ញាក់សាច់! Antony បោះសម្តីព្រមានទៅ Barca មុនជួបគ្នាចុងសប្តាហ៍នេះ

ខ្សែប្រយុទ្ធរបស់ Real Betis កីឡាករ Antony បានបង្ហាញឆន្ទៈខ្ពស់ ក្នុងការផ្តួលក្រុមកំពូលតារាង Barcelona នៅចុងសប្តាហ៍នេះ។

នៅថ្ងៃ អាទិត្យ ទី ៦ សប្តាហ៍នេះ ក្រុម Real Betis នឹងធ្វើដំណើទៅកាន់កីឡដ្ឋាន Estadi Olimpic Lluis Companys របស់ Barcelona ដើម្បីប្រកួតសប្តាហ៍ទី ៣០ ពានរង្វាន់ La Liga លីគរបស់ អេស្ប៉ាញ។

យ៉ាងណាមិញ មុនការប្រកួតនេះមកដល់ Antony ខ្សែប្រយុទ្ធស្លាបរបស់ Real Betis ហាក់មានក្តីជឿជាក់ខ្លាំងមែនទែន ថា ក្រុម​របស់​ខ្លួន​គេ នឹងអាចផ្តួល Barcelona បាន។ ក្នុងនោះខ្សែប្រយុទ្ធសញ្ជាតិ ប្រេស៊ីល វ័យ ២៥ ឆ្នាំបានលើកឡើងយ៉ាងដូច្នេះថា ៖«ពួកយើងដឹងថា ពួកគេមានកីឡាករគុណភាពជាច្រើន ប៉ុន្តែពួកយើងធ្លាប់បានបំបាក់ Real Madrid រួចហើយ ដូច្នេះវាមិនមែនជារឿង ដែលមិនអាចទៅរួចឡើយ ដែលយើងអាចផ្តួល Barca មួយទៀត»។

គួរដឹងថា Barcelona បច្ចុប្បន្នកំពុងឈរនៅកំពូងតារាងចំណាត់ថ្នាក់ La Liga ដោយឆ្លងកាត់ ២៩ ប្រកួត ពួកគេឈ្នះ ២១ ស្មើ ៣ និងចាញ់ ៥ មាន ៦៦ ពិន្ទុ។ ចំណែក Real Betis វិញ បច្ចុប្បន្នកំពុងឈរនៅលេខរៀងទី ៦ ដោយឆ្លងកាត់ ២៩ ប្រកួតដូចគ្នា ពួកគេមាន ៤៧ ពិន្ទុ៕

ប្រែសម្រួលអត្ថបទ៖ សេម កុសល
ប្រភព៖ Manchester Evening News