សម្ដេចតេជោ ហ៊ុន សែន ៖ បញ្ហាគោរពរសិទ្ធិកម្មករ មិនមែនមានតែមួយថ្ងៃទី ១ ខែឧសភាទេ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា លើកឡើងថា​ ការគោរពសិទ្ធិកម្មករ-កម្មការនី ត្រូវធ្វើឡើងជាទៀងទាត់ និងជារៀងរាល់ថ្ងៃ មិនមែនធ្វើឡើងតែក្នុងថ្ងៃទី ១ ឧសភា ដែលជាទិវាពលកម្មអន្តរជាតិនោះទេ។

ការលើកឡើងខាងលើនេះ គ្រាដែលសម្តេចតេជោ ហ៊ុន សែន បានអញ្ជើញជាអធិបតីភាពដ៏ខ្ពង់ខ្ពស់ នៅក្នុងពិធីអបអរសាទរ ខួបអនុស្សាវរីយ៍លើកទី ១៣៧ នៃទិវាពលកកម្មអន្តរជាតិ ១ឧសភា និងពិធីបើកការ​ដ្ឋានសាងសង់ចំណត ផែកុងតឺន័រ នៅខេត្តព្រះសីហនុ និងពិធីអបអរសាទរខួបអនុស្សាវរីយ៍លើកទី ៧០ នៃទំនាក់ទំនងការទូតរវាងកម្ពុជា និងជប៉ុន ដែលប្រារព្ធធ្វើឡើងនៅចំណតកំពង់ផែក្រុងព្រះសីហនុ នាព្រឹកថ្ងៃទី ១ ខែឧសភា ឆ្នាំ ២០២៣នេះ។   

សម្ដេចតេជោ ហ៊ុន សែន បានថ្លែងថា ការគោរពសិទ្ធិកម្មករ-កម្មការនី មិនមែនមានតែក្នុងថ្ងៃទី ១ ឧសភា ដែលជាទិវាពលកម្មអន្តរជាតិនោះទេ តែត្រូវធ្វើឡើងជារៀងរាល់ថ្ងៃ និងទៀងទាត់។

សម្ដេចតេជោ ហ៊ុន សែន ថ្លែងបែបនេះថា «ខ្ញុំសូមរំលឹកថា បញ្ហាគោរពរសិទ្ធិកម្មករ មិនមែនមានតែមួយថ្ងៃទី ១ ខែឧសភាទេ ការគោរពចំពោះសិទ្ធិកម្មករ ត្រូវតែធ្វើឲ្យបានទៀងទាត់ ធ្វើជារៀងរាល់ថ្ងៃ ធ្វើជារៀងរាល់ពេល ដែលនោះគឺជាចំណុចដ៏ល្អបំផុត ក្នុងទំនាក់ទំនរវាងកម្មករ និងម្ចាស់រោងចក្រ»។

សម្ដេចតេជោ ហ៊ុន សែន លើកឡើងថា ថៅកែមានថវិកាដើម្បីបង្កើតរោងចក្រ ហើយតាមរយៈការបង្កើតរោងចក្រនេះ កម្មករក៏មានការងារធ្វើ។ ដូច្នេះ នៅពេលមានរឿងអ្វីមួយ ត្រូវដោះស្រាយតាមរយៈការជជែកពិភាក្សាគ្នាដែរ៕