អគារជាប់គាំង ១២៣ គម្រោង នៅខេត្តព្រះសីហនុបន្តដំណើរការឡើងវិញ

គិតមកដល់ពេលនេះ គម្រោងវិនិយោគចំនួន ២៨៨ គម្រោង ទទួលបានការលើកទឹកចិត្តពិសេស​ពីរាជ​រដ្ឋា​ភិបាល ក្នុងនោះមានអាគារជាប់គាំងចំនួន ១២៣ គម្រោង នឹងបន្តការសាង​សង់ឡើង​វិញគិត​ជា​ថវិកា ៦,៧ ពាន់លានដុល្លារ។

សម្ដេចធិបតី ហ៊ុន ម៉ា​ណែត នាយ​ក​រដ្ឋមន្ត្រីកម្ពុជា មានប្រសាសន៍នៅថ្ងៃទី ២៦ ខែមីនា ឆ្នាំ ២០២៥ថា៖​ «កាល​ពីកូវីដ​១៩​​ យើងមានអគារមួយចំនួនជាប់គាំង មកដល់ម៉ោងនេះ យើង​មាន​ទាំងអស់ ២៨៨ គម្រោង ដែលបានដាក់លើកទឹកចិត្ត ២៦៩ គម្រោង បានផ្ដល់​គោល​ការណ៍ដើម្បីដោះស្រាយ ហើយក្នុងនោះយើងដោះបាន ១២៣ គម្រោង គិតជាថវិកា ៦,៧ ពាន់លានដុល្លារ»។

សម្ដេចធិបតី ហ៊ុន ម៉ា​ណែត បានបញ្ជាក់ថា កម្មវិធីពិសេសជំរុញការវិនិយោគក្នុងខេត្តព្រះសីហនុ នឹងបន្តរហូតដល់ដំណាច់ឆ្នាំ ២០២៥ ខណៈរាជរដ្ឋាភិបាលទើបតែបានអនុម័តផែន​ការមេ​អភិ​វឌ្ឍ​​តំបន់សមុទ្រ ដោយយកខេត្តព្រះសីហនុជាគោល។

កម្មវិធីពិសេសជំរុញការវិនិយោគក្នុងខេត្តព្រះសីហនុឆ្នាំ ២០២៤ ត្រូវបានប្រកាសដាក់​ឱ្យអនុវត្ត​កាល​ពីថ្ងៃទី ៣១ ខែមករា ឆ្នាំ ២០២៤ ក្រោមអធិបតីភាពសម្ដេចធិបតី ហ៊ុន ម៉ាណែត នាយក​រដ្ឋ​មន្ត្រី​កម្ពុជា។

យោងតាមរបាយការណ៍របស់រាជរដ្ឋាភិបាល ករណីអគារជាប់គាំង នៅក្នុងខេត្តព្រះសីហនុ មានអគារផ្អាកដំណើរការសាងសង់ ចំនួន ៣៦២អគារ ដែលត្រូវការទុនវិនិយោគបន្ថែមប្រមាណ ១,១៦ ពាន់លានដុល្លារ ដើម្បីបញ្ចប់កាសាងសង់ និង អគារសាងសង់រួច ប៉ុន្តែមិនដំណើរ​ការ​មានចំនួន ១៧៦អគារ៕

អត្ថបទ៖ ឡេង ដេត