លោក ស៊ុន ចាន់ថុល៖ ទោះបង់លុយបើកបរផ្លូវ​ល្បឿនលឿន ក៏នៅចំណេញជាងបើក​តាមផ្លូវជាតិធម្មតា

ផ្លូវល្បឿនលឿនភ្នំពេញ-ព្រះសីហនុ ត្រូវបានបញ្ចប់ការសាងសង់ជាស្ថាពរ  ហើយនឹងត្រៀមបើកឱ្យប្រជា​ពលរដ្ឋធ្វើដំណើរ​សាកល្បងដោយមិនគិតថ្លៃ ចាប់ពីថ្ងៃទី១ ដល់ទី ៣១ ខែតុលា ឆ្នាំ ២០២២ ខាងមុខ។

ការកសាងផ្លូវល្បឿនលឿននេះ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានលើកឡើងថា ផ្លូវល្បឿនលឿន គឺផ្តល់ផលចំណេញច្រើនដល់ប្រជាពលរដ្ឋ និងសេដ្ឋកិច្ចជាតិ តាមរយៈការផ្តល់កំណើនភ្ញៀវទេសចរណ៍ ក៏ដូចជាផ្តល់ការងារដល់ប្រជាពលរដ្ឋបន្ថែមទៀត។

លោក ស៊ុន ចាន់ថុល បានបញ្ជាក់ថា បើទោះជាការបង់ប្រាក់ប្រើប្រាស់ផ្លូវល្បឿនលឿនយ៉ាងណាក្តី ក៏នៅតែចំណេញជាងបើកបរតាមផ្លូវជាតិធម្មជាតិ។ លោកពន្យល់ថា បើសិនជាប្រជាពលរដ្ឋ បើកបរលើផ្លូវជាតិធម្មតា គឺត្រូវចំណាយពេលយូរ  ប្រើប្រាស់ប្រេងសាំងច្រើន និងអត្រាអាចមានគ្រោះថ្នាក់ជាយថាហេតុខ្ពស់។ ផ្ទុយមកវិញ បើសិនជាប្រជាពលរដ្ឋ ប្រើប្រាស់ផ្លូវល្បឿនលឿន បើទោះជាត្រូវចំណាយប្រាក់ ក៏ពិតមែន តែក៏នៅចំណេញ ពោលគឺចំណេញពេលវេលា និងសុវត្ថិភាពខ្ពស់។

​ពាក់ព័ន្ធនឹងតម្លៃធ្វើដំណើរ ក្នុង​ឆ្នាំទី១ ​ក្រុមហ៊ុន​នឹង​គិតថ្លៃ​​ទៅ​តាម​ប្រភេទ​យានយន្ត ​ក្នុងនោះ​រថយន្ត​គ្រួសារ ​នឹង​ត្រូវ​គិតថ្លៃ​ចំនួន​​ ១២ ដុល្លារសម្រាប់ធ្វើដំណើរ​ទៅ ​និង​ចំនួន ១២ ​ដុល្លារ​ក្នុងការធ្វើដំណើរមក​វិញ ពោលគឺសរុប ២៤ដុល្លារ។ ដោយឡែក ​នៅ​ឆ្នាំទី២​ ក្រុមហ៊ុន ​នឹង​ពិនិត្យ​យក​តម្លៃ​ធ្វើដំណើរ​យោងតាម​កិច្ច​ព្រមព្រៀង​សម្បទាន ​ដែល​កម្ពុជា​បានចុះ​ហត្ថលេខា​ជាមួយ​ក្រុមហ៊ុន​សាង​សង់។

ផ្លូវល្បឿនលឿន បានរួមចំណែកយ៉ាងសំខាន់ ជួយប៉ូលសេដ្ឋកិច្ចចំនួនពីរ គឺទី១ ប៉ូលសេដ្ឋកិច្ចភ្នំពេញ និងទី២ ប៉ូលសេដ្ឋកិច្ចក្រុងព្រះសីហនុ តាមរយៈការធ្វើដំណើរបានលឿន ចំណេញពេលវេលា កាត់បន្ថយការចំណាយ។

សូមបញ្ជាក់ថា ផ្លូវល្បឿនភ្នំពេញ-ព្រះសីហនុនេះ ចាប់ផ្តើមដំណើរការសាងសង់ចាប់តាំងពីខែ មីនា ឆ្នាំ ២០១៩ វិនិយោគដោយក្រុមហ៊ុនចិន CRBC ក្នុងទំហំទឹកប្រាក់ជាង ២ពាន់លានដុល្លារ លាតសន្ធឹងប្រវែងជាង ១៩០ គីឡូម៉ែត្រ តភ្ជាប់រាជធានីភ្នំពេញ និងកំពង់ផែទឹកជ្រៅក្រុងព្រះសីហនុ ដោយឆ្លងកាត់ខេត្តកណ្តាល កំពង់ស្ពឺ និងកោះកុង។

ផ្លូវនេះ មានទទឹងសរុប ២៤.៥ ម៉ែត្រ ខណៈចរាចលើគន្លងផ្លូវចំនួន ៤ ក្រាល AC មានសួនច្បារខណ្ឌកណ្តាល ចេញ​ពី​ភ្នំពេញ​​​នៅចំណុច​ផ្លូវ​ខ្សែក្រវ៉ាត់ក្រុងទី៣ មានផ្លូវបំបែកប្តូរទិស (Inter-Change) ភ្ជាប់មក​ផ្លូវ​ជាតិ​លេខ​៤ ចំនួន ៧​កន្លែង មាន​ស្ពាន​វែង-មធ្យម ៥៦កន្លែង ប្រវែង ៤.៤១៧ម៉ែត្រ ស្ពានខ្លី​ ៣៣​កន្លែង ប្រវែង ៧៥០ម៉ែត្រ ស្ពាន​រំលង ៣២១កន្លែង កន្លែង​ឈប់សម្រាក ៣កន្លែង ដែលអនុញ្ញាតឱ្យយានយន្តគ្រប់ប្រភេទអាចបើកបរបានដល់ ១០០ គីឡូម៉ែត្រក្នុងមួយម៉ោង និងកន្លែងខ្លះមានល្បឿនអតិបរមា ១២០ គីឡូម៉ែត្រក្នុងមួយម៉ោង៕

អត្ថបទ៖ នាង រតនៈ