សន្តិសុខសង្គម

អគ្គិភ័យឆាបឆេះបន្ទប់ជួលមួយកន្លែង នៅខណ្ឌសែនសុខ បណ្ដាលឲ្យមនុស្សម្នាក់ស្លាប់ក្នុងភ្លក់ភ្លើង

បានផុស

២ ខែ មុន

នៅ

ថ្ងៃសុក្រ ៣ ធ្នូ ២០២១

ដោយ

ភ្នំពេញ ៖ បុរសម្នាក់បានស្លាប់នៅក្នុងភ្លក់ភ្លើង ក្នុងហេតុការណ៍គ្រោះអគ្គីភ័យ មួយដែលបានឆាបឆេះបន្ទប់ជួលលក់ដូរចាប់ហួយមួយកន្លែង ស្ថិតក្នុងភូមិដំណាក់ សង្កាត់គោលឃ្លាង ខណ្ឌសែនសុខ បង្កឲ្យមានការភ្ញាក់ផ្អើលឡើងកាលពីវេលាម៉ោង ១៥ និង១០នាទីរសៀលថ្ងៃទី០៣ ខែធ្នូ ឆ្នាំ២០២១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនរងគ្រោះដែលស្លាប់ មានឈ្មោះ ហ៊ីង សំអុន អាយុ៥៤ឆ្នាំ ជាអ្នករត់ម៉ូតូឌុប និង លក់អីវ៉ាន់ចាបហួយ។ ចំណែកស្ត្រីជាប្រពន្ធ ឈ្មោះ នាង ហម អាយុ ៥៣ឆ្នាំ បច្ចុប្បន្ន ប្តីប្រពន្ធទាំង២ មានកូនប្រុស១ស្រី១នៅក្នុងបន្ទុក។

យោងតាមប្រភពព័ត៌មាន ឲ្យដឹងថា នៅមុនកើតហេតុ ជនរងគ្រោះ និងមាម្នាក់ទៀត បានអង្គុយផឹកលេងនៅក្នុងបន្ទប់ជួល លុះក្រោយមក បុរសជាមា បានត្រឡប់ទៅផ្ទះវិញ ដោយពេលនោះស្ត្រីជាប្រពន្ធបានទៅអង្គុយលាងចាននៅខាងមុខផ្ទះ ហើយបុរសជាប្តី កំពុងបើកហ្គាសដាក់ដាំបាយ និងដាំទឹក ។ ស្រាប់តែពេលបើកហ្គាសនោះ ក៏ផ្ទុះហ្គាស បណ្តាលឲ្យមានជាអណ្តាតភ្លើងឆាបឆេះឡើងតែម្តង។ ភ្លាមៗនោះ ស្ត្រីជាប្រពន្ធ បានស្រែកឆោឡោឲ្យអ្នកក្បែរខាង ជួយប្តីខ្លួនផង ព្រោះប្តីជាប់នៅក្នុងបន្ទប់។

បន្ទាប់ពីកើតហេតុ កម្លាំងនគរបាល និងអាជ្ញាធរមូលដ្ឋាន រួមទាំងរថយន្តពន្លត់អគ្គីភ័យ នៃស្នងការដ្ឋាននគរបាលរាជធានីភ្នំពេញជាច្រើនគ្រឿង បានចុះអន្តរាគមន៍បាញ់ទឹកទប់ស្កាត់អណ្តាតភ្លើង កុំឲ្យឆាបឆេះរាលដាលបន្ត។ ក្រោយការខិតខំអន្តរាគមន៍ប្រមាណកន្លះម៉ោង អណ្តាតភ្លើងត្រូវបានរលត់សូន្យសុងទៅវិញ ប៉ុន្តែការឆាបឆេះ បានសរហគ្រោះដែលជាប់ទៅខាងក្នុង ដោយត្រូវឆេះស្លាប់ក្នុងបន្ទប់ទឹក។

ក្នុងហេតុការណ៍គ្រោះអគ្គីភ័យនេះ សមត្ថកិច្ចប្រើប្រាស់រថយន្តពន្លត់អគ្គិភ័យអស់០៩គ្រឿង ទើបអាចគ្រប់គ្រងស្ថានការណ៍បាន១០០ភាគរយ។ ចំពោះមូលហេតុ នៃការឆាបឆេះ មន្ត្រីជំនាញបញ្ជាក់ថា បណ្តាលមកពី ផ្ទុះធុងហ្គាស។ យ៉ាងណាមិញ ក្រោយការពិនិត្យវិច័យរួចរាល់ សមត្ថកិច្ចសម្រេចប្រគល់សពជូនសាច់ញាតិ ដើម្បីយកទៅធ្វើបុណ្យតាមប្រពៃណី៕

ដោយ ៖ លីហេង