នារីចល័តចរ ទទូចឱ្យសាធារណជន កុំចែករំលែកអ្វីដែលប៉ះពាល់ដល់តម្លៃជាតិ ព្រោះខាតប្រយោជន៍ទាំងទេសចរណ៍

ត្រឹមតែការចែករំលែក វីដេអូអ្នកបំពុលសង្គមម្នាក់ដែលហូបកន្លាត ធ្វើឱ្យទេសចរអន្តរជាតិ យល់ថា ប្រជាពលរដ្ឋកម្ពុជា និយមទទួលទានសត្វកន្លាតជាអាហារ។ នេះបើតាមការបញ្ជាក់ពី កញ្ញា ឃន លាងអេង នៅក្នុងវីដេអូឃ្លីបខ្លី ជិត២នាទី នៅថ្ងៃទី២៦ ខែតុលានេះ។

កញ្ញា ឃន លាងអេង ដែលគេស្គាល់ថា “នារីចល័តចរ” ជាអ្នកដែលតែងចែករំលែក ពីការផ្សងព្រេងបែបដើរព្រៃបោះតង់ និង​ពី​តំបន់ទេសចរណ៍មួយចំនួន​ នៅក្នុងព្រះរាជាណាចក្រកម្ពុជា នៅថ្ងៃនេះ បានចែករំលែករឿងរ៉ាវមួយ ទាក់ទងនឹង ទេសចរបរទេសជនជាតិអូស្ត្រាលី ២រូប ដែលកំពុងធ្វើដំណើរកម្សាន្ត តាមតំបន់មួយចំនួន នៅកម្ពុជា បន្ទាប់ពីអ្នកទាំងពីរ បានលើកជាសំណួរទៅកាន់ក្រុមកញ្ញាថា “តើប្រជាជនកម្ពុជា ពិតជាទទួលកន្លាតមែនឬ?”។

បន្ទាប់ពីបានលឺសំណួរនេះ កញ្ញា ឃន លាងអេង សម្តែងការហួសចិត្ត ដោយមិននឹកស្មានថា គ្រាន់តែវីដេអូល្បីមួយ ធ្វើ​ឱ្យ​គេម៉ៃពលរដ្ឋកម្ពុជាទាំងអស់។ ទន្ទឹមនោះ កញ្ញា និងមិត្តភក្តិរួមដំណើរកម្សាន្តជាមួយ បានពន្យល់ និងបកស្រាយជុំវិញការយល់ច្រឡំនេះ ដល់ជនបរទេសទាំងពីររួចហើយ។

បើតាម កញ្ញា ឃន លាងអេង រាល់ទង្វើ និងសកម្មភាពដែលពលរដ្ឋកម្ពុជាធ្វើ សុទ្ធតែអាចឆ្លុះបញ្ចាំងពីអត្តសញ្ញាណខ្មែរ ហេតុនេះ កញ្ញាសំណូមពរឱ្យពលរដ្ឋកម្ពុជាទាំងអស់ កុំចូលរួមចែករំលែករឿងរ៉ាវមិនល្អ ដែលប៉ះពាល់ដល់មុខមាត់ ប្រទេសជាតិ ព្រោះរឿងខ្លះ មិនត្រឹមប៉ះពាល់ដល់មុខមាត់ជាតិទេ ថែមទាំងធ្វើឱ្យប៉ះពាល់ដល់វិស័យទេសចរណ៍ផងដែរ៕

អត្ថបទ៖ សុធាវី