ខេត្ត ៨ ប្រឈមជំនន់ទឹកភ្លៀង​ដោយសារឥទ្ធិពលព្យុះទី ១៦ ឈ្មោះ​ ណូរុ (NORU) ​

ខេត្តចំនួន ៨ នៅកម្ពុជា ​ប្រឈមនឹងជំនន់ទឹកភ្លៀង​ដោយសារឥទ្ធិពលព្យុះទី ១៦ ឈ្មោះ ណូរុ (NORU) ​ដែលកើតឡើងនៅប្រទេសហ្វីលីពីន នឹងវិវត្ត​ខ្លួនទៅជាព្យុះទីហ្វុង TY ធ្វើដំណើរមកប្រទេស​ក្នុងតំបន់​ក្នុងនោះកម្ពុជាក៏ប្រឈមនឹងជំនន់ទឹកភ្លៀង​នៅខេត្តទាំង ៨ រួមមានខេត្តឧត្តរមានជ័យ ព្រះវិហារ រតនគិរី សៀមរាប បន្ទាយមានជ័យ ប៉ៃលិន បាត់ដំបង និង​ខេត្ត​ពោធិ៍សាត់ពីថ្ងៃទី ២៧ ដល់ថ្ងៃទី ៣០ ខែកញ្ញា។ នេះបើតាមសេចក្ដីជូនដំណឹងរបស់ក្រសួងធនធានទឹក និងឧតុនិយម ស្ដីពីស្ថានភាពអាកាសធាតុចេញផ្សាយនៅថ្ងៃទី ២៤ ខែកញ្ញា ឆ្នាំ ២០២២។

សេចក្ដីជូនដំណឹងដដែលបញ្ជាក់ថា បណ្ដាខេត្តដទៃទៀត និងរាជធានីភ្នំពេញ មានភ្លៀងធ្លាក់ពីតិចទៅបង្គួរលើកលែងតែបណ្ដាខេត្តជាប់មាត់សមុទ្រមានខេត្តកោះកុង និងខេត្តព្រះសីហនុ អាចមានភ្លៀងធ្លាក់ច្រើន។ នៅលើផ្ទៃសមុទ្រក៏មានភ្លៀងធ្លាក់ច្រើន ខ្យល់បោកខ្លាំង និងរលកសមុទ្រខ្ពស់ៗ៕