កម្មវិធីឧបត្ថម្ភសាច់ប្រាក់របស់រាជរដ្ឋាភិបាលជួយសម្រួលជីវភាពពលរដ្ឋខេត្តកំពតជាង ៣ម៉ឺនគ្រួសារ

កន្លងមក ប្រជាពលរដ្ឋដែលរស់នៅក្នុងខេត្តកំពតជាង ៣ម៉ឺនគ្រួសារ ទទួលបានសេវាឧបត្ថម្ភ​សាច់​ប្រាក់​របស់រាជរដ្ឋាភិបាល ប៉ុន្តែបច្ចុប្បន្ននេះ ចំនួននៃគ្រួសារដែលទទួលប្រាក់ឧបត្ថម្ភ បានថយចុះជាង ១ម៉ឺនគ្រួសារ ដោយសារ​តែសេដ្ឋកិច្ចគ្រួសារ​ពលរដ្ឋ ចាប់ផ្តើម​ប្រសើរឡើងវិញ។ នេះបើតាមការឲ្យដឹងពីមន្ត្រីជំនាញខេត្តកំពត នៅថ្ងៃទី ២៩ ខែកក្កដា ឆ្នាំ២០២៣ នេះ។

យោងតាមការបញ្ជាក់ពីប្រជាពលរដ្ឋ ការឧបត្ថម្ភសាច់ប្រាក់របស់​រាជរដ្ឋាភិបាល ពិតជាបានជួយសម្រួលដល់ជីវភាពរបស់ពួកគាត់ និងជាកម្លាំងចិត្ត​ដ៏មុតមាំសម្រាប់ប្រជាពលរដ្ឋក្រីក្រ។

លោក ស៊ូ សុខ អនុប្រធានមន្ទីរសង្គមកិច្ច អតីតយុទ្ធជន និងយុវនីតិសប្បទាខេត្តកំពត បានប្រាប់ឲ្យដឹងថា កម្មវិធីឧបត្ថម្ភសាច់ប្រាក់នេះ បានចាប់ផ្តើមដំណើរការចាប់ពីថ្ងៃទី២៥ ខែមិថុនា ឆ្នាំ២០២០ ក្នុងនោះ ខេត្តកំពតមានពលរដ្ឋទទួលសេវានេះសរុបចំនួន ៣៤ ៥២៥គ្រួសារ ប៉ុន្តែបន្ទាប់ពីធ្វើបច្ចុប្បន្នភាព ចំនួនគ្រួសារដែលត្រូវទទួលបានការឧបត្ថម្ភបាន​ថយ​ចុះ​មក​ត្រឹមចំនួន ២៣ ២៣១គ្រួសារ ពោលគឺថយចុះជាង ១ម៉ឺនគ្រួសារ។

លោកថា ចំពោះមូលហេតុនៃការថយចុះ ក៏ព្រោះតែសេដ្ឋកិច្ចគ្រួសារពលរដ្ឋ មានភាពល្អប្រសើរឡើងវិញ លែងខ្វះខាត ឬងើបផុតពីបន្ទាត់ក្រក្រី។

អនុប្រធានមន្ទីរសង្គមកិច្ចរូបនេះ គូសបញ្ជាក់ថា មកដល់ពេលនេះ ខេត្តកំពតបានឧបត្ថម្ភសាច់ប្រាក់សរុបចំនួន ១៥២ ៧៣៤ ២៥០ ០០០រៀល។ ដោយឡែកសម្រាប់ជុំទី១៤ លើកទី១ ពលរដ្ឋបានបើកប្រាក់ឧបត្ថម្ភ មានចំនួន ២២ ៨៧៣គ្រួសារ។

ក្នុងនោះ ប្រជាពលរដ្ឋដែលមានជីវភាពខ្វះខាតរស់នៅភូមិត្រពាំងធំ ឃុំត្រពាំងធំ ស្រុកទឹកឈូ បានប្រាប់ឲ្យដឹងដែរថា ពួកគាត់​ពិតជា​សប្បាយចិត្តខ្លាំង នៅពេលដែលអាជ្ញាធរ ពិសេសរាជរដ្ឋាភិបាល ​ក្រោមការដឹកនាំរបស់ សម្តេចតេជោ ហ៊ុន សែន តែងបានគិតគូរដល់សុខទុក្ខរបស់ពលរដ្ឋ មិនទុកឲ្យពលរដ្ឋណាម្នាក់ រស់នៅរងា ឬស្លាប់ដោយអត់អាហារនោះទេ។ ការឧបត្តម្ភសាច់ប្រាក់នេះ ពិតជាបានជួយសម្រួលដល់ជីវភាពពួកគាត់បានច្រើន។

បើតាមមន្ត្រីអនុវត្តកម្មវិធីឧបត្ថម្ភសាច់ប្រាក់ នៃមន្ទីរសង្គមកិច្ច លោក ឡុង បូរេត បានឲ្យដឹងដែរថា សម្រាប់ខេត្តកំពត ចំនួនទឹកប្រាក់ឧបត្ថម្ភដល់គ្រួសារខ្វះខាតខុសៗគ្នា ទៅតាមស្ថានភាពជាក់ស្តែងរបស់គ្រួសារនីមួយៗ ប៉ុន្តែនិយាយជារួម ក្នុងមួយគ្រួសារ អាចបើកបានន្លោះពី ១៥ម៉ឺនរៀល ទៅជាង ៤០ម៉ឺនរៀល ក្នុងមួយខែ៕

អត្ថបទ៖សឹង រ៉ាត់