ផ្លូវលេខ១០៨ ក្រុងតាខ្មៅ ខូចអស់ ពិបាកធ្វើដំណើរ ពលរដ្ឋសំណូមពរជាថ្មី សុំជួយដោះស្រាយ

ផ្លូវលេខ១០៨ ស្ថិតក្នុងសង្កាត់តាខ្មៅ ក្រុងតាខ្មៅ ខេត្តកណ្ដាល ប្រវែងជាង ១គីឡូម៉ែត្រ បានខូចស្ទើរអស់ ធ្វើឱ្យប្រជាពលរដ្ឋពិបាកធ្វើដំណើរ និងទទូចជាថ្មី សុំឱ្យមានការអន្តរាគមន៍។

ប្រជាពលរដ្ឋ និងអ្នកធ្វើដំណើរតាមផ្លូវមួយខ្សែនេះ បានឱ្យដឹងថា ផ្លូវលេខ១០៨នេះ មិនមែនទើបតែខូចនោះទេ ពោលគឺ ខូចជាយូរណាស់មកហើយ តែមិនដែលឃើញខាងមន្ទីរសាធារណការ មកជួសជុស ឬ ស្ថាបនាទាល់តែសោះ ធ្វើឱ្យពលរដ្ឋជួបការលំបាកជាខ្លាំងពេលធ្វើដំណើរ ពិសេសពេលមានភ្លៀង និងទឹកដក់។

អ្នកដំណើរ អះអាងថា នៅពេលភ្លៀងធ្លាក់ម្តងៗ គឺទឹកក្នុងជង្ហុក អ្នកដំណើរមើលមិនឃើញ ជិះធ្លាក់ជង្ហុក ប៊ិះដួលម្តងៗទៅហើយ។ និយាយរួម គឺលំបាកធ្វើដំណើរមែនទែន បើចៀសបាន គឺ ចៀសហើយ មិនធ្វើដំណើរតាមផ្លូវមួយខ្សែនេះទេ។

ពាក់ព័ន្ធផ្លូវមួយខ្សែនេះ ប្រជាពលរដ្ឋក៏ធ្លាប់រាយការណ៍ជូនអាជ្ញាធរពាក់ព័ន្ធផងដែរ ជាពិសេសខាងមន្ទីរសាធារណការ ប៉ុន្តែមិនទាន់ឃើញមានមន្ត្រីមកជួយដោះស្រាយបញ្ហាជូនប្រជាពលរដ្ឋទាល់តែសោះ។

ប្រជាពលរដ្ឋ សង្ឃឹមថា ការផ្សព្វផ្សាយតាមរយៈសារព័ត៌មាន នឹងនាំដំណឹងនេះដល់ខាងក្រសួងសាធារណការតែម្តង ដើម្បីជ្រាប និងដោះស្រាយបញ្ហាជូនប្រជាពលរដ្ឋ៕

អត្ថបទ៖ ឆៃ យ៉ា