ពលរដ្ឋ ស្នើអាជ្ញាធរជួយជួសជុលផ្លូវបេតុង​មួយខ្សែ ចូលផ្សារកំពង់ត្រាច ដែលកំពុងរងការខូចខាត

ក្រុមប្រជាពលរដ្ឋ បានស្នើឲ្យអាជ្ញាធរមូលដ្ឋាន ជួយចុះត្រួតពិនិត្យ និងជួសជុលផ្លូវបេតុង​មួយខ្សែចូលផ្សារកំពង់ត្រាច ដែលកំពុងរងការខូចខាត។ ផ្លូវ​បេតុងមួយខ្សែនេះ ស្ថិតនៅក្នុង​ភូមិ​កំពង់ត្រាច​ទី ​១ ឃុំកំពង់ត្រាច​ខាងកើត ស្រុក​កំពង់ត្រាច ខេត្ត​កំពត។

ក្រុមប្រជាពលរដ្ឋដដែល បានឲ្យដឹងថា បន្ទាប់ពីមានភ្លៀងធ្លាក់នាពេលកន្លងនេះ បានធ្វើឲ្យផ្លូវបេតុង​ចូលផ្សារ​កំពង់ត្រាចមួយខ្សែនេះ រង​ការខូចខាតយ៉ាងដំណំជាច្រើនខែមកហើយ ដោយមានជង្ហុកតូចធំ ធ្វើឲ្យពួកគាត់ពិបាកធ្វើដំណើរឆ្លងកាត់ជាខ្លាំង។ ពួកគាត់ បានរិះគន់ថា អាជ្ញាធរមូលដ្ឋាន ហាក់មិនសូវយកចិត្តទុកដាក់ពិនិត្យជួសជុលផ្លូវបេតុងមួយខ្សែនេះសោះ ហើយកន្លងមកការរៀប​ចំប្រព័ន្ធ​លូ​មិនបានល្អទៀត ទើបភ្លៀងធ្លាក់មកនាំមានទឹកដក់យ៉ាងដូច្នេះ។

ដោយសារជួបការលំបាកយ៉ាងដូច្នេះ ទើបប្រជាពលរដ្ឋបានស្នើសុំឲ្យអាជ្ញាធរ ទាំងថ្នាក់ស្រុក និងថ្នាក់ខេត្ត ព្រមទាំងមន្ទីរជំនាញ ​ជួយ​ជួសជុលផ្លូវ​បេតុងចូល​ជុំវិញផ្សារ​កំពង់ត្រាច​នេះ ឲ្យបាន​ស្អាតឡើង​វិញ​ផង។ អ្នកគ្រប់គ្រង​ផ្សារ​កំពង់ត្រាច លោក ហាម បាវ បានឲ្យដឹងថា ផ្លូវ​បេតុងមួយខ្សែនេះ ពិតជារង​ការ​ខូច​ខាតពិតមែន ហើយ​ខាង​ផ្សារ​របស់លោក ក៏​បាន​ជួសជុល​បន្តិចម្ដងៗ ដើម្បីឲ្យ​ប្រជាពលរដ្ឋ​ងាយស្រួលធ្វើដំណើរ​ចេញចូលផ្សារ​៕  

អត្ថបទ៖ សឹង រ៉ាត់