ព័ត៌មានជាតិ

ផ្លូវមួយខ្សែ ប្រវែងជិត ១០ គីឡូម៉ែត្រ ក្នុងស្រុកបវេល កំពុងមានបញ្ហាយ៉ាងខ្លាំងដល់ការធ្វើដំណើរ

បានផុស

២ years មុន

នៅ

ថ្ងៃព្រហស្បតិ៍ ១២ កញ្ញា ២០២៤

ដោយ

ផ្លូវដីក្រហមមួយខ្សែ ប្រវែងប្រមាណជិត ១០ គីឡូម៉ែត្រ ឆ្លងកាត់ភូមិចំនួន ៤ ក្នុងស្រុកបវេល កំពុងប្រឈមបញ្ហាយ៉ាងខ្លាំងដល់ការធ្វើដំណើររបស់ប្រជាពលរដ្ឋ ពិសេសសិស្សានុសិស្សដែលមានការលំបាកក្នុងការធ្វើដំណើរទៅសាលារៀន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការលើកឡើងរបស់ លោក ទឹង ស៊ីនឿន ជាមេប៉ុស្តិ៍នគរបាលរដ្ឋបាលឃ្លាំងមាស បានបញ្ជាក់ថា ផ្លូវដែលប្រឈមនឹងបញ្ហានេះ បានស្ថាបនាឡើងកាលពីឆ្នាំកន្លងទៅ ដោយក្រុមការងារយកដីក្រហមពីចំណុចភ្នំព្រាលមកស្ថាបនា។ ដីក្រហមនេះ នៅពេលដែលប៉ះទឹកគឺរលាយក្លាយជាភក់តែម្ដង នេះបើក្រុមការងារយកគ្រោះក្រហមពីភ្នំកំពីងពួយ ម្ល៉េះសមមិនមានភក់ជ្រាំបែបនេះនោះឡើយ ព្រោះគ្រោះក្រហមនៅភ្នំកំពីងពួយរឹង ប៉ះទឹកមិនរលាយនោះទេ។

លោកបានបន្ថែមថា បច្ចុប្បន្នប្រជាពលរដ្ឋមានការថ្ងួចថ្ងូរយ៉ាងខ្លាំង នៅពេលភ្លៀងធ្លាក់ម្ដងៗ ដែលធ្វើឲ្យពួកគាត់មិនអាចចេញដំណើរទៅណាបាន ព្រោះដីនេះស្អិតខ្លាំង។ ផ្លូវនេះមានចម្ងាយប្រមាណជិត ១០ គីឡូម៉ែត្រ ដោយបានឆ្លងកាត់ភូមិច្រាំងបាក់ ភូមិត្រពាំងក្បាលស្វា ភូមិព្រៃធំ និងភូមិឧបសម្ព័ន្ធ (កំប៉ូស្ទាវ.អូរតាញៀន.កស្វាយ)។

អាជ្ញាធរនៅទីនោះ ក៏បានបញ្ជាក់បន្ថែមដែរថា សិស្សានុសិស្សកំពុងប្រឈមខ្លាំងក្នុងការធ្វើដំណើរទៅសាលារៀន ព្រោះកន្លងទៅថ្មីៗ នេះ គឺជាពេលវេលាដែលសិស្សត្រូវប្រឡង ហើយនៅពេលនោះដែរ ភ្លៀងក៏បានបង្អុរតាំងពីយប់មកខ្លាំង ធ្វើឲ្យការធ្វើដំណើររបស់សិស្សមានការយឺតយ៉ាវ ប៉ុន្តែដោយសារការយល់ឃើញជាក់ស្ដែង ធ្វើឲ្យខាងសាលារៀនអនុគ្រោះផងដែរ។

នៅព្រឹកថ្ងៃទី ១២ ខែកញ្ញា នេះដែរ លោក ព្រួញ រិទ្ធថា ប្រធានមន្ទីរសាធារណការ និងដឹកជញ្ជូនខេត្តបាត់ដំបង និងជាក្រុមការងារចុះជួយឃុំឃ្លាំងមាស និងឃុំព្រៃខ្ពស់ បានបញ្ជាក់ប្រាប់ “កម្ពុជាថ្មី” ថា លោកក៏បានដឹងដែរអំពីបញ្ហានេះ ក៏ប៉ុន្តែលោករង់ចាំឲ្យផុតរដូវភ្លៀងសិន ទើបលោកបញ្ជូនក្រុមការងារ និងគ្រឿងចក្រទៅផ្លាស់ប្ដូរដីស្រទាប់ខាងលើចេញ និងចាក់គ្រួសក្រហមជាថ្មីឡើងវិញ ដើម្បីឲ្យប្រជាពលរដ្ឋ និងសិស្សានុសិស្ស បានធ្វើដំណើរប្រកបដោយសុវត្ថិភាព ដែលការងារនេះគឺមិនយូរទេ បើលោកសន្យាថា នឹងធ្វើជូនប្រជាពលរដ្ឋឲ្យបាន៕

អត្ថបទ ៖ សោ និយមរ័ត្ន