អ្នកជំនាញសេដ្ឋកិច្ច៖ មានវិធានការ២ ដែលអាចជួយកាត់បន្ថយចំនួនអ្នកជក់បារីនៅកម្ពុជា

លោក បណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិតសភាកម្ពុជា នៅក្នុងកិច្ចសម្ភាសជាមួយ «កម្ពុជាថ្មី» បានលើកឡើងថា ដើម្បីអាចជួយកាត់បន្ថយចំនួនអ្នកជក់បារីបាន គឺមានវិធានការ ២យ៉ាង ទី១.វិធានការពន្ធ និងទី២.វិធានការមិនមែនពន្ធ។

លោកបណ្ឌិត បានឱ្យដឹងថា កន្លងមករាជរដ្ឋាភិបាលកម្ពុជា បានអនុវត្តនូវវិធានការទាំង២នេះ ហើយក្នុងនោះ វិធានការមិនមែនពន្ធ ដែលមានដូចជា ហាមការផ្សព្វផ្សាយបារី ហាមការតាំងបារី និងការដាក់រូបជំងឺមហារីកផ្សេងៗនៅលើកញ្ចប់បារី ជាដើម។ ប៉ុន្តែ វិធានការមួយនះ ហាក់បីដូចជាមិនសូវមានប្រសិទ្ធិភាពនោះទេ ដោយសារតែប្រជាពលរដ្ឋដែលបានឃើញកញ្ចប់បារីដែលមានរូបជំងឺមហារី ឬរូបខូចសួតនោះ គឺមានការភ័យខ្លាចតែដំបូងតែប៉ុណ្ណោះ។

រីឯ វិធានការមួយទៀត គឺរាជរដ្ឋាភិបាលត្រូវដំឡើងពន្ធបារីឱ្យកាន់តែខ្ពស់ ដើម្បីទប់ស្កាត់ការជក់បារី។ លោកថា​ ការដំឡើងពន្ធនេះ សម្រាប់អ្នកដែលញៀនបារី ទោះបីមិនអាចឱ្យពួកគាត់ឈប់ជក់បាន តែអាចធ្វើឱ្យអ្នកដែលចង់សាកជក់បារី អាចនឹងឈប់ចង់ជក់វិញ ដោយសារតែត្រូវចំណាយថ្លៃបារីខ្ពស់ជាងមុន។ ដូច្នេះ លោកយល់ថា វិធានការពន្ធ អាចនឹងមានប្រសិទ្ធិភាពសម្រាប់អ្នកជំនាន់ក្រោយ។

ជាមួយគ្នានេះ លោកបណ្ឌិត បានបញ្ជាក់ថា​ ការយកពន្ធបារី មិនអាចប៉ះពាល់ដល់ការប្រមូលពន្ធរបស់រដ្ឋនោះទេ មានតែជួយសន្សំសំចៃថវិការរដ្ឋ ដែលត្រូវចំណាយនៅពេលអនាគតថែមទៀត ព្រោះយ៉ាងណា រដ្ឋាភិបាលត្រូវចំណាយទៅលើវិសយ័យសុខភាពរបស់ប្រជាពលរដ្ឋ។ ហេតុនេះ ទោះបីការដំឡើងពន្ធ អាចបាត់បង់ពន្ធនៅពេលនេះតិចតួច តែទៅអនាគតអាចនឹងកើនមកវិញ។

បន្ថែមពីនេះ ការដំឡើងពន្ធបារី បានជួយទប់ស្កាត់ការចំណាយរបស់រដ្ឋនៅពេលខាងមុខ ដើម្បីបង្កើតការសន្សំថវិកាជាតិឱ្យបានច្រើនជាងមុន។ ជាពិសេស សន្សំថវិកាជាតិសម្រាប់យកទៅហិរញ្ញបទានលើវិស័យផ្សេងៗ ដូចជាការគាំពាដល់ការរីកចម្រើននៃសេដ្ឋកិច្ច ឱ្យកាន់តែមានភាពប្រសើរឡើង​ និងរីកចម្រើនជាងមុន ជាជាងធ្វើឱ្យមនុស្សឈឺកាន់តែច្រើន។ លោកបណ្ឌិតថា នៅក្នុងចំណោមបណ្តាប្រទេសអាស៊ាន ប្រទេសកម្ពុជាមានការយកពន្ធលើថ្នាំជក់ទាបជាងគេ បើប្រៀបធៀបទៅនឹងប្រទេសថៃ ទាបជាងរហូតដល់ ៧៨% ឯណោះ៕