កីឡាករ Antony អាចនឹងត្រូវដកចេញពីក្រុមជម្រើសជាតិប្រេស៊ីល

ខ្សែបម្រើរបស់ក្លិប​ Manchester United កីឡាករ Antony អាចនឹងត្រូវបានដកចេញពីក្រុមជម្រើសជាតិប្រេស៊ីល បន្ទាប់ពីមានការចោទប្រកាន់ពាក់​ព័ន្ធ​នឹង​ការប្រើអំពើហឹង្សាលើរាងកាយ​ពី​អតីតមិត្តស្រី Gabriela Cavallin។

សហព័ន្ធបាល់ទាត់ប្រេស៊ីលបាននិយាយថា កីឡាករ Antony វ័យ២៣​ឆ្នាំអាចត្រូវបានដកចេញពីក្រុម ប្រសិនបើករណីចោទប្រកាន់ពីមិត្តស្រី​ក្លាយជាការពិត។ ប៉ូលីសនៅទីក្រុង Sao Paulo និង Greater Manchester កំពុងស៊ើបអង្កេតលើករណីនេះ​ ប៉ុន្តែ​ Antony បានអះអាងនិងបដិសេធ​ចំពោះ​ការ​ចោទប្រកាន់។

កីឡាករ Antony បាននិយាយនៅលើប្រព័ន្ធផ្សព្វផ្សាយសង្គមថា៖«ខ្ញុំអាចបញ្ជាក់ដោយស្ងប់ស្ងាត់ថា ការចោទប្រកាន់នេះគឺមិនពិត។ ភស្តុតាង​​ដែល​បាន​រក​ឃើញ​ និងភស្តុតាងផ្សេងទៀតដែលនឹងត្រូវបានបង្ហាញថា ខ្ញុំគ្មានកំហុស​ទេ​ចំពោះការចោទប្រកាន់។ ខ្ញុំជឿជាក់ថា ការស៊ើបអង្កេតរបស់ប៉ូលីសដែលកំពុងបន្ត និងបង្ហាញការពិតអំពីភាពគ្មានកំហុសរបស់ខ្ញុំ»។

Antony ត្រូវបានចោទប្រកាន់​ពី​ការ​វាយប្រហារលើ​អតីតមិត្តស្រីរបស់​ខ្លួន​គឺកញ្ញា Gabriela Cavallin ដោយវាយក្បាល នៅក្នុងបន្ទប់សណ្ឋាគារ Manchester កាលពីថ្ងៃទី ១៥ ខែមករាដែលធ្វើឱ្យនាងរងរបួសក្បាល​រហូត​ត្រូវ​ការការ​ព្យាបាលពីវេជ្ជបណ្ឌិត។

ក្នុងសេចក្តីថ្លែងការណ៍រកាលពីថ្ងៃច័ន្ទ កីឡាករ​បាន​លើក​ឡើង​ថា ទំនាក់ទំនងរបស់ខ្លួន​ជាមួយអតីត​មិត្ត​ស្រី​គឺច្របូកច្របល់ ប៉ុន្តែរូបគេអះអាងថា មិន​ធ្លាប់​ប្រព្រឹត្ត​អំពើ​ឈ្លានពាន​លើ​រាងកាយណាមួយឡើយ៕

ប្រែសម្រួល៖ ផា រតនា
ប្រភព៖ BBC