នគរបាលព្រហ្មទណ្ឌឡោមព័ទ្ធ​សណ្ឋាគារមួយកន្លែងពាក់ព័ន្ធករណីបាញ់សម្លាប់ជនជាតិ វៀតណាមកាលពីម្សិលមិញ

កម្លាំងនគរបាលព្រហ្មទណ្ឌកម្រិលធ្ងន់ក្រសួងមហាផ្ទៃបានចុះឡោមព័ទ្ធសណ្ឋាគារមួយកន្លែងក្នុងសង្កាត់ទឹកថ្លា ពាក់ព័ន្ធករណីបាញ់សម្លាប់ជនជាតិវៀតណាមម្នាក់កាលពីថ្ងៃទី២៩ ខែកក្កដា ម្សិលមិញ នៅខណ្ឌបឹងកេងកង។

ប្រតិបត្តិការនេះបានធ្វើឡើងនៅរសៀលថ្ងៃទី៣០ ខែកក្កដា ឆ្នាំ២០២៣នេះ នៅចំណុចសណ្ឋាគារ សូផៃ តាមបណ្ដោយផ្លូវលេខ២៧១ ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។ ប្រភពព័ត៌មានបានឲ្យដឹងថា ក្នុងប្រតិបត្តិការនេះ កម្លាំងនគរបាលបានឃាត់ខ្លួនសង្ស័យចំនួន១០នាក់ (ស្រី០៤នាក់) នាក់បញ្ជូនទៅក្រសួងមហាផ្ទៃដើម្បីសាកសួរបន្ថែម។

សូមបញ្ជាក់ថា កាលពីកាលពីវេលាម៉ោង២និង០០រសៀល ថ្ងៃទី២៩ ខែកក្កដា ឆ្នាំ២០២៣ មានបុរសជនបរទេសម្នាក់ ត្រូវបានខ្មាន់កាំភ្លើងបាញ់ស្លាប់ភ្លាមៗយ៉ាងអាណោចអាធ័ម បន្ទាប់ពីឈ្លោះទាស់ទែងគ្នាមួយប្រាវ ដោយជនរងគ្រោះបានដកកាំបិត ប៉ុន្តែភាគីជនសង្ស័យមានកាំភ្លើងក៏បានដកបាញ់៤គ្រាប់ផ្ទួនៗ រួចនាំគ្នារត់ឡើងឡានរត់គេចខ្លួនបាត់ស្រមោល ស្ថិតនៅចំណុចផ្លូវ៣៦០ កែងផ្លូវ១៦៣ សង្កាត់ទួលស្វាយព្រៃទី១ ខណ្ឌបឹងកេងកេង រាជធានីភ្នំពេញ។

តាមប្រភពព័ត៌មានបានឲ្យដឹងថា មុនពេលកើតហេតុ គេបានឃើញជនរងគ្រោះ និងខ្មាន់កាំភ្លើងបានមានទំនាស់ទាស់​ទែងគ្នា ពេលនោះជនរងគ្រោះក៏ដើរចេញ ស្រាប់តែភាគីម្ខាងទៀត បានទាញកាំភ្លើងដេញបាញ់បុរសរងគ្រោះជាច្រើនគ្រាប់ផ្ទួនៗគ្នា ដោយជនរងគ្រោះបានព្យាយាមរត់ឲ្យគេជួយដែរ តែត្រូវជនដៃដល់បាញ់ស្លាប់យ៉ាងរន្ធត់ រួចប្រញាប់រត់ឡើងជិះរថយន្តឡិចស៊ីស NX200t ដើម្បីគេចខ្លួនបាត់តែម្តង ។

ជនរងគ្រោះមានអាយុប្រហែល៣០ឆ្នាំជាង ស្លៀកខោខ្លី ពណ៌សាច់ ជើងខ្លី ពាក់អាវស ដៃវែង ស្ពាយកាបូបពណ៌ខ្មៅ ពាក់ស្បែកជើងស៊ក ហើយបើតាមការធ្វើកោសល្យវិច័យ នៅទីតាំងកើតហេតុផ្ទាល់ ឃើញមានគ្រាប់ចំនួន៤គ្រាប់។

បច្ចុប្បន្នជនសង្ស័យទាំង១០នាក់ បញ្ចូនទៅក្រសួងមហាផ្ទៃដើម្បីសួនាំ កសាងសំណុំរឿងចាត់ការតាមនីតិវិធី៕

អត្ថបទ៖ សុខុម