លោក ជុំ សុន្ទរី ស្នើកាណាដា ជួយកម្ពុជាដោះមីនឱ្យអស់នៅឆ្នាំ ២០២៥

រដ្ឋលេខាធិការ ក្រសួងការបរទេសកម្ពុជា លោក ជុំ សុន្ទរី  បានស្នើដល់កាណាដា ឱ្យមានការរួមចំណែកជួយដល់កម្ពុជា សម្រេចបាននូវដោះមីនឱ្យអស់ពីផ្ទៃដីប្រទេសកម្ពុជាក្នុងឆ្នាំ ២០២៥ ។  លោក ជុំ សុន្ទរី បានស្នើបែបនេះក្នុងជំនួបសម្តែងការគួរសមពី លោក ដេវីដ វីប្យូសស្គី ភារធារីតំណាងការិយាល័យស្ថានទូតកាណាដា នៅភ្នំពេញ។

លើសពីនេះ កំឡុងជំនួបកាលពីថ្ងៃទី២១ ខែកញ្ញា ឆ្នាំ២០២៣  នៅចំពោះមុខ លោក ដេវីដ វីប្យូសស្គី ភារធារីតំណាងការិយាល័យស្ថានទូតកាណាដា នៅភ្នំពេញ  លោក  ជុំ សុន្ទរី បានរំលឹកពីជំនួបទ្វេភាគីរវាងសម្តេចតេជោ ហ៊ុន សែន និងនាយករដ្ឋមន្ត្រីកាណាដា ដែលមេដឹកនាំទាំងពីរបានពិភាក្សាអំពីជំនួយរបស់ប្រទេសកាណាដាក្នុងការបោសសម្អាត មីននៅកម្ពុជា។

ជាមួយគ្នានេះ ភាគីទាំងពីរបានកត់សម្គាល់ដោយការពេញចិត្តចំពោះទំនាក់ទំនងល្អរវាងកម្ពុជា និងកាណាដា និងបានពិភាក្សាអំពីមធ្យោបាយ ក្នុងការពង្រឹងបន្ថែមទៀតនូវកិច្ចសហប្រតិបត្តិការទ្វេភាគីលើវិស័យផ្សេងៗ រួមទាំងវិស័យដោះមីន ប្រតិបត្តិការរក្សាសន្តិភាព អប់រំ ពាណិជ្ជកម្ម និងទេសចរណ៍។

ភាគីទាំងពីរ មានទស្សនៈដូចគ្នា ក្នុងការពន្លឿនដំណើរការនៃការបង្កើតកិច្ចពិគ្រោះយោបល់ទ្វេភាគីរវាងក្រសួងការបរទេសទាំងពីរ ដែលនឹងក្លាយជាទីកន្លែងមួយដ៏ល្អក្នុងការស្វែងរក កិច្ចសហប្រតិបត្តិការដើម្បីផលប្រយោជន៍រួមរបស់ប្រទេសទាំងពីរ។

ក្នុងក្របខ័ណ្ឌអាស៊ាន ដោយវាយតម្លៃពីការចូលរួមដ៏សកម្មរបស់កាណាដា លោក ជុំ សុន្ទរី បានអបអរសាទរចំពោះការដំឡើងទំនាក់ទំនងអាស៊ាន-កាណាដាទៅជាភាពជាដៃគូយុទ្ធសាស្ត្រ ជាផ្លូវការនៅក្នុងខែកញ្ញាឆ្នាំ២០២៣នេះ។ ខណៈនោះ លោក ដេវីដ វីប្យូសស្គី បានវាយតម្លៃខ្ពស់ចំពោះការគាំទ្រដ៏រឹងមាំរបស់កម្ពុជាក្នុងដំណើរការនេះ។

ជាចុងក្រោយ លោក ជុំ សុន្ទរី និង លោក​ដេវីដ វីប្យូសស្គី ក៏បានសម្តែងក្តីសោមនស្ស ចំពោះវឌ្ឍនភាពក្នុងការចរចាកិច្ចព្រមព្រៀងពាណិជ្ជកម្មសេរីអាស៊ាន- កាណាដាផងដែរ ៕

ដោយ៖ ង៉ិល ណារ៉ាត់