាន ( ៣ ០៧៨ ២២០) ស្មើនឹង ៦១, ៣៧ ភាគរយ។

លោក ប៊ុន ហ៊ាន រដ្ឋលេខាធិការ ក្រសួងធនធានទឹក និងឧតុនិយម មានប្រសាសន៍នៅឯសន្និសីទសារព័ត៌មានស្ដីពីសមិទ្ធិផលសម្រេចរយៈពេល ៥ ឆ្នាំ របស់ក្រសួងធនធានទឹក នៅទីស្ដីការគណៈរដ្ឋមន្ត្រីនៅថ្ងៃព្រហស្បតិ៍ទី ២៥ ខែសីហា ២០២២នេះ ឱ្យដឹងថា ដើម្បីធនាបាននូវសន្តិសុខទឹក ទាំងបរិមាណ និងគុណភាពក្នុងអាង ទន្លេ ស្ទឹង ក្រសួងនឹងបន្តគ្រប់គ្រងធនធានទឹក​ឱ្យបានល្អប្រសើរ ទាំងនៅពេលមានទឹកជំនន់ និងនៅពេលជួបគ្រោះរាំងស្ងួត។

ជាមួយគ្នានេះ ក្រសួងក៏បន្តអភិវឌ្ឍទំនប់អាងស្តុកទឹកនៅតាមបណ្ដាស្ទឹងសំខាន់ដែលមានសក្ដានុពល។

នៅក្នុងរយៈពេល ៥ ឆ្នាំ ២០១៨-២០២២ ក្រសួងធនធានទឹក និងឧតុនិយមបានធ្វើការអភិវឌ្ឍទំនប់អាងស្ទាក់ទឹក និងសំណង់អាងស្ទាក់ទឹកធំៗកាត់ស្ទឹងបង្កើនលទ្ធភាពគ្រប់គ្រង់ទឹកជំនន់ចំនួន ៣ កន្លែង ដែលអាចស្តុកទឹកបានដល់ ៤៥០ លានម៉ែត្រគូប៕

អត្ថបទ៖ ឡេង ដេត