ព័ត៌មានជាតិ

អ្នកនាំពាក្យថា ការដកខ្លួនរបស់អាមេរិកពីកិច្ចព្រមព្រៀងប៉ារីសស្ដីពីអាកាសធាតុមិនប៉ះពាល់ដល់គម្រោងលក់កាបូនរបស់កម្ពុជាទេ

បានផុស

១ year មុន

នៅ

ថ្ងៃព្រហស្បតិ៍ ២៣ មករា ២០២៥

ដោយ

អនុរដ្ឋលេខាធិការ និងជាអ្នកនាំពាក្យក្រសួងបរិស្ថានលោក ខ្វៃ អាទិត្យា បានលើកឡើងថាការដកខ្លួនរបស់អាមេរិកចេញពីកិច្ចព្រមព្រៀងក្រុងបារីសស្ដីពីអាកាសធាតុមិនធ្វើឱ្យប៉ះពាល់ដល់កិច្ចគាំពារបរិស្ថានរបស់កម្ពុជាជាពិសេសគម្រោងលក់កាបូនរេដបូកនោះទេ។

រ៉េដបូកក៏ជាចំណែកមួយក្នុងកិច្ចព្រមព្រៀងក្រុងប៉ារីសស្ដីពីអាកាសធាតុនេះដែលបានតម្រូវប្រទេសអភិវឌ្ឍន៍ទាំងអស់អាចប្រើប្រាស់គម្រោងរេដបូកដើម្បីរួមចំណែកការឡើងកម្ដៅផែនដីតាមរយៈការទិញនូវកាបូនព្រៃឈើពីប្រទេសកំពុងអភិវឌ្ឍន៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រាប់កម្ពុជាថ្មីកាលពីថ្ងៃទី២២ ខែមករា ឆ្នាំ២០២៥ លោក ខ្វៃ អាទិត្យា បានលើកឡើងថាអាមេរិកធ្លាប់បានដកខ្លួនចេញពីកិច្ចព្រមព្រៀងបារីសស្ដីពីការប្រែប្រួលអាកាសធាតុម្ដងរួចហើយ ទោះជាយ៉ាងណាលោកយល់ថាក្នុងនាមជាប្រទេសសមាជិក និងប្រទេសដែលអភិវឌ្ឍន៍គួរមានកាតាព្វកិច្ចកាន់តែខ្លាំងដើម្បីជួយដល់ភពផែនដី។

លោកសរសេរមកកាន់កម្ពុជាថ្មីតាមសារអេឡិចត្រូនិចតេឡេក្រាមថា៖ «កម្ពុជាមិនបានធ្វើការជារដ្ឋាភិបាលអាមេរិកលើការងារនេះ(លក់កាបូន)នោះទេ យើងធ្វើកិច្ចសហការជាមួយក្រុមហ៊ុនឯកជនរបស់អាមេរិក»។

*អ្នកនាំពាក្យក្រសួងបរិស្ថានលោក ខ្វៃ អាទិត្យា*

ទីភ្នាក់ងារសហរដ្ឋអាមេរិកសម្រាប់កិច្ចអភិវឌ្ឍអន្តរជាតិ USAID បានឱ្យដឹងថាគិតត្រឹមខែសីហា ឆ្នាំ២០២៤ USAID កម្ពុជា បានគាំទ្រដល់ការអភិវឌ្ឍគម្រោងរេដបូកចំនួន៩នៅក្នុងប្រទេសកម្ពុជាចាប់តាំងពីឆ្នាំ ២០១២មក។ គម្រោងរេដបូក កែវសីមា ជាគម្រោងមួយក្នុងចំណោមគម្រោងទាំងនោះ។

កាលពីថ្ងៃច័ន្ទក្នុងពេលដែលលោក ដូណាល់ ត្រាំ ចូលកាន់ដំណែងជាប្រធានាធិបតីអាមេរិកលោកបានចុះហត្ថលេខាលើឯកសារមួយចំនួនក្នុងនោះក៏មានការដកខ្លួនចេញរបស់អាមេរិកពីកិច្ចព្រមព្រៀងក្រុងប៉ារីសស្ដីពីបរិស្ថានផងដែរដែលលោកថានឹងឱ្យអាមេរិកសល់លុយបានរាប់ពាន់លានបន្ទាប់ពីចាកចេញពីកិច្ចព្រមព្រៀងនេះ។

ទោះជាយ៉ាងណានាយកប្រចាំប្រទេសនៃអង្គការ WWF នៅកម្ពុជាលោក សេង ទៀក ថាលោកមិនបានពិនិត្យលម្អិតលើការដកខ្លួនរបស់អាមេរិកចេញពីកិច្ចព្រមព្រៀងបារីសស្ដីពីបរិស្ថាននេះនៅឡើយទេ តែលោកយល់ថាការដកខ្លួនរបស់អាមេរិកគឺពិតណាស់នឹងប៉ះពាល់ដល់កិច្ចគាំពារបរិស្ថានពិភពលោក។

លោក សេង ទៀក៖ «ព្រោះអាមេរិកជាអ្នកបំភាយឧស្ម័នច្រើនហើយបើដកខ្លួនវានឹងធ្វើឱ្យប៉ះពាល់ដែរ»។

កិច្ចព្រមព្រៀងទីក្រុងប៉ារីស គឺជាសន្ធិសញ្ញាអាកាសធាតុអន្តរជាតិ ដែលមានគោលបំណងកំណត់ការឡើងកំដៅផែនដីឱ្យនៅខាងក្រោម ២អង្សាសេ។ ដើម្បីសម្រេចគោលដៅនេះប្រទេសនានាមានបំណងកាត់បន្ថយឱ្យបានខ្ពស់បំផុតនៃការបំភាយឧស្ម័នផ្ទះកញ្ចក់ជាសកលតាមដែលអាចធ្វើទៅបាន ដើម្បីសម្រេចបាននូវពិភពអព្យាក្រឹតអាកាសធាតុនៅពាក់កណ្តាលសតវត្ស។ វាត្រូវបានអនុម័តដោយភាគីចំនួន១៩៦ នៅទីក្រុងប៉ារីសនៅថ្ងៃទី១២ ខែធ្នូ ឆ្នាំ២០១៥ ហើយចូលជាធរមាននៅថ្ងៃទី៤ ខែវិច្ឆិកា ឆ្នាំ២០១៦។

ចាប់តាំងពីឆ្នាំ២០១៦ កម្ពុជាលក់កាបូនបានជាង១១,៦លានដុល្លារអាមេរិកពីគម្រោងរេដបូក រួមមានរេដបូកកែវសីមា គម្រោងរេដបូកក្រវាញខាងត្បូង និងគម្រោងរេដបូកព្រៃឡង់ ដែលក្នុងនោះសហរដ្ឋអាមេរិកក៏ជាអ្នករួមចំណែកទិញមួយផងដែរ៕