នាយករដ្ឋមន្ត្រី ៖ គួរជឿបានទេ ដែលកម្មករខ្លះគ្មានការងារធ្វើជាង ១ឆ្នាំមកហើយ តែមានលទ្ធភាពចេញធ្វើបាតុកម្មជាង ១ឆ្នាំដែរ  

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានដាក់ជាសំណួរ ថាតើគួរជឿបានទេ ដែលកម្មករ​-កម្មការនីខ្លះ មិនមានការងារធ្វើប្រមាណជាង ១ឆ្នាំមកហើយ តែមានលទ្ធភាពចេញធ្វើបាតុកម្មជាង ១ឆ្នាំដែរ។

នៅក្នុងពិធីប្រគល់វិញ្ញាបនបត្រ និងសញ្ញាបត្រជូនសិស្ស-និស្សិតវិទ្យាស្ថានខ្មែរជំនាន់ថ្មី នាព្រឹកថ្ងៃទី ៦ ខែមីនានេះ សម្តេចតេជោ ហ៊ុន សែន បានថ្លែងថា មានកម្មករ-កម្មការនីខ្លះ មិនមានការងារធ្វើប្រមាណជាង ១ឆ្នាំមកហើយ តែមានលទ្ធភាពចេញធ្វើបាតុកម្មជាង ១ឆ្នាំ ដោយសម្ដេច ដាក់ជាសំណួរថាតើជឿបានទេ?

សម្ដេចតេជោ ហ៊ុន សែន បានឲ្យដឹងថា សម្ដេច បាននិយាយជាមួយជនបរទេសមួយរូប ពាក់ព័ន្ធនឹងការធ្វើបាតុកម្មរបស់កម្មករ-កម្មការនីនៅកន្លែងមួយ ដែលធ្វើបាតុកម្មពីមនុស្សជាង ៣០០នាក់ នៅសល់តែជាង ១០០នាក់ប៉ុណ្ណោះ ខណៈកម្មករ-កម្មការនីមួយចំនួនធំ បានទទួលយកប្រាក់សំណង និងស្វែងរកការងារផ្សេងធ្វើ។

សម្ដេចតេជោ ហ៊ុន សែន បានថ្លែងបែបនេះថា «ប៉ុន្តែយើងដាក់ចេញជាសំណួរ បានខ្ញុំចង្អុលបង្ហាញ បើសិនជាខ្ញុំទៅចាប់អាកន្លែងដែលផ្គត់ផ្គង់លុយឲ្យធ្វើបាតុកម្មហ្នឹង ខ្ញុំក៏ចាប់បានដែរ អ្នកឯងកុំគិតស្មានថា ខ្ញុំមិនដឹងនោះ»៕