សេដ្ឋវិទូ ជំរុញសហគ្រិនខ្មែរ អភិវឌ្ឍវិស័យ​សេវាកម្ម​ ដើម្បីកាលានុវត្តភាពកម្ពុជា​

សេដ្ឋវិទូកម្ពុជា បានជំរុញឱ្យសហគ្រិនវ័យក្មេង ស្វែងយល់ឱ្យបានច្រើនអំពីវិស័យសេវាកម្មសម្រាប់កាលា​នុវត្តភាពកម្ពុជា។

លោកបណ្ឌិត សុក ស៊ីផាន់ណា ទេសរដ្ឋមន្ត្រីទទួលបន្ទុកបេសកកម្មពិសេស បានលើកឡើងថា វិស័យសេវាកម្ម​នៅកម្ពុជា មានដូចជា សេវាកម្មដឹកជញ្ជូន សេវាកម្មសំណង់ វិស្វកម្ម សេវាកម្មចែកចាយ អប់រំ បរិស្ថាន ហិរញ្ញវត្ថុ សុខាភិបាល ទេសចរណ៍​ និងកីឡា ជាដើម ដែលនៅក្នុង Category WTO មានជាង ១០០ប្រភេទ និងអនុប្រភេទ។

នៅក្នុងការធ្វើបាឋកថា ក្រោមប្រធានបទស្ដីពី«ការវិភាគលើគតិយុត្តនៃកិច្ចព្រមព្រៀងភាពជាដៃគូសេដ្ឋកិច្ចគ្រប់​ជ្រុងជ្រោយ​ក្នុងតំបន់» នាថ្ងៃទី ២១ វិច្ឆិកា នៅក្រសួងព័ត៌មាន លោកបណ្ឌិត បានមើលឃើញថា ក្នុងរយៈពេល ២០ឆ្នាំចុងក្រោយនេះ វិស័យដែលបានរៀបរាប់ខាងលើ មានភាពជឿនលឿនច្រើន។ ជាការកត់សម្គាល់​មួយទៅ​លើវិស័យស្ថាបត្យកម្ម កូនខ្មែរមានជំនាញខ្ពស់ផ្នែកឌីហ្សាញ មិនចាញ់បរទេសនោះទេ។ ​ជាក់ស្តែងហាងកាហ្វេ Brown ដែលរចនា និងបង្កើតដោយកូនខ្មែរ មិនចាញ់ Starbucks ប៉ុន្មានឡើយ។ នេះជាការបន្ថែមរបស់បណ្ឌិត ស៊ីផាន់ណា។

ទោះយ៉ាង ដើម្បីអភិវឌ្ឍវិស័យសេវាកម្មកម្ពុជា ឱ្យមានសន្ទុះនិងរីកចម្រើនខ្លាំង លោកបណ្ឌិត សុក ស៊ីផាន់ណា លើកទឹកចិត្តដល់យុវជន ជាពិសេសសហគ្រិនវ័យក្មេង ត្រូវរៀនសូត្រពីក្រុមហ៊ុនបរទេសជាមុន ឬចូលហ៊ុនជាមួយ​ក្រុមហ៊ុនជំនាញរយៈពេល ៥ទៅ ១០ឆ្នាំសិន ដើម្បីទទួលបានបទពិសោធន៍ និងកេរ្តិ៍ឈ្មោះ ទើបជោគជ័យ​នៅក្នុងអាជីវកម្ម។

ជាក់ស្តែងវិស័យសេវាកម្មនៅប្រទេសថៃ និងឥណ្ឌូនេស៊ី ដែលកំពុងរីកចម្រើនខ្លាំង ភាគរច្រើនពួកគេតែងឆក់​ឱកាសចូលបម្រើការងារជាមួយក្រុមហ៊ុនបរទេស ឬទិញហ៊ុនក្នុងផ្នែកតូចមួយដើម្បីបានរៀនសូត្រ។ ក្រោយពេល​ទទួលបានបទពិសោធន៍ពួកគេនឹងផ្តាច់ខ្លួន បង្កើតក្រុមហ៊ុនប្រើឈ្មោះរបស់គេវិញ ក្នុងការធ្វើអាជីវកម្ម។

បច្ចុប្បន្ននេះ កម្ពុជា ក៏បានប្រជែងជាមួយនឹងប្រទេសជិតខាងផងដែរទៅលើផ្នែកមួយចំនួន ដូចជាសណ្ឋាគារជាដើម ដែលកាលពីមុនភាគច្រើនក្រុមហ៊ុនបរទេសជាអ្នកគ្រប់គ្រង ប៉ុន្តែសព្វថ្ងៃ ភាគច្រើនមានថៅកែកូនខ្មែរ៕