ព័ត៌មានជាតិ
ម្ចាស់យីហោហាងអាហារធំមួយ បន្តបើកលក់ជម្នះកូវីដ តែសុំឲ្យម្ចាស់ទីតាំងបញ្ចុះថ្លៃឈ្នួល
ជំងឺកូវីដ១៩ដែលបានអូសបន្លាយពេលជាងមួយឆ្នាំនៅប្រទេសកម្ពុជា និងនៅលើពិភពលោក បានបង្កផលប៉ះពាល់ជាច្រើនដល់អាជីវកម្ម និងប្រជាពលរដ្ឋទូទៅ។ អាជីវកម្មមួយចំនួនត្រូវបង្ខំចិត្តបិទទ្វារ ដោយសារតែមិនមានលទ្ធភាព បង់ថ្លៃឈ្នួលទីតាំង ឫចំណាយលើប្រាក់ខែបុគ្គលិក។
លោក គួច សុខលី គឺជាប្រធានក្រុមហ៊ុន CBM ដែលជាក្រុមហ៊ុនបំរើសេវាកម្មម្ហូបអាហារ និងភេសជ្ជៈឈានមុខគេមួយនៅក្នុងប្រទេសកម្ពុជា។ អាជីវកម្មស្ថិតនៅក្រោមក្រុមហ៊ុន CBM នៅតែបន្តប្រតិបត្តិការក្នុងស្ថានភាពនៃការរីករាលដាលនៃជំងឺកូវីដ១៩។
លោក គួច សុខលី មានប្រសាសន៍ថា អាជីវកម្មរបស់លោកនៅតែបើកទៅមុខ ព្រោះមិនចង់ឃើញសេដ្ឋកិច្ចរាំងស្ទះ ទោះត្រូវខាតបង់ខ្លះ និងចង់ឲ្យអន្តរជាតិមើលឃើញថាកម្ពុជានៅតែអាចគ្រប់គ្រងជំងឺកូវីដ១៩បាន។
លោកបន្តថា ដោយសារមានការជួយជ្រោមជ្រែងពីរាជរដ្ឋាភិបាល ការលើកទឹកចិត្តពីម្ចាស់អាជីវកម្ម និងបុគ្គលិក លោកសង្ឃឹមថាជំងឺកូវីដ១៩នឹងបាត់ទៅវិញក្នុងពេលអនាគតដ៏ខ្លី។
ដើម្បីអាចដំណើរការអាជីវកម្មបានយូរអង្វែង និងដោយរលូន លោក គួច សុខលី បានសំណូមពរដល់ម្ចាស់ទីតាំងជួលទាំងអស់មេត្តាបន្ធូរបន្ថយថ្លៃឈ្នួលដល់អាជីវកម្មក្នុងស្ថានភាពវិបត្តិនេះ។
លោក គួច សុខលី លើកហេតុផលថា ដើម្បីជាការរួមចំណែកជួយដល់សេដ្ឋកិច្ចរបស់ប្រទេសកម្ពុជាឱ្យនៅតែដំណើរការ ម្ចាស់ទីតាំងជួលគួរពិចារណាបន្ធូបន្ថយថ្លៃឈ្នួលខ្លះដល់អាជីវកម្ម ពីព្រោះពេលខ្លះអាជីវកម្មត្រូវខាតបង់ប្រាក់ចំណូលដោយសារតែគ្មានអតិថិជន ឫអតិថិជនមានការថយចុះជាដើម។ នៅក្នុងបរិបទនេះ ប្រសិនបើអាជីវកម្មត្រូវបិទទ្វារ ដូច្នេះម្ចាស់ទីតាំងក៏ត្រូវបាត់បង់ថ្លៃឈ្នួលទាំងអស់ តែប្រសិនបើម្ចាស់ទីតាំងអាចបញ្ចុះតម្លៃត្រឹម៥០% នោះអាជីវកម្មទាំងអស់នៅតែអាចបន្តដំណើរការទៅមុខរីកចម្រើនជាមួយគ្នា។
លោក គួច សុខលី បានបន្តថា អំឡុងកូវីដ១៩ លោកបានជួបបងប្រុសម្នាក់ ដែលមានទីតាំងជួលនៅខេត្តសៀមរាប ដោយមានការយោគយល់ដល់ពាណិជ្ជករ ហើយថាក្នុងរយៈពេលកំណត់ណាមួយ លោកមិនយកថ្លៃឈ្នួលដល់អាជីវកម្មដែលកំពុងជួលទីតាំងរបស់លោកនោះទេ។ នេះជាការយោគយល់ និងការរួមចំណែកមួយដ៏ធំរបស់លោកដើម្បីបន្ធូបន្ថយសម្ពាធដល់ពាណិជ្ជករ ដែលកំពុងជួបការលំបាក។
គួរបញ្ជាក់ថា បច្ចុប្បន្ន ក្រុមហ៊ុន CBM មានសាខាជាង៤០កន្លែងនៅទូទាំងប្រទេសកម្ពុជា ដូចជានៅរាជធានីភ្នំពេញ បាត់ដំបង និងសៀមរាប ក្នុងនោះមានទាំងម៉ាកនាំចូលពីបរទេសដូចជា Tous Les Jours និង Domino’s Pizza និងម៉ាកដែលបង្កើតឡើងក្នុងស្រុកដូចជា The Asian Kitchen។
អត្ថបទ៖ វ៉ាត វិន
-
ព័ត៌មានជាតិ៧ ថ្ងៃ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ៥ ថ្ងៃ ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
ព័ត៌មានជាតិ៥ ថ្ងៃ ago
បណ្ឌិត គិន ភា៖ «ហេតុអីមិនបន្ទោសអ្នកបោកគេ បែរជាបន្ទោសអ្នកត្រូវគេបោកទៅវិញ?»
-
ចរាចរណ៍១ ថ្ងៃ ago
បឋម៖ រថភ្លើងបុករថយន្ដក្រុងដឹកអ្នកដំណើររបួសច្រើននាក់
-
ព័ត៌មានជាតិ៥ ថ្ងៃ ago
កម្ពុជានឹងមានភ្លៀងធ្លាក់ ១៥% ដល់ថ្ងៃទី ២៧ ដំណាច់ខែមីនា
-
សេដ្ឋកិច្ច៦ ថ្ងៃ ago
មន្ត្រីជាន់ខ្ពស់ធនាគារជាតិ៖ ក្រដាសប្រាក់ ៥ម៉ឺន រៀល មានគូសឆ្នូតកណ្តាលអាចប្តូរយកប្រាក់ថ្មីបានដោយឥតគិតថ្លៃ
-
ព័ត៌មានជាតិ៥ ថ្ងៃ ago
ដីជាង ៤៣ ហិកតា នៅភូមិសាស្ត្រភ្នំ ១៥០០ ត្រៀមដាំស្ដារព្រៃឈើឡើងវិញ
-
ព័ត៌មានអន្ដរជាតិ៣ ថ្ងៃ ago
លម្អិតហេតុការណ៍រន្ធត់ កប៉ាល់ដឹកកុងតឺន័រ បុកបាក់ស្ពាននៅទីក្រុង Baltimore