ព័ត៌មានជាតិ

អាជ្ញាធរខេត្តព្រះសីហនុឲ្យក្រុមហ៊ុនទូកដឹកជញ្ជូនភ្ញៀវទេសចរ ទូទាត់ថវិកាថ្លៃសំបុត្រប្រចាំឆ្នាំ២០២០

Published

1 month ago

January 16, 2021

អាជ្ញាធរខេត្តព្រះសីហនុឲ្យក្រុមហ៊ុនដឹកជញ្ជូនភ្ញៀវទេសចរកំសាន្តតាមកោះទូទាត់ថវិកាថ្លៃសំបុត្រប្រចាំឆ្នាំ២០២០សម្រាប់ទ្រទ្រង់ដល់ការគ្រប់គ្រង និងអភិរក្សធនធានតំបន់ឆ្នេរ ក្នុងខេត្តព្រះសីហនុ។

លោក ម៉ាង ស៊ីណេត អភិបាលរងខេត្តព្រះសីហនុ មានប្រសាសន៍ថាក្រុមហ៊ុនត្រូវមានឆន្ទះការទទួលខុសត្រូវសហការចូលរួមជាមួយរដ្ឋបាលខេត្ត ក្នុងការប្រមូលថវិកាចំនួន ២ដុល្លា ពីលើតម្លៃសំបុត្ររបស់ភ្ញៀវទេសចរក្នុងម្នាក់ៗដែលបានការឯកភាពពីក្រសួងសេដ្ឋកិច្ច និងហិរញ្ញវត្ថុ ស្តីពីស្ថានភាពគ្រប់គ្រង និងការធ្វើអាជីវកម្មទូកទេសចរណ៍នៅខេត្តព្រះសីហនុ។

ទន្ទឹមនោះលោកបានស្នើសុំឲ្យប្រធានសមាគមន៍ទូកទេសចរណ៍ប្រចាំខេត្តព្រះសីហនុ រៀបចំបោះសំបុត្រទូកឯកភាពមួយ ដោយមានឡូហ្គោក្រុមហ៊ុន និងឡូហ្គោសមាគមន៍ ដើម្បីមានភាពងាយស្រួលក្នុងការគ្រប់គ្រងប្រមូលថវិកាជូនរដ្ឋបាលខេត្តព្រះសីហនុ។

លោក ម៉ាង ស៊ីណេត ក៏បានធ្វើការណែនាំឱ្យម្ចាស់ក្រុមហ៊ុនទូកទេសចរណ៍ទាំងអស់ត្រូវមានអាវពោងសុវត្ថិភាព ក្នុងការដឹកជញ្ជូនភ្ញៀវប្រកបដោយផាសុខភាព ធានានូវសុវត្ថិភាពជូនភ្ញៀវទេសចរ។

យ៉ាងណាក៏ដោយ លោកបានថ្លែងអំណរគុណក្រុមហ៊ុនទូកទេសចរណ៍របស់លោកឧកញ៉ា ទៀ វិចិត្រ ដែលបានចូលរួមជាមួយរដ្ឋបាលខេត្ត ប្រមូលថវិកា ២ដុល្លារ បង់ជូនសាលាខេត្តបានទាន់ពេលវេលាហើយសូមឱ្យក្រុមហ៊ុនផ្សេងទៀត ត្រូវពន្លឿនការបង់ថវិកាមករដ្ឋបាលខេត្តយោងតាមលិខិតលេខ ៦៨៦៤សហវ- អទច ចុះថ្ងៃទី២៦ ខែកក្កដា ឆ្នាំ២០១៧ របស់ក្រសួងសេដ្ឋកិច្ច និងហិរញ្ញវត្ថុ ស្តីពីស្ថានភាពគ្រប់គ្រង និងការធ្វើអាជីវកម្មទូកទេសចរណ៍នៅខេត្តព្រះសីហនុ។

តំណាងក្រុមហ៊ុនទូកដឹកភ្ញៀវទេសចរណ៍ បានលើកឡើងពីផលពិបាកនៃការអាក់ខានបង់ថ្លៃសំបុត្រ ជូនរដ្ឋបាលខេត្តព្រះសីហនុ ដោយសារតែផលប៉ះពាល់ដោយសារជំងឺកូវីដ-១៩ គ្មានភ្ញៀវទេសចរទៅលេងកម្សាន្តតាមកោះក្នុងខេត្តព្រះសីហនុ។

ចំណែកលោកឧកញ៉ា ទៀ វិចិត្រ ប្រធានសមាគមន៍ទូកទេសចរណ៍ប្រចាំខេត្តព្រះសីហនុ ទទួលយកសំណើរបស់រដ្ឋបាលខេត្ត និងធ្វើការប្រជុំពិភាក្សាជាមួយម្ចាស់ក្រុមហ៊ុនទូកដឹកភ្ញៀវទេសចរ ដើម្បីពន្លឿនការប្រមូលថវិកាសម្រាប់ទ្រទ្រង់ដល់ការគ្រប់គ្រង និងអភិរក្សធនធានតំបន់ឆ្នេរក្នុងខេត្តព្រះសីហនុ។

យោងតាមរបាយការណ៍មន្ទីរទេសចរណ៍ខេត្តព្រះសីហនុបានឲ្យដឹងថា ខេត្តព្រះសីហនុ មានក្រុមហ៊ុនទូកដឹកភ្ញៀវទេសចរចំនួន១០ក្រុមហ៊ុន ក្នុងនោះចំនួន ០៦ បានស្នើសុំអាជ្ញាប័ណ្ណពីក្រសួងទេសចរណ៍ និង ០៤ សុំអាជ្ញាប័ណ្ណនៅសាលាខេត្តព្រះសីហនុ៕
ដោយ ៖ សំអឿន