ឃាត់សិស្សសាលាបាក់ទូក១២នាក់ គេចម៉ោងសិក្សា​ប្រមូលផ្ដុំគ្នាក្នុង​ហាងកាហ្វេ

កម្លាំងគណៈបញ្ជាការឯកភាពខណ្ឌ៧មករា កាលពីព្រឹកថ្ងៃទី៥ ខែកុម្ភៈ ឆ្នាំ២០២៥ បានឃាត់ខ្លួនសិស្សានុសិស្សសាលាបាក់ទូកប្រុសស្រីចំនួន១២នាក់ ដែលនាំគ្នាគេចសាលាមិនចូលរៀនមកអង្គុយក្នុងហាងកាហ្វេមួយកន្លែង នៅផ្លូវបេតុង សង្កាត់វាលវង់ ខណ្ឌ៧មករា។

លោក ថេង សុថុល អភិបាលនៃគណអភិបាលខណ្ឌ៧មករា បានបញ្ជាក់ថា បញ្ហានេះកើតឡើងដដែលជាដដែល ខណៈកម្លាំងអាជ្ញាធរមានសមត្ថកិច្ចតាមប៉ុស្តិ៍មូលដ្ឋានក៏តែងតែចុះផ្សព្វផ្សាយអប់រំជាច្រើនលើករួចមកហើយដែរ ដូចជាតាមសាលារៀន ជាពិសេសផលប៉ះពាល់បញ្ហាគ្រឿងញៀន បញ្ហាក្មេងទំនើង បញ្ហាចរាចរណ៍ ជាដើម ប៉ុន្តែសិស្សានុសិស្សមួយចំនួនតូចនៅតែមិនស្ដាប់ការណែនាំរបស់មន្ត្រីអាជ្ញាធរក៏ដូចជាគណៈគ្រប់គ្រងសាលាឡើយ។

លោកអភិបាលខណ្ឌបន្ថែមថា សិស្សសាលាទាំង១២នាក់ ត្រូវបានកម្លាំងគណៈបញ្ជាការឯកភាពខណ្ឌចុះទៅប្រមូលមកធ្វើកិច្ចសន្យាអប់រំ និងអញ្ជើញអាណាព្យាបាលដើម្បីមកធ្វើកិច្ចសន្យាចំពោះមុខអាជ្ញាធរមានសមត្ថកិច្ច និងគណៈគ្រប់គ្រងសាលា និងឲ្យអាណាព្យាបាលធានាទើបអនុញ្ញាតឲ្យត្រឡប់ទៅវិញ។

លោក ថេង សុថុល ក៏សំណូមពរដល់សិស្សានុសិស្សទាំងអស់ត្រូវខិតខំរៀនសូត្រ ដើម្បីក្លាយជាសិស្សគំរូ និងប្រជាពលរដ្ឋល្អក្នុងសង្គមជាតិ៕

អត្ថបទ៖ រដ្ឋា