សម្ដេចតេជោ ហ៊ុន សែន កំពុងព្រាងរៀបចំក្រុមការងាររចុះមូលដ្ឋានអាណត្តិថ្មី ថាតើមន្ត្រីរូបណាត្រូវចុះទៅខេត្តណាខ្លះ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងថា សម្ដេច កំពុងរៀបចំសេចក្ដីព្រាង ដើម្បីរៀបចំក្រុមការងាររាជរដ្ឋាភិបាលចុះមូលដ្ឋានអាណត្តិថ្មី ថាតើមន្ត្រីរូបណា ត្រូវចុះទៅខេត្តណាខ្លះ នៅក្រោយការបោះឆ្នោតជ្រើសតាំង តំណាងរាស្រ្ដ នីតិកាលទី ៧។

ការថ្លែងរបស់សម្ដេចតេជោ ហ៊ុន សែន ធ្វើឡើងក្នុងកិច្ចប្រជុំបូកសរុបសកម្មភាព និងលទ្ធផលការងាររបស់ ក្រុមការងាររាជរដ្ឋាភិបាលចុះមូលដ្ឋានរាជធានី-ខេត្ត ក្នុងអាណត្តិរាជរដ្ឋាភិបាល សម្រាប់នីតិកាលទី ៦ នៃរដ្ឋសភា និងទិសដៅបន្ត នាល្ងាចថ្ងៃទី ១៩ ខែមិថុនា ឆ្នាំ ២០២៣នេះ។

សម្ដេចតេជោ ហ៊ុន សែន ថ្លែងបែបនេះថា «ក្នុងចំណុចនេះ កំពុងតែព្រាងដាក់ថា តើអ្នកណានឹងចុះទៅខេត្តណា ក្រោយការបោះឆ្នោតនឹងត្រូវរៀបចំឡើងវិញ ព្រោះអ្នកខ្លះនឹងបន្ត អ្នកខ្លះមិនបន្ត ហើយបើទោះបីជារដ្ឋាភិបាលនៅក្នុងក្រុមធីមចាស់បន្ត ក៏ត្រូវរៀបចំក្រុមធីមថ្មីក៏ត្រូវរៀបចំៗ ដើម្បីធ្វើម៉េចឲ្យមានសមាជិករដ្ឋាភិបាលចុះជួយតាមខេត្តនានាបន្តទៀត ដែលជាការផ្សារភ្ជាប់ខ្លួនជាមួយនឹងដំណើរការទាំងមូលរបស់ជាតិ ហើយជាពិសេសផ្សារភ្ជាប់ខ្លួនជាមួយនឹងមូលដ្ឋាន ដើម្បីជំរុញអនុវត្ត»។

សម្ដេចតេជោ ហ៊ុន សែន ក៏បានគូសបញ្ជាក់ដែរថា នាពេលខាងមុខនេះ យុទ្ធសាស្រ្ដចតុកោណដែលបានអនុវត្ត ៤ដំណាក់កាលរួចមកហើយនោះ នឹងត្រូវផ្លាស់ប្ដូរទៅជាយុទ្ធសាស្រ្ដបញ្ចកោណ ដែលមានមុំ ៥៕