តារាសម្ដែងលោក Julian Sands បាត់ខ្លួនមួយសប្ដាហ៍ហើយ

តារាសម្ដែងជនជាតិអង់គ្លេសលោក Julian Sands ត្រូវគេស្គាល់ថាជាតួសម្ដែងក្នុងរឿង “A Room With a View, Naked Lunch និង Leaving Las Vegas” បានបាត់ខ្លួនបន្ទាប់ពីធ្វើដំណើរឡើងភ្នំ San Gabriel ភាគខាងត្បូងរដ្ឋកាលីហ្វ័រញ៉ាតាំងពីថ្ងៃសុក្រ ថ្ងៃទី១៣ ខែមករា មកម្ល៉េះ ។

ចាប់តាំងពីការបាត់ខ្លួនរបស់តារាសម្ដែងវ័យ ៦៥ឆ្នាំរូបនេះមក ក្រុមជួយសង្គ្រោះកំពុងធ្វើការស្វះស្វែងរកលោកយ៉ាងស្វាហាប់ ប៉ុន្តែពួកគេត្រូវបញ្ឈប់សកម្មភាពរកវិញដោយសារតែស្ថានភាពកាន់តែគ្រោះថ្នាក់។ ក្នុងបេសកកម្មស្វែងរកលោក Julian អាជ្ញាធរបានប្រើប្រាស់ឧទ្ធម្ភាគចក្រ និងដ្រូនជាច្រើនដើម្បីពង្រឹងការស្វែងរកឲ្យកាន់តែមានប្រសិទ្ធិភាពជាងមុន ។ សូមបញ្ជាក់ផងដែរថា រដ្ឋកាលីហ្វ័រញ៉ាភាគខាងត្បូងបានរងការវាយប្រហារដោយព្យុះក្នុងរយៈពេលប៉ុន្មានសប្តាហ៍ថ្មីៗនេះបណ្ដាលឲ្យភ្នំលិចលង់ក្នុងព្រិល និងទឹកកក ដូចនេះវាមានគ្រោះថ្នាក់ខ្លាំងណាស់ សូម្បីតែអ្នកឡើងភ្នំដែលមានបទពិសោធន៍ក៏មិនអាចរួចខ្លួនដែរ ។ ជាក់ស្ដែងក្នុងឆ្នាំ ១៩៩០ លោក Julian បានជួបគ្រោះថ្នាក់ម្ដងហើយព្រោះកាលនោះអំឡុងពេលឡើងភ្នំកម្ពស់ ២ម៉ឺនហ្វីត លោកត្រូវរងការវាយប្រហារពីព្យុះដ៏សាហាវដូចគ្នា សំណាងល្អមានជំនួយទាន់ពេលវេលាទើបផុតគ្រោះថ្នាក់ ។

ជាមួយគ្នានេះដែរ លោក Julian មិនមែនជាជនរងគ្រោះតែម្នាក់ទេ អាជ្ញាធរកំពុងស្វែងរកអ្នកឡើងភ្នំម្នាក់ទៀតឈ្មោះ Bob Gregory ដែលបានបាត់ខ្លួនកាលពីថ្ងៃចន្ទដូចគ្នា ៕

ប្រែសម្រួលដោយ ៖ វារី

ចុចអាន ៖ ក្មេងស្រីប៉ាគីស្ថានពីរនាក់បាត់ខ្លួនពីផ្ទះ ស្មានតែគេចាប់ជំរិត ចុងក្រោយទើបដឹងថាពួកនាងស្កាត់ទៅជួប BTS