នាយករដ្ឋមន្ត្រី ប្រកាសថា មន្ត្រីរាជការរូបណាឲ្យតែរកឃើញពាក់ព័ន្ធគ្រឿងញៀន ត្រូវបណ្ដេញចេញពីក្របខណ្ឌ

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ប្រកាសថា សម្ដេច ទើបតែចុះហត្ថលេខាលើបទបញ្ជាមួយ ដោយតម្រូវឲ្យមានការត្រួតពិនិត្យរកសារធាតុញៀន លើមន្ត្រីរាជការស៊ីវិល និងកងកម្លាំងប្រដាប់អាវុធបន្ថែមទៀត ទាំងថ្នាក់ជាតិ និងថ្នាក់ក្រោមជាតិ។ នៅពេលរកឃើញមន្ត្រីរាជការរូបណា ទាំងស៊ីវិល និងកងកម្លាំង ត្រូវតែបណ្ដេញចេញពីក្របខណ្ឌ ដោយមិនមានការលើកលែងឡើយ។

ការប្រកាសនេះ ធ្វើឡើងក្នុងពិធីបិទសន្និបាតបូកសរុបការងារត្រួតពិនិត្យគ្រឿងញៀនឆ្នាំ ២០២៣ និងលើកទិសដៅការងារឆ្នាំ ២០២៤ និងផ្សព្វផ្សាយផែនការយុទ្ធនាការលើកទី ៩ នាល្ងាចថ្ងៃទី ២០ ខែកុម្ភៈ ឆ្នាំ ២០២៤នេះ។   

សម្ដេចនាយករដ្ឋមន្ត្រី បានថ្លែងថា «មិញ ខ្ញុំទើបស៊ីញ៉េបទបញ្ជាមួយរបស់រាជរដ្ឋាភិបាល គឺពន្លាតនូវការអនុវត្តនេះទូទាំងរាជរដ្ឋាភិបាលតែម្ដង បានន័យថា មន្ត្រីរាជការស៊ីវិល កងកម្លាំងប្រដាប់អាវុធ ទាំងថ្នាក់ជាតិ និងក្រោមជាតិ ឲ្យតែរកឃើញថា មានប្រើប្រាស់គ្រឿងញៀន ឬពាក់ព័ន្ធត្រូវបណ្ដេញចេញពីក្របខណ្ឌ អត់ទុកទេ»។

សម្ដេចធិបតី ហ៊ុន ម៉ាណែត បានថ្លែងបន្តថា កន្លងមក មានការអនុវត្តរួចហើយ ទៅលើកងកម្លាំងប្រដាប់អាវុធ រួមមាន៖ នគរបាល និងកងទ័ព ហើយចាប់ពីពេលនេះតទៅ មន្ត្រីរាជការស៊ីវិលក៏ដូចគ្នាដែរ។ ការអនុវត្តយ៉ាងដូច្នេះ គឺដើម្បីពង្រឹងវិន័យ សីលធម៌ និងការទទួលខុសត្រូវ សម្រាប់មន្ត្រីរាជការម្នាក់ៗ សម្រាប់ធ្វើជាគំរូដល់ប្រជាពលរដ្ឋ៕