សិស្សានុសិស្ស ២៧៨នាក់ បានចូលរួមប្រកួតសំណេរ នៅវិទ្យាល័យព្រែកលៀប អបអរសង្ក្រាន្តឆ្នាំថ្មី

នៅថ្ងៃនេះ វិទ្យាល័យព្រែកលៀប បានរៀបចំកម្មវិធីប្រកួតសំណេរសររសេរសំបុត្រ ក្រោមប្រធានបទ “ញញឹមសាទរ សង្ក្រាន្តឆ្នាំថ្មី” ដោយមានសិស្សានុសិស្សចូលរួម ២៧៨នាក់ ក្នុងនោះមានស្រី ១៥២នាក់។

ការប្រកួតសំណេរនេះ មានគោលបំណង ដើម្បីលើកកម្ពស់ការសរសេររបស់សិស្សានុស្សិស្ស ប្រកបដោយភាពត្រឹមត្រូវ ក៏ដូចជា លើកស្ទួយវិស័យអក្សរសាស្ត្រខ្មែរឱ្យកាន់តែល្អប្រសើរ និងដើម្បីចូលរួមអបអរសាទរពិធីបុណ្យចូលឆ្នាំប្រពៃណីជាតិខ្មែរ ជាពិសេសចូលរួមអបអរសាទរដល់កម្មវិធីសង្ក្រាន្ត ដែលនឹងប្រព្រឹត្តិទៅនៅខេត្តសៀមរាបនាពេលខាងមុខនេះ។

ដំណើរការប្រកួត គឺមានថេរវេលា ៩០នាទី គិតចាប់ពីម៉ោង ៨៖០០ ដល់ ៩៖៣០នាទីព្រឹក ថ្ងៃទី២ ខែមេសា នេះ។ ចំពោះដំណើរការសំណេរ គឺធ្វើឡើងនៅខាងក្រៅបន្ទប់រៀន ពោលគឺក្រៅថ្នាក់រៀន ហើយក្នុងបរិវេណខាងមុខអគារ ឃ នៃវិទ្យាល័យព្រែកលៀប។ បេក្ខជនដែលទទួលបានជ័យលាភី នឹងទទួលបានជាមេដាយមាស មេដាយប្រាក់ និងមេដាយ សំរិទ្ធិ។ ចំណែកឯបេក្ខជន ដែលមិនទទួលបានជ័យលាភី នឹងទទួលបានវិញ្ញាបនបត្របញ្ជាក់ការចូលរួមផងដែរ។

ដោយស្របតាមសេចក្តីណែនាំរបស់ក្រសួងអប់រំ យុវជន និងកីឡា ចុះថ្ងៃទី៣១ ខែមីនា ឆ្នាំ២០២៥ ស្តីពី “ការលេងល្បែងប្រជាប្រិយ និងរបាំប្រជាប្រិយខ្មែរ ក្នុងឱកាសត្រៀមអបអរសាទរ និងថ្ងៃប្រារព្ធពិធីបុណ្យចូលឆ្នាំថ្មីប្រពៃណីជាតិ តាមគ្រឹះស្ថានសិក្សាសាធារណៈ និងឯកជន” ក្រោយពេលការប្រកួតសំណេរសរសេរសំបុត្របញ្ចប់រួចរាល់ហើយនោះ វិទ្យាល័យព្រែកលៀប ក៏បានរៀបចំការលេងប្រជាប្រិយខ្មែរ ដូចជា វាយក្អម ចោលឈូង បោះអង្គញ់ និងចាប់កូនខ្លែងជាដើម ដើម្បីចូលរួមបន្តអភិរក្សនូវទំនៀមទម្លាប់ប្រពៃណីខ្មែរ នៃការលេងល្បែងប្រជាប្រិយខ្មែរ និងថែរក្សានូវវប្បធម៌ដ៏ល្អផូរផង់របស់ជាតិ៕