សម្ដេចកិត្តិព្រឹទ្ធបណ្ឌិត ប៊ុន រ៉ានីហ៊ុន សែន យួរកាបូបខ្មែរ ច្នៃ​ពី​កំប្លោក

សម្តេចតេជោ ហ៊ុន សែន នាយករដ្ឋមន្រ្តី​កម្ពុជាបានកោត​សរសើរ ​ដែល​ឃើញ​សិប្បកម្មខ្មែរ​នៅ​ខេត្ត​សៀមរាប ​បាន​យក​កំប្លោក ច្នៃ​ជាគ្រឿង​ប្រើប្រាស់​យ៉ាង​ល្អ​វិសេស។

នៅលើ​បណ្តាញសង្គម សម្តេច​តេជោបាន​លើក​ពី​កាបូបខ្មែរដែលធ្វើពីកំប្លោក ដែល​សិប្បកម្មមួយ​នៅ​ខេត្ត​សៀមរាប​បាន​ច្នៃ​ឡើង​ ទទួលបាន​ការ​គាំទ្រ​ពី​ភរិយា​របស់​សម្តេចគឺ​សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និង​ស្រ្តី​ជា​ច្រើនទៀត។

សម្តេច​បានលើក​ឡើង​ពី​រុក្ខជាតិ​ដុះ​ក្នុង​ទឹក​នេះ បើ​មាន​ការ​កែច្នៃ​ច្រើន​អាច​រក​ចំណូល និងបង្កើតបានការងារធ្វើសម្រាប់ប្រជាជន។

ដើមកំប្លោកមានប្រយោជន៍​អាច​ប្រើប្រាស់​បាន​ច្រើន​យ៉ាង រួមទាំង​ជា​វត្ថុធាតុដើម​ដែល​អាច​កែច្នៃ​ទៅ​ជា​សម្ភាៈប្រើប្រាស់​រួម​ទាំង​​គ្រឿងសង្ហារិម ដូចជា​កៅអី តុ សាឡុង ភាពរឹងមាំមិនចាញ់គ្រឿងសង្ហារឹមដែលធ្វើពីជ័រនិងឈើ។

សិប្បកម្ម​កំប្លោក មានច្រើននៅតំបន់​ភ្នំ​ក្រោមខេត្ត​សៀមរាប។ កំប្លោក​ត្រូវ​បាន​កែច្នៃ​ទៅ​ជា​វត្ថុ​អនុស្សាវរីយ៍​ និងរបស់របរប្រើប្រាស់ដល់​ភ្ញៀវ​ទេសចរ និង​ទទួល​បាន​ការ​គាំទ្រ​នាំ​ចេញទៅលក់​នៅ​ក្រៅ​ប្រទេស​ដូចជាអេស្ប៉ាញ ឥណ្ឌូណេស៊ី ជប៉ុន និងកូរ៉េ ជាដើម៕

អត្ថបទ៖ ប៊ុណ្ណារ៉ា