សាច់ញាតិ កំពុងតាមរកឪពុកវង្វេងបាត់ខ្លួននៅពេលមកមើល​ប្រពន្ធឈឺ​នៅមន្ទីរពេទ្យនៅភ្នំពេញ

ក្រុមគ្រួសារសាច់ញាតិកំពុងបន្តស្វែងរកបុរសវ័យ៥៤ ឆ្នាំម្នាក់ដែលត្រូវជាឪពុក បាន វង្វេង​បាត់​ខ្លួន​នៅទីក្រុងភ្នំពេញ ក្នុងពេលដែលមកមើលប្រពន្ធឈឺនៅមន្ទីរពេទ្យបង្អែក សម្ភពក្រុង កាល​ពីម៉ោង ៧ ព្រឹកថ្ងៃទី ១៤ ខែកុម្ភៈ ឆ្នាំ ២០២០។

សាច់ញាតិបុរសដែលវង្វេងត្រូវជាកូនប្រសារ លោក កង សាវុធ បានប្រាប់កម្ពុជាថ្មីនៅព្រឹកនេះថា ឪពុករបស់លោក បានបាត់ខ្លួន២ ថ្ងៃហើយនៅមិនទាន់រកឃើញ ដោយលោកបានទាក់​ទងទៅឯស្រុកកំណើត នឹងប្តឹងសមត្ថកិច្ចឲ្យជួយរកតែនៅមិនទាន់ឃើញនោះទេ។

លោកប្រាប់ថា ការបាត់ខ្លួនឪពុករបស់លោក ដោយសារគាត់មានអាការៈមិនប្រក្រតី ស្រដៀងនិងជំងឺសសៃប្រសាទ។ លោកថា “គាត់វង្វេងស្មារតីមួយភាំងៗ ដូចមានស្អីនាំគាត់ចេះតែដើរៗចឹង ហើយទីក្រុងភ្នំពេញជាលើកទី១ ដែលគាត់ទើបមកបានម្តង”។

លោកបន្តថា ករណីបែបនេះធ្លាប់កើតឡើងម្តងទៅលើរូបគាត់ប៉ុន្មានឆ្នាំមុន ហើយលោកក៏អំពាវនាវដល់ប្រជាពលរដ្ឋ បើបានឃើញសូមជួយផ្តល់ដំណឹងតាមរយៈលេខ ទូរស័ព្ទ ០៩២៧៦៩៧៣៧ ដែលលោកប្រាប់ថា ឪពុករបស់លោកជាមនុស្សស្លូតបូត កុំឲ្យប្រជាពលរដ្ឋយល់ច្រឡំថាគាត់ជាមនុស្សអាក្រក់ ជាចោរ ឬអី លោកបារម្ភខ្លាំងពីសុវត្ថិភាពឪពុករបស់លោក ដែលបានបាត់ខ្លួន ២ ថ្ងៃមកនេះ ហើយក្រុមគ្រួសារក៏កំពុងបន្តស្វះស្វែងរក។

សាច់ញាតិដែលវង្វេងបានប្រាប់ថា ឪពុករបស់ខ្លួន មានឈ្មោះ ឃឹម ឈុំ អាយុ ៥៤ ឆ្នាំ មានស្រុកកំណើតនៅខេត្តកំពត៕

អត្ថបទ៖ ឡេង ដេត