កូវីដរាលដាលដល់ ០៣ ខេត្តក្រុង អ្នកឆ្លងបន្តកើនឡើងជារៀងរាល់ថ្ងៃ

ការផ្ទុះកូវិដក្នុងព្រឹត្តិការណ៍ ២០ កុម្ភៈ បានរាលដាលដល់ខេត្តក្រុងចំនួន ០៣ គិតត្រឹមថ្ងៃ ២៤ កុម្ភៈ ២០២១។

រាជធានីភ្នំពេញ ​ខេត្តកណ្ដាល​ និង​ខេត្តព្រះសីហនុ ត្រូវ​បាន​ដាក់ក្នុង​ការ​ប្រុង​ប្រយ័ត្ន បន្ទាប់ពី​រកឃើញ​អ្នកពាក់ព័ន្ធ និង​អ្នក​ឆ្លងកូវីដ ១៩​ជាប​ន្តបន្ទាប់។

រាជធានីភ្នំពេញមាន​អត្រា​អ្នក​ឆ្លង​ខ្ពស់​បំផុត ដែល​មក​ដល់​ពេលនេះ​មាន​ជាង ១០០ ករណី ក្នុង​ចំណោម​ ១៣៧ នាក់ ហើយ​ខេត្តព្រះសីហនុ ទើបរកឃើញករណី​ឆ្លងជា​លើក​ដំបូង​លើស្រ្តីជនជាតិចិន ០២ នាក់​។

ការផ្ទុះក្នុងសហគមន៍ ២០ កុម្ភៈ លើកនេះមានសភាពធ្ងន់ធ្ងរ។ គួរឲ្យបារម្ភនោះ កូវិដបំប្លែងខ្លួន​ត្រូវ​បាន​រកឃើញ​លើ​ជនរងគ្រោះ​ចំនួន​ ០៦ ករណី ដែលមន្រ្តីសុខាភិបាលលើកឡើងពិបាកគ្រប់គ្រង និង​មាន​ការ​ឆ្លងរាលដាលលឿន។

ចុចអាន៖ ម៉ោង ៣ ទាប​ភ្លឺ ​ទទួល​ព័ត៌មាន​អ្នក​ឆ្លង​កូវីដ ១៥ នាក់​ទៀត មន្រ្តី​កំពុង​ស្វែង​រក​មកព្យាបាល

ដោយសារ​ចំនួន​អ្នក​ឆ្លងកើន​ឡើង​ជា​រៀងរាល់ថ្ងៃ រដ្ឋាភិបាលបានបញ្ជា​ឲ្យផ្អាក​បណ្តោះអាសន្ន​សាលារៀនក្នុងរាជធានីនិងខេត្តកណ្តាលយ៉ាងតិច២សប្តាហ៍។ ទីតាំងចំនួន ៤៧ ក្នុង​ក្រុង​ភ្នំពេញ ត្រូវបានអាជ្ញាធរចុះ​បិទ​ភ្លាមៗ ដោយសារមានពាក់ព័ន្ធអ្នកឆ្លងកូវីដ។

បន្ត​ចុចអាន៖ លម្អិត​ឈ្នោះ​ទីតាំងថ្មីៗ​ជាង ៤៧ កន្លែង​ទៀត សង្ស័យ​មាន​អ្នក​ឆ្លង​កូវីដ ១៩ អាជ្ញាធរ​បាន​ចុះ​បិទ

ការរៀបចំពិធីមង្គលការក៏ស្នើឲ្យមានការពន្យាពេល ឬក៏កាត់បន្ថយចំនួនមនុស្សចូលរួម។ រដ្ឋាភិបាលបានអំពាវនាវប្រជាពលរដ្ឋ បើមិនមានការចាំបាច់កុំចាកចេញពីផ្ទះ ដើម្បីទប់ស្កាត់ការឆ្លងបន្តចូលសហគមន៍កាន់តែធ្ងន់ធ្ងរ៕

អត្ថបទ៖ ប៊ុណ្ណារ៉ា