កម្ពុជា ប្រកាស​នឹង​ធ្វើការ​ជាមួយប្រទេស​ដៃគូ ដើម្បី​ដោះស្រាយបញ្ហា​ការ​ប្រែប្រួលអាកាសធាតុ

ថ្លែងនៅឯព្រលានយន្តហោះអន្តរជាតិភ្នំពេញ នាយប់ថ្ងៃអាទិត្យទី ១៧ ខែវិច្ឆិកា ឆ្នាំ២០២៤ ក្នុងឱកាសដឹកនាំប្រតិភូជាន់ខ្ពស់ របស់រាជរដ្ឋាភិបាលកម្ពុជា ចូលរួមសន្និសីទកំពូលលើកទី២៩ បណ្តារដ្ឋភាគីនៃអនុសញ្ញាក្របខណ្ឌសហប្រជាជាតិ ស្តីពីការប្រែប្រួលអាកាសធាតុ (COP) នាទីក្រុងបាគូ ប្រទេសអាស៊ែបៃហ្សង់ លោក អ៊ាង សុផល្លែត រដ្ឋមន្ត្រីក្រសួងបរិស្ថាន បានប្រកាស​ពីការ​ប្តេជ្ញាចិត្ត​របស់​កម្ពុជា​ ក្នុង​ការ​ធ្វើការ​រួមគ្នា​ជាមួយបណ្តាប្រទេសជាសមាជិករដ្ឋភាគី UNFCCC ក៏ដូចជាអង្គការដៃគូអភិវឌ្ឍន៍ ដើម្បីដោះស្រាយបញ្ហាការ​ប្រែប្រួលអាកាសធាតុ។

លោក​រដ្ឋមន្រ្តី​បានថ្លែង​ថា ក្នុងដំណើរការចូលរួមក្នុងសន្និសីទលើកទី២៩ COP29 នៅ​ប្រទេស​អាស៊ែបៃហ្សង់ កម្ពុជា​នឹង​ជម្រាបជូនបណ្តាប្រទេសទាំងអស់ អំពីការប្តេជ្ញាចិត្តរបស់កម្ពុជា និងសកម្មភាពការងារកន្លងមក ទៅលើ​ការទប់ស្កាត់ការ​កើន​ឡើងកំដៅផង ទប់ស្កាត់ការបំពុលបរិស្ថាន និងការទប់ស្កាត់ការប្រែប្រួលអាកាសធាតុផង។

បើតាមលោករដ្ឋមន្រ្តី ក្រសួងបរិស្ថានកម្ពុជាកំពុងតែអនុវត្តយុទ្ធសាស្រ្តចក្រាវិស័យបរិស្ថាន ដែលផ្តោតលើមុំយុទ្ធសាស្រ្ត ៣ គឺស្អាត បៃតង និងចីរភាព។

ការចេញដំណើរទៅកិច្ចប្រជុំនៅក្រៅប្រទេស គឺធ្វើយ៉ាង​ណា​ដើម្បីទំនាក់ទំនងជាមួយប្រទេស​ដៃគូ ភាគីអន្តរជាតិផង ក៏ដូចជាកៀរគរការគាំទ្រថវិកា ដើម្បីជំរុញធ្វើយ៉ាងណាឱ្យភាពស្អាតនិងបៃតងមានចីរភាពតរៀងទៅ។ កម្ពុជា បាន​ប្រកាស​ប្តេជ្ញាយកចិត្តទុកដាក់ធ្វើយ៉ាងណាឱ្យបរិស្ថានកម្ពុជាធានាបានការគ្រប់គ្រងបានល្អ រួមជាមួយពិភពលោក ក៏ដូចជាការសហការជាមួយអង្គការដៃគូផ្សេងៗទៀត។ លោក អ៊ាង សុផល្លែត​ បញ្ជាក់​បន្ថែម។

លោក​រដ្ឋមន្រ្តី​បានលើកឡើង​ពីការ​ចូលរួម​ដោះស្រាយបញ្ហាប្រែប្រួលអាកាសធាតុក្នុងនោះទី១ គឺការ​រួមគ្នាជាមួយបណ្តាប្រទេសដទៃទៀត ដែល​មានដៃគូអភិវឌ្ឍន៍ អង្គការ អ្នកវិទ្យាសាស្រ្ត ដើម្បីដោះស្រាយបញ្ហាទប់ស្កាត់ការ​ប្រែប្រួលអាកាសធាតុ ទី២ រួមគ្នាទប់ស្កាត់ការកើនឡើងកំដៅនៅលើភពផែនដីកុំ​ឲ្យ​លើសពី ១,៥ អង្សារ និង​​ទី៣ គៀរគរថវិកាឱ្យបាន ១០០ ពាន់លានដុល្លារក្នុង ១ ឆ្នាំ ដើម្បីយកថវិកាទាំងអស់នោះ​មកជួយប្រទេសកំពុងអភិវឌ្ឍ ដើម្បី​កុំ​ឱ្យប្រទេសទាំងនោះ​ជួបគ្រោះមហន្តរាយ ដោយសារការកើនឡើងកំដៅនិងប្រយុទ្ធប្រឆាំងនឹងការប្រែប្រួលអាកាសធាតុ។

នៅក្នុងសន្និសីទ UNFCCC ប្រទេសអាស៊ែបៃហ្សង់ មន្រ្តីកម្ពុជា​ក៏និងមានជំនួបទ្វេភាគីបន្ថែមទៀត និង​កម្ពុជា​ក៏​នឹង​ស្នើសុំឱ្យមានការយកចិត្តទុកដាក់ ទៅលើការកាត់បន្ថយការសាយភាយឧស្ម័នកាបូនិក​ ដោយធ្វើការពិចារណាទទួលខុសត្រូវរបស់ប្រទេសអភិវឌ្ឍន៍ ដែលបានបង្កផលប៉ះពាល់ដល់ប្រទេសដទៃ ខណៈដែលកម្ពុជាមានទទួលខុសត្រូវខ្ពស់លើបញ្ហា​ទាំងនេះ។

ការដោះស្រាយបញ្ហាការប្រែប្រួលអាកាសធាតុមានវិស័យចំនួន ៦ គឺជាវិស័យដែលត្រូវយកចិត្តទុកដាក់ ទៅដល់ការបំពុលបរិស្ថាន ដល់ការកកើនឡើងកំដៅផែនដី និងការប្រែប្រួលអាកាសធាតុ ដែលអង្គការសហប្រជាជាតិ កំពុងផ្តោតលើការយកចិត្តទុកដាក់ខ្ពស់ ក្នុងនោះមាន៖ ទី១ វិស័យកសិកម្ម ទី២ វិស័យថាមពល ទី៣ វិស័យព្រៃឈើ ទី៤ វិស័យឧស្សាហកម្ម ទី៥វិស័យគីមី និងទី៦ គឺវិស័យការគ្រប់គ្រងសំរាមជាដើម។

ប្រទេស​កម្ពុជានៅតែបន្តធ្វើការប្តេជ្ញាចិត្ត ក្នុងការកាត់បន្ថយការសាយភាពឧស្ម័នផ្ទះកញ្ចក់ឱ្យបាន ៤២% នៅឆ្នាំ២០៣០ និងការឈានទៅជាប្រទេសអព្យាក្រឹតកាបូននៅឆ្នាំ២០៥០។ ក្រសួងបរិស្ថានកំពុងធ្វើការងារលើកិច្ចការងារជាច្រើនជាជំហានៗ ដែលមានការ​ចូលរួមពីប្រជាជន ក៏ដូចជាសិស្សានុសិស្ស ក្នុងការជួយដាំដើមឈើនៅឆ្នាំ​២០២៣ បាន​ ១ លានដើម ហើយនៅឆ្នាំ២០២៥ ខាងមុខនឹង​ឈានឡើងទៅប្រមាណចន្លោះពី ២ ទៅ ៣ លានដើម ដើម្បីពង្រីកគម្របព្រៃឈើ ដែលដើមឈើនេះគឺជាកត្តាសំខាន់នៅក្នុងការស្រូបយកកាបូន កាត់បន្ថយការសាយ​ភាយ ឧស្ម័នផ្ទះកញ្ចក់ ដែលនាំកម្ពុជាឈានឆ្ពោះទៅកាន់អព្យាក្រឹតកាបូននៅឆ្នាំ២០៥០៕